Xuiya kampa tlen onka ijtik

Xuiya kampa tlen kipiya

 MATINEMIKAN KEN CRISTO

Xyolpaki ijkuak tontenojnotsas

Xyolpaki ijkuak tontenojnotsas

¿Kemantika mitstekiyomaka tias tontenojnotsas? Tla kema, xsan moselti ijkon mopan nochiua; miyekej ijkon tikmachiliaj. Kanaj pampa miyekpa tikinnextiaj akin xkinekij techkakiskej noso sekimej kualanij, noso kanaj xtiuelij titlajtouaj inuan akin xtikimixmatij. Yejon kichiua maka matiyolpakikan, san ika, tiktekichiuiliaj toTajtsin akin yolpaki, akin noijki kineki matiyolpakikan (Sl 100:2; 1Ti 1:11). Ika yejon, ¿tlenon yeyi tlemach techpaleuis matiyolpakikan ipan tenojnotsalistli?

Kachtopa, tejuamej titenojnotsaj itech se tlamachialistli. Maski tlaltikpakchanejkej xkipiyaj tlamachialistli uelis tikinyolpaktiskej tla tikimijliaj “kuajli tlajtoltin itech tlen melak kuajli” (Isa 52:7). Noijki, kuajli tlajtoltin itech Tekiuajyotl uelis techyolpaktis. Ijkuak xitiauj tontenojnotsa, xtlanemili itech tlateochiualistin tlen kuajkuis iTekiuajyo toTajtsin ipan tlaltikpaktli.

Ika ome, kuajli tlajtoltin kinpaleuiya tlaltikpakchanejkej kuajli manemikan niman noijki kuajli manemikan ixpan toTajtsin, pampa kikajkauaj tlen xkuajli kichiuayaj niman ijkon uelis nemiskej nochipa (Isa 48:17, 18; Ro 1:16). Matiknemilikan ika titemakixtiaj, yejon totekiyo. Maski sekimej xkinekij makinmakixtikan, xtikajkauaj tikintejtemouaj akin kema kinekij makisaskej (Mt 10:11-14).

Ika yeyi, tlen ueyi kijtosneki, totenojnotsalis kiueyichiua Jehová. Yejua melak kitlasojkaita yejuin tekitl (Isa 43:10; Heb 6:10). Yejua techmaka iespíritu santo niman ijkon uelis tikchiuaskej yejuin tekitl. Ika yejon, nochipa matiktlajtlanilikan matechmaka pakilistli tlen kisa itech espíritu santo (Gál 5:22). Tla Jehová touan nemi uelis tikixnamikiskej tlen techmojtia niman titenojnotsaskej ika yolchikaualistli (Hch 4:31). Kuakon, maski san kenon technankiliskej tlaltikpakchanejkej, tiyolpakiskej pampa titenojnotsaj (Eze 3:3).

¿Kenon tikuelitaskia timomachilis ijkuak tontenojnotsas? ¿Kenon uelis tikteititis ika tiyolpaki?

XKITAKAN VIDEO XNEXTI PAKILISTLI IJKUAK TIMOMACHTIS NIMAN TITLANEMILIS, SAKIN XKINNANKILIKAN YEJUIN TLAJTOLTILISTIN:

  • ¿Tleka noneki kuajli tomachtiskej itech iTlajtol toTajtsin niman xsan titenojnotsaskej miyek horas ipan metstli?

  • ¿Kenon uelis tikchiuaskej ken okichiuj María?

  • ¿Kemanon titlanemilia itech iTlajtol toTajtsin?

  • ¿Tlenon melak tikuelita ijkuak tontenojnotsa?