Xuiya kampa tlen onka ijtik

Xuiya kampa tlen kipiya

 MATINEMIKAN KEN CRISTO

Achtopa xmoyoltlaliti iuan mokniuj. ¿Kenon uelis tikchiuas?

Achtopa xmoyoltlaliti iuan mokniuj. ¿Kenon uelis tikchiuas?

Xnemili ika tichanti Galilea ipan itonaluan Jesús. Tejua otinejnen hasta Jerusalén kampa tikpanoltis iluitl itoka Cabañas. Ueyikalpan tentika pampa melak miyekej akin nochiuiyan ualeuaj okiueyichiuatoj toTajtsin. Tejua tikneki tikmakas Jehová se uentli. Kuakon maski ouijtika tiauj teopan niman tikitki se cabra. Ijkuak tajsi teopan, melak yotojlantiak. Nion se tlaltikpakchane xok uelis kalakis, melak miyekej akin noijki kinekij tlauentlaliskej. Aman itikinmakas teopixkej cabra tlen tikuika. San ika, ijkuak itikchiuas, tikilnamiki ika se mokniuj mouan kualantok. Yejua kanaj nemi kampa tojlan noso oksekan ipan ueyikalpan. Jesús tetomilia tlen nonekiskia tikchiuas (xpoua Mateo 5:24). ¿Kenon uelis timoyolseuis iuan mokniuj ijkon ken Jesús okijto? Itech tlen uajnestiuj tlatsintlan, xtlapalyoti tlen noneki tikchiuas.

TLEN NONEKISKIA TIKCHIUAS

  • Titlajtos iuan mokniuj san tla tiknemilia kinamiki ika yejua makualanto.

  • Tiknekis makiseli ika yejua onopopolo pampa tiknemilia ika sa nimantsin kualani noso ika noijki kipiya tlajtlakojli itech tlen opanok.

  • Tijkakis ika ijyouilistli ijkuak tlajtos niman maski xnochi tikasikamati tikijlis ika mamitstlajpopolui pampa otikyolkoko noso ipampa tlen xtiknekiya manochiua, san ika onochiuj.

TLEN NONEKISKIA MAKICHIUA TOKNIUJ

  • Kimijlis oksekimej tokniuan itech tlanechikojli tlen otikchiuili niman ijkon oksekimej makipaleuikan.

  • Mitsixkoijlis ijkuak mitsilnamiktis kenon onochiuj tlen xkuajli opanok niman mitschiualtis xseli ika tejua otikpix tlajtlakojli.

  • Kasikamatis ika ononek timoyolyemanilis niman timoyolchikauas ijkon ouel iuan otitlajto niman mitstlapopoluis ika nochi iyojlo.

Aman xtiktemakaj uentli ika yolkamej ijkuak tikueyichiuaj Jehová. San ika ¿tlenon otemachti Jesús itech tinemis ika yolseuilistli imiuan tokniuan niman ken tikueyichiuaj Jehová?