Sekimej kinemiliaj ika más kuajli yeskia tla kileerouaj se Biblia tlen okitlajtolkuepkej ijkon ken onka hebreo, arameo niman griego. Pero xnochipa ijkon panoua, matikitakan tleka:

•   Nochi tlajtoltin tlamantik ken noijkuilouaj, xsan noijki tlajtoltin kinkuij niman xsan noijki kampa kintlalijtiuej. Samuel Driver, akin melak onomachti hebreo, okijto ika tlajtoltin, “tlamantik ken noijkuilouaj, xsan noijki tlajtoltin kinkuij niman xsan noijki kampa kintlalijtiuej para itlaj kijtoskej”. Nochimej akin tlajtouaj se tlajtojli tlamantik ken tlanemiliaj. Yejua ika, Samuel Driver kijtoua ika “cada tlajtojli kipatlatiuj kampa kintlalia tlajtoltin”.

•   Yeuejkaui, Biblia onoijkuilo ika hebreo, arameo niman griego, pero aman xok onka nion se tlajtojli tlen makinkui san noijki tlajtoltin niman ijkon manoijkuilo. Yejua ika, tla se Biblia kitlajtolkuepaskia ijkon ken onkatkaj yejon tlajtoltin, xmás nasikamatiskia niman hasta ueliskia kiteasikamachiltis itlaj tlen xmelauak.

•   Se tlajtojli uelis nopatlas tlen kijtosneki tla nopatla itech tlen tlajtojtokej.

Onokej seki textos kampa kema uelis notlajtolkuepas ijkon ken onoijkuilo yeuejkaui ika hebreo, arameo niman griego niman noneki melak kuajli noitas.

 Ejemplos tlen amantsin tikimitaskej kiteititiaj tleka kiteasikamachiltiskia tlen xmelauak tla notlajtolkuepaskia ijkon ken yeuejkaui onoijkuilojkaj hebreo, arameo niman griego.

•   Ipan Tlajkuiloltin, tlajtoltin “kochis” niman “tikochis” uelis kijtosnekis ijkuak yakaj yemelak kochi noso ijkuak yakaj noijtoua ika yokoch pampa yomik (Mateo 28:13; Juan 11:11). Ijkuak ipan seki textos kitaskej ika tlajtoua itech mikilistli, akin kitlajtolkuepaj Biblia uelis san kijtoskej mikilistli para nimantsin manasikamati tlenon kijtosneki (1 Corintios 7:39; 15:51; 1 Tesalonicenses 4:13; 2 Pedro 3:4).

•   Ipan Efesios 4:14 apóstol Pablo okintekitilti seki tlajtoltin tlen kijtosnekij “ken tlakamej nauiltiaj ika dados”. Yejuin tlajtoltin kitekitiltiayaj para kiteneuaskej yakaj akin tekajkayauaya ika dados. Pero, tla ijkon notlajtolkuepa, ipan miyek tlajtoltin xnasikamati tlenon kijtosneki. Más kuajli nasikamati tla noijtoua “yejon tlakamej akin kintekitiltiaj trampas niman melak uelij tekajkayauaj”.

•   Tla Romanos 12:11 notlajtolkuepaskia ijkon ken ika griego, noijtoskia: “Ipan espíritu, xkuakualakakan”. Para nasikamatis tlenon kijtosneki, ipan yejuin Biblia ijkin onotlali: “Xkauilikan ika espíritu santo mamechyekana”.

•   Ijkuak Jesús otemachti ipan tepetl, okijto itlaj tlen ijkin notlajtolkuepa: “Dios kintiochiua on yejuan kimatij ika iminalma xkojtik” (Mateo 5:3, Porciones del Antiguo Testamento y El Nuevo Testamento en náhuatl de Guerrero). Ijkuak nikan noijtoua, “iminalma xkojtik”, ipan miyek tlajtoltin xmás nasikamati. Niman ueliskia kiteasikamachiltis ika tlajtojtika intech akin xmás kuajli tlanemiliaj, akin xkojtikej noso xyolchikajkej. Pero Jesús kinekiya kiteititis ika para melauak tiyolpakiskej, noneki tikasikamatiskej ika noneki matechyekana toTajtsin niman xnoneki san tiktejtemoskej tlen tejuamej techpoloua (Lucas 6:20). Kuakon, más kuajli tla ijkin notlajtolkuepa “akin kimatij ika noneki makinpaleui toTajtsin” (Mateo 5:3, Biblia. ITlajtol toTajtsin. Mateo-Apocalipsis).

•   Miyekan, tlajtojli ika griego “celos” noso “chauati”, ika Náhuatl de Guerrero kijtosneki yejon tlen yakaj kimachilia ijkuak kinemilia ika kikajkayaua yakaj akin kixmati noso tenexikolita ipampa tlen kipiyaj oksekimej (Hechos 5:17; Romanos 13:13). Pero,  ika griego yejuin tlajtojli noijki uelis kiteasikamachiltis itlaj tlen kuajli. Se ejemplo, noijki uelis notekitiltis “chauati” noso “celo” para noijtos tlen Jesús niman oksekimej akin kitekichiuiliaj toTajtsin niman kiueyichiuaj kichiuaj pampa kitlasojtlaj (Juan 2:17; 2 Corintios 9:2).

•   Miyekpa, tlajtojli ika griego tlen ipan Mateo 6:17 onotlajtolkuep ken “xmijxami” nopatla tlen kijtosneki. Yejuin tlajtojli uelis kijtosnekis ken itlaj nesi, kenijki onka, tlenon yakaj kimachilia noso uelis okseki kijtosnekis (Mateo 16:3; Hechos 17:26; Judas 16).

Tlen yotikonitakej kiteititia ika tiktlajtolkuepas Biblia, xkijtosneki tla nochiuiyan tiktekitiltis san no yejua tlajtojli para tikteasikamachiltis tlen yeuejkaui onoijkuilo. Yejua ika, akin tlajtolkuepaj noneki kuajli kintlapejpeniskej tlajtoltin para kiteasikamachiltiskej tlen kinekiyaj manasikamati akin okijkuilojkej Biblia. Melak noneki ika akin tlajtolkuepaj matlajkuilokan ijkon ken noijtoua tlajtojli tlen ika tlajtolkueptokej para kuajli manasikamati niman nimantsin maueli makileerokan tlen kitlajtolkuepaj.

Noijki, xkuajli yeskia tla miyekpa kipapatlaj tlen kitlajtolkuepaj. Tla ijkuak yakaj kitlajtolkuepa Biblia san kitlalia tlen yejua kinemilia, uelis kipatlas tlen kinekiya teasikamachiltis tlen yeuejkaui onoijkuilo. Ueliskia kitlalilis tlen xnoneki yas noso ueliskia kikixtilis tlen noneki. Kuakon, maski nimantsin ueli noleeroua se Biblia kampa okitlalijkej tlen kinemiliaj, yejuin kichiua ika akin kileeroua maka makimati tlen yemelak temachtia Biblia.

Yakaj akin tlajtolkuepa ueliskia xkuajli kichiuas itekiyo, tla kitekitiltia tlen okimachtijkej ipan irreligión. Ijkon panoua ika 2 Tesalonicenses 2:3, kampa kijtoua: “Uajnonextis yejon tlakatl akin kixnamiki tlanauatijli niman kipopoloskej”. Sekimej akin tlajtolkuepaj yonoyekankej ika tlen kinmachtiaj ipan inrreligión, niman tlajtojli ika griego tlen kijtosneki tlapopolouilistli yokitlajtolkuepkej ken “miktlan” noso “infierno”.

Akin tlajtolkuepaj noijki noneki kasikamatiskej ika Biblia onoijkuilo ika se tlajtojli tlen nochimej kasikamatiyaj. Kasikamatiyaj akin tokayaj, akin tlajpiayaj niman akin kimajsiyaj michimej (Nehemías 8:8, 12; Hechos 4:13). Kuakon, se Biblia tlen kuajli yokitlajtolkuepkej, kichiua ika nochimej akin kipiyaj kuajli inyolo makasikamatikan. Yejua ika, yejon Biblia kintekitiltia tlajtoltin tlen kuajli kakistij, tlen mojmostla kintekitiltiaj niman tlen nimantsin nasikamatij. Xkintekitiltia tlajtoltin tlen xnochimej kinkuij.

 Ipan seki Biblias tlen kemach yonotlajtolkuepkej yokikixtilijkej itoka toTajtsin, Jehová, maski ipan tlen yeuejkaui onoijkuilo kema uajnestiaya. Miyekej Biblias kipatlaj itoka toTajtsin ika tlajtojli “toTeko”, oksekimej nion xkiteasikamachiltiaj ika toTajtsin kipiya itoka. Matikinteneuakan seki ejemplos: Ipan Juan 17:26 sekimej Biblias kijtouaj ika Jesús ijkin okichiuj oración: “Yonikimititi akinon tejua” niman ipan Juan 17:6 kijtoua: “Akin otinechinmakak ipan yejuin mundo yonikimititi akinon tejua”. Pero más kiteasikamachiltiskia tlen Jesús kijtosnekiya tla ijkin kitlajtolkuepaskiaj: “Yonikimititi motoka” niman “yonikimititi motoka akin otinechinmakak ipan yejuin mundo”.

Kampa peua Biblia. ITlajtol toTajtsin ika inglés ijkin kijtoua: “Ipan yejuin Biblia xtiktlalijtokej tlen tejuamej tiknemiliaj. Desde ijkuak otipejkej niman hasta ijkuak otitlankej, otokojtilijkej titlajtolkuepaskej ijkon ken onka Biblia tlen yeuejkaui onoijkuilo. Ijkon otiktlalijkej kampa otikitakej ika onkatka se tlajtojli ika inglés tlen aman nasikamati niman kampa maka makiyana tlen noneki nasikamatis”. Yejua ika, Comité de Traducción de la Biblia del Nuevo Mundo, onokojtili kintekitiltis tlajtoltin tlen nokixtiaj itech hebreo, arameo niman griego, okitekitilti tlen más manasikamati niman tlen mateasikamachilti tlen melauak. Yejua ika, Biblia. ITlajtol toTajtsin nimantsin ueli kileerouaj niman nochimej uelis kuajli kineltokaskej ika kijtoua tlen melauak (1 Tesalonicenses 2:13).