Xuiya kampa tlen onka ijtik

Xuiya kampa tlen kipiya

 PARTE 5

Xmokuepakan itech “tlajpixki” akin “[kintlajpiya] nemoalmas”

Xmokuepakan itech “tlajpixki” akin “[kintlajpiya] nemoalmas”

¿Kanaj tipanotika itech se noso miyek tlemach tlen noteneua ipan yejuin amatlajkuilojli? Tla kema, xsan tejua ijkon mopan nochiujtika. Miyekej itekipanojkauan toTajtsin, akin onenkej yeuejkaui niman ipan yejuin tonaltin, okixnamijkej noijki yejon tlaueltin. Yejuamej okiselijkej tlapaleuilistli itech Jehová niman ouelkej okixnamijkej tlen ouijtika. Tejua noijki tiuelis.

Jehová mitspaleuis timokuepas itech

 XMATSTO ika Jehová yejua mitspaleuis timokuepas itech. Yejua mitspaleuis mapopoliui ajmantli tlen tikmachilia, tlen omitsyolkoko niman mitspaleuis xpiya motlamachilis chipauak tlen kichiuas xmomachili ika yolseuilistli. Kuakon, tejua oksejpa tiknekis tiktekichiuilis Jehová imiuan itekipanojkauan. Ijkon mopan nochiuas ken akin kichiuaj ken Cristo akin onenkej ipan kachtopa siglo. Pedro, itlatitlankauj Cristo, okijkuilo: “Pampa nenchayajkakistinemiyaj itech iojui ken borreguitos yejuan polijtinemij. Pero aman yonenualajkej itech [...] tlajpixki niman yejuan [kintlajpiya] nemoalmas” (1 Pedro 2:​25).

Timokuepas itech Jehová yejon tlen melak kuajli tikchiuas, ¿tleka? Pampa ijkon melak tikyolpaktis Jehová (Proverbios 27:​11). Ijkon ken tejua tikmati, uelis tikyolpaktiskej toTajtsin Jehová noso tikyolkokoskej ika tlen tikchiuaj. Kema, Jehová xtexchiualtia matiktlasojtlakan niman matiktekichiuilikan (Deuteronomio 30:​19, 20). Se ixtlamatki okijto yejuin: “Iyojlo se tlakatl xueli tlapoui ika kiyauak. San ueli tlapoui ika tlaijtik”. Ijkuak tikueyichiuaj Jehová ika nochi toyojlo niman ika tlasojtlalistli, kentla tiktlapouaj toyojlo ika tlaijtik. Ijkuak ijkon tikchiuaj, tikmakaj se kualtsin tetlayokolijli, pampa tiyolmelaujkanemij itech. Yejon melak kiyolpaktia Jehová. Xtlaj okse tlen uelis techyolpaktis ken tikueyichiuaskej Jehová ken yejua kinamiki (Hechos 20:​35; Apocalipsis [Revelación] 4:​11).

Noijki ijkuak tiuajmokuepas itech Jehová, tikselis miyek tlamachtijli tlen kichikauas motlaneltokil (Mateo 5:3, TNM). Miyekej tlaltikpakchanejkej notlajtoltiaj: “¿Tleka otinemikoj?”. Yejuamej melak kinekij kimatiskej tleka otinemikoj. Tinochimej tiknekij tikmatiskej yejon pampa Jehová ijkon otexchijchiuj. Yejua otexchijchiuj matiktekichiuilikan niman ijkon tipakiskej. Uelis melak kuajli tomachiliskej tla tikmatstokej ika tikueyichiuaj Jehová ika tlasojtlalistli (Salmo 63:​1-5).

Timitstlajtlaniliaj xmatsto ika Jehová kineki xmokuepa itech. ¿Tleka ijkon tikijtouaj? Xtlanemili itech yejuin: Ijkuak opeuj tikyektlaliaj yejuin amatlajkuilojli melak otikchiujkej teoyotl. Sakin, kanaj se tlayekanketl ipan tlanechikojli noso se tokniuj omitsmakak. Kuakon otiknek tikpouas niman tlen kijtoua ajsi ipan moyojlo. Nochi yejuin mitsititia ika Jehová xmitsilkaua. Yejua mitsnotsa oksejpa xmokuepa itech (Juan 6:​44).

Techpaktia tikmatiskej ika Jehová xkeman kimilkaua ijkuak poliuij akin kitekichiuiliaj. Yejon tlen se tokniuj siuatl itoka Donna melak kitlasojkaita. Yejua okijto: “Ika yolik oniktlalkauijtia tlanechikojli, san ika, opeuj nitlanemilia itech tlen kijtoua Salmo 139:​23, 24, kampa kijtoua: ‘Kuajli xnechtlajtlachili, noTajtsin, niman xkixmati noyojlo. Xnechtlajtlachili, niman xkixmati notlanemililuan tlen nechajmanaj. Xkita tla onka nopan se ojtli tlen tetlajyouilti, niman xnechyekana ipan ojtli tlen xkeman tlami’. Nejua onikasikamat ika xkipiaya ika ninemis itech tlen kiyekana Satanás, pampa xkeman kuajli oninomachili, niman kuajli onikasikamat ika nonekiya ninemis ipan ikalpan Jehová. Kuakon, onikitak ika Jehová xkeman onechilkauj. San nonekiya nikmatis kenon ninokuepas itech. ¡Niman aman melak nipaki pampa ijkon onikchiuj!”.

“Onikitak ika Jehová xkeman onechilkauj. San nonekiya nikmatis kenon ninokuepas itech”

Ika nochi toyojlo tikchiuaj teoyotl ika tejua oksejpa xmachili ipakilis Jehová (Nehemías 8:​10). Xmatsto ika nochipa kuajli timomachilis tla oksejpa timokuepas itech Jehová.