Xuiya kampa tlen onka ijtik

Xuiya kampa tlen kipiya

 TLAMACHTIJLI 10

¿Kenon kineki toTajtsin matikueyichiuakan?

¿Kenon kineki toTajtsin matikueyichiuakan?

Tla tiknekij iuan touikaskej toTajtsin, noneki tikueyichiuaskej ken yejua kineki. Jesús okijto ‘on yejuan melauak kinekij kimauistiliskej [noso kiueyichiuaskej] toTajtsinʼ kichiuaskej “ika tlen melauak”. (Juan 4:23, 24). San kipiya kenon tikueyichiuaskej toTajtsin (Efesios 4:4-6). Tlaneltokiltin tlen melajkej teuika kampa xkeman tlamis nemilistli, niman tlaneltokiltin xmelaujkej teuika kampa tlapopolouilistli (Mateo 7:13, 14).

Uelis tikmatiskej akinomej kuajli kiueyichiuaj toTajtsin tla tikimitaj kenon kichiuaj. Akin kiueyichiuaj Jehová ika inyojlo, kipiya ika kuakualtin yeskej ken yejua. Noijki ijkon ken se kuajli tsapokojtli kitemaka kuajli tsapotl, tlaneltokijli tlen melauak, kichiua tlaltikpakchanejkej manochiuakan kuakualtin (Mateo 7:15-20).

Akin iuan nouikaj Jehová sajnoye kitlakaitaj Biblia. Kimatij ika Biblia ualeua itech toTajtsin. Ika on, nokauiliaj makinyekanili iminemilis, makinyektlalili intlaueluan niman makimpaleui kuajli makixmatikan toTajtsin (2 Timoteo 3:16). Noijki ijkon ken tenojnotsaj ijkon kiyejyekoaj kichiuaskej.

 Akin iuan nouikaj Jehová notlasojtlaj se iuan okse. Jesús okiteititi ika kintlasojtlaya tlaltikpakchanejkej ijkuak okiminmachtij itech toTajtsin niman okimpajtij kokoxkej. Akin kuajli kiueyichiuaj toTajtsin noijki kintlasojtlaj oksekimej. Ijkon ken Jesús, xkintlauelitaj akin xkipiyaj tomin, akin tlajtoa okse tlajtojli niman akin chipaujkej. Jesús okijto ika akin kitokaskiaj kimixmatiskiaj ika notlasojtlaskiaj se iuan okse (Juan 13:35).

Akin iuan nouikaj toTajtsin kitlakaitaj itoka: Jehová. Tla yakaj xkineki techtokayotis, ¿ok iuan touikaskiaj? ¡Ka! Ijkuak yakaj iuan touikaj, tiknotsaj ika itoka niman kuajli titlajtoa itech. Ika on, akin iuan nouikaj toTajtsin noneki kikuiskej itoka niman kimintlajtlatouiliskej oksekimej. Jehová kineki ijkon matikchiuakan (Mateo 6:9; Romanos 10:13, 14TNM).

Ken Jesús, akin iuan nouikaj toTajtsin kiminmachtiaj tlaltikpakchanejkej itech iTekiuajyo toTajtsin. ToTajtsin iTekiuajyo, yejon iluikaktekiuajyotl tlen kikuepas in tlaltikpaktli ipan se xochitlalpan. Akin iuan nouikaj toTajtsin kinmachiltiaj oksekimej yejuin kuajli tlajtoltin itech iTekiuajyo toTajtsin (Marcos 13:10).

Iteixpantijkauan Jehová kiyejyekoaj iuan nouikaskej toTajtsin. Kitlakaitaj Biblia niman notlasojtlaj. Noijki kikuij niman kitlakaitaj itoka toTajtsin niman kiminmachtiaj oksekimej itech iTekiuajyo toTajtsin. Aman iteixpantijkauan Jehová kuajli kiueyichiuaj toTajtsin ipan in tlaltikpaktli.