Xuiya kampa tlen onka ijtik

Xuiya kampa tlen kipiya

 TLAMACHTIJLI 13

¿Tlenon inpan nochiuas tlaneltokiltin?

¿Tlenon inpan nochiuas tlaneltokiltin?

1. ¿Kuajli tlen kichiuaj nochimej tlaneltokiltin?

Ipan nochimej tlaneltokiltin nemij akin kichiuaj tlen kuajli. Niman melak kuajli pampa toTajtsin kimitstika niman kintlajpiya. Melak teyolkoko ika sekimej kitekitiltia se tlaneltokijli san ika kichiuaj tlen xkuajli (2 Corintios 4:3, 4; 11:13-15). Kinaman yonomat ika sekimej tlaneltokiltin tlapaleuiyaj kampa kinmiktiaj miyekej tlaltikpakchanejkej, ipan guerras niman kinchiualtiaj kokonej imiuan manotekakan. ¿Melauak tlaneltokaj itech toTajtsin akin kichiuaj yejuin? Xkita Mateo 24:3-5, 11, 12.

Tlaneltokijli melauak kiueyichiua toTajtsin niman xmelauak tlaneltokiltin kixnamikij toTajtsin. Yejuamej tlamachtiaj tlen xkipiya Biblia, kijtouaj tlen xmelauak itech toTajtsin niman tekajkayauaj itech tlen panoua ijkuak timikij. Jehová kineki ika tlaltikpakchanejkej makimatikan tlen melauak itech yejua. Xkita Ezequiel 18:4 niman 1 Timoteo 2:3-5.

2. ¿Tlenon inpan nochiuas tlaneltokiltin?

ToTajtsin xkikajkayauaj tlaneltokiltin ijkuak kijtouaj ika kitlasojtlaj, pampa yejuamej kitlasojtlaj tlen nochiua ipan tlaltikpaktli (Santiago 4:4). ToTajtsin iTlajtol kintokayotia nochimej tlaneltokiltin kentla “Ueyixtika Babilonia”, sakin ijkuak oapachiuilok ipan itonaluan Noé, onkatka se ueyi kalpan kampa opeuj tlaneltokijli xmelauak. Xok uejkauis, toTajtsin kinpopolos xmelauak tlaneltokiltin akin kinkajkayauaj niman kintlajyouiltiaj tlaltikpakchanejkej. Xkita Apocalipsis (Revelación) 17:1, 2, 5, 16, 17 niman 18:8.

San ika, Jehová xkimilkaua tlaltikpakchanejkej yolyemankej akin nemij ipan tlaneltokijli xmelauak. Yejua kinmachtijtika tlaltikpakchanejkej tlen melauak niman kinpaleuijtika makikauakan tlaneltokijli xmelauak. Xkita Miqueas 4:2, 5.

 3. ¿Tlenon noneki kichiuaskej akin yolyemankej?

Tlaneltokijli melauak kichiujtok kuajli manouikakan miyekej tlaltikpakchanejkej

Jehová kintlajpiya akin kuelitaj kichiuaskej tlen melauak niman tlen kuajli. Yejua kineki makixmatikan tlen melauak niman makikajkauakan kichiuaskej tlen xkuajli. Akin kitlasojtlaj toTajtsin kinektokej kikauaskej tlen xkuajli kichiuaj niman ijkon kiyolpaktiskej. Xkita Apocalipsis 18:4.

Ijkuak onenkej kachtopa inomachtijkauan Jesús, tlaltikpakchanejkej akin yolyemankej ika inyojlo okiselijkej ijkuak okimijlikej tlen tlamachtia Biblia. Okipatlakej innemilis ken Jehová kuelita, onenkej ika pakilistli pampa aman kimatstoyaj tlen kichiuaskej ika innemilis niman tlen uelis kiseliskej ika tlayekapan. Yejon techpaleuiya ipan yejuin tonajli pampa yejuamej okineltokakej tlen okimijlikej niman nochipa okichiujkej tlen Jehová kimijliaya. Xkita 1 Tesalonicenses 1:8, 9 niman 2:13.

Jehová kuajli kinselia akin kisaj itech tlaneltokijli xmelauak. Tla tejua tikselia tlen mitsijlia Jehová tikpiyas akin iuan timouikas, kentla yenkuikej mochanejkauan akin kitekichiuiliaj Jehová niman tikselis nemilistli tlen xkeman tlamis. Xkita Marcos 10:29, 30 niman 2 Corintios 6:17, 18.

4. ¿Kenon kichiuas toTajtsin maonia pakilistli ipan tlaltikpaktli?

Jehová kinpopolos xmelauak tlaneltokiltin niman ijkon tinemiskej ika yolseuilistli. Xok itlaj kinkajkayauas tlaltikpakchanejkej niman xok yakaj kinxelos. Nochimej san sekan kiueyichiuaskej akin melauak toTajtsin. Xkita Apocalipsis 18:20, 21 niman 21:3, 4.