1. ¿Kenon opeuj tlen xkuajli?

ToTajtsin yokinkauili tlaltikpakchanejkej matekiuajtikan miyek xiuitl niman ijkon manesi ika xuelij kinyektlaliliaj intlaueluan oksekimej

Opeuj tlen xkuajli ijkuak Satanás okijto kachtopa tlakajkayaualistli. Satanás katka se iluikaktekitketl xtlajtlakole, san ika, okikajkauj ika ‘kijtos on tlen melauak’ (Juan 8:44). Yejua okinek makiueyichiuakan, niman yejon san toTajtsin kinamikiya. Satanás okikajkayauj kachtopa siuatl, Eva, niman ijkon okinekilti maka makitlakamati toTajtsin. Adán noijki xokitlakamat toTajtsin, ijkon ken Eva. Pampa xotetlakamat Adán, okichiuj maonia tlajyouilistli niman mikilistli. Xkita Génesis 3:1-6, 19.

Ijkuak Satanás okinekilti Eva maka makitlakamati toTajtsin, ompa opeuj noijtoua ika toTajtsin akin melak ueyixtika, xkinamiki matechyekana. Satanás iuan melak miyekej tlaltikpakchanejkej xkinekij makinyekana toTajtsin. Ijkon onochiuj, ‘on diablo akin [tlanauatia] ipan in tlaltikpaktli’. Xkita Juan 14:30 niman 1 Juan 5:19.

2. ¿Xkuajli otlachijchiuj toTajtsin?

Nochi tlen toTajtsin kichijchiua melak kuajli. ToTajtsin okinchijchiuj mauelikan makitlakamatikan tlaltikpakchanejkej niman iluikaktekitkej (Deuteronomio 32:4, 5). ToTajtsin otexchijchiuj matiuelikan matiktlapejpenikan tikchiuaskej tlen kuajli noso tlen xkuajli. Yejuin techpaleuiya matikteititikan tla yemelak tiktlasojtlaj toTajtsin. Xkita Santiago 1:13-15 niman 1 Juan 5:3.

3. ¿Tleka tekauilia toTajtsin matlajyouilo noijki ipan yejuin tonaltin?

Yopanok miyek xiuitl niman Jehová yotekauili makijtokan ika yejua xkinamiki matlanauati. ¿Tleka? Pampa ijkon noteititia ika xakaj ueli kuajli tlayekana ipan tlaltikpaktli (Eclesiastés 7:29; 8:9).  Yejuin ijkon nesi, ipan chikuasen mil xiuitl ken yonenkej tlaltikpakchanejkej. Tekiuajkej xueli kichiuaj ika maka sa maonia guerras, kokolistli niman miyek okseki tlemach tlen xkuajli nochiujtika. Xkita Jeremías 10:23 niman Romanos 9:17.

ToTajtsin iTekiuajyo tlamantik noso sejneka pampa kinpaleuiya akin nokauiliaj makinyekana (Isaías 48:17, 18). Xok uejkauis, Jehová kinpopolos nochimej tekiuajkej. San akin nokauiliaj makinyekana iTekiuajyo, nemiskej ipan tlaltikpaktli (Isaías 11:9). Xkita Daniel 2:44.

4. Pampa toTajtsin ok xtlapopoloua, ¿tlenon uelis tikchiuaskej?

Satanás okijto ika itekipanojkauan Jehová kitekichiuiliaj san ika tlen kinmaka. ¿Tikuelitaskia tikteititis ika xmelauak yejuin? ¡Tejua uelis tikchiuas! Pampa toTajtsin ok xtlapopoloua uelis tikteititiskej tla tiknekij matechyekana toTajtsin noso se tlaltikpakchane. Tlen tikchiuaj ipan tonemilis, nesi akinon tiktlakamatij. Xkita Job 1:8-12 niman Proverbios 27:11.

5. ¿Kenon uelis tiktlapejpeniskej matechyekana toTajtsin?

Ika tlen tikchiuaj tikteititiaj tla tiknekij matechyekana toTajtsin

Uelis tikteititiskej ika tiknekij matechyekana tla tomachtiaj ipan Biblia ken toTajtsin kineki matikueyichiuakan (Juan 4:23). Noijki, uelis tikteititiskej ika xtiknekij matechyekana Satanás tla xtokalaktiaj ipan política niman ipan guerras, ken Jesús okichiuj. Xkita Juan 17:14.

Satanás kichiua ika maka matikpiyakan tonemilis chipauak niman matikchiuakan tlen xkuajli. Ijkuak xtikchiuaj yejuin, akin imiuan touikaj noso tochanejkauan kanaj uelis kualaniskej (1 Pedro 4:3, 4). Kuakon noneki matiktlapejpenikan tlenon tikchiuaskej. ¿Tosentlaliskej imiuan akin kitlasojtlaj toTajtsin? ¿Tiktlakamatiskej itlanauatiluan? Tla tikchiuaj ijkon, tikititiaj Satanás ika xmelak tlen okijto, ika xtikchiuaskej tlen kineki toTajtsin ijkuak topan nochiujtika tlen xkuajli. Xkita 1 Corintios 6:9, 10 niman 15:33.

ToTajtsin kintlasojtla tlaltikpakchanejkej, ika yejon, kipopolos tlajyouilistli niman tlen xkuajli. Akin kiteititiaj ika tlaneltokaj itech toTajtsin, nemiskej nochipa ika pakilistli ipan tlaltikpaktli. Xkita Juan 3:16.