1. ¿Onka san se tlaneltokijli melauak?

“Xmotakan sa no nemejuamej intech on tlakajkayajkej.” (MATEO 7:15)

Jesús otemachti san se tlaneltokijli melauak. Kentla se ojtli tlen teuika kampa nemilistli tlen xkeman tlamis. Ijkuak Jesús otlajto itech yejuin ojtli okijto: “Xmiyekej kinextiaj” (Mateo 7:14). ToTajtsin kineki san makiueyichiuakan ijkon ken kijtoua iTlajtol. Nochimej akin yemelak kiueyichiuaj toTajtsin, san se tlaneltokijli kipiyaj. Xkita Juan 4:23, 24; 14:6, niman Efesios 4:4, 5.

2. ¿Tlenon okijto Jesús itech akin xkichiuaskiaj tlen yejua okijto?

“Kijtouaj ika kixmatij Dios, pero ika on tlen kichiuaj kiteititiaj ika xnejli [xmelauak].” (TITO 1:16)

Jesús okijto ika nemiskiaj sekimej akin xtemachtiskiaj tlen melauak. San nesiskia niman san kijtoskiaj ika yemelak kichiuaj ken Cristo. Tejua uelis tikimixmatis akin yemelak kichiuaj ken Cristo. ¿Kenon? Pampa akin yemelak kichiuaj ken Cristo, nesi itech tlen kichiuaj niman kenon nemij. Xkita Mateo 7:13-23.

3. ¿Kenon tikmatiskej akinomej kiueyichiuaj toTajtsin ken noneki?

Matikitakan san makuijli tlemach itech tlen kichiuaj:

  • Kitlakaitaj iTlajtol toTajtsin. Kiyejyekouaj nemiskej ken kijtoua iTlajtol toTajtsin, niman xkineltokaj tlen san tlaltikpakchanejkej kijtouaj (Mateo 15:7-9). Akin yemelak kichiuaj ken Cristo, tenojnotsaj tlen melauak pampa kichiuaj tlen kijtouaj. Xkita Juan 17:17 niman 2 Timoteo 3:16, 17.

  •   Kitlakaitaj itokayo toTajtsin, Jehová. Jesús okiteijli itokayo toTajtsin niman okitlakaitak. Otepaleui makixmatikan toTajtsin niman okinmachti makitlajtlanikan ipan se teoyotl manochipaua itokayo (Mateo 6:9NM). Kampa tichanti, ¿akinomej temachtiaj kenon itoka toTajtsin? Xkita Juan 17:26 niman Romanos 10:13, 14.

  • Tenojnotsaj itech iTekiuajyo toTajtsin. ToTajtsin okuajtitlan Jesús matenojnotsaki itech tlen kualtsin kichiuas iTekiuajyo. San iTekiuajyo toTajtsin uelis kinpaleuis tlaltikpakchanejkej. Jesús nochipa otlajto itech yejon hasta ijkuak omik (Lucas 4:43; 8:1; 23:42, 43). Akin itech tlaneltokaskiaj, okijto ika tenojnotsaskiaj itech yejon. Tla yakaj mitsnojnotsa itech iTekiuajyo toTajtsin, ¿katlejua tlaneltokijli kipiya? Xkita Mateo 24:14.

  • Xkichiuaj tlen xkuajli nochiua ipan tlaltikpaktli. Uelis tikimixmatis pampa yejuamej xnokalaktiaj ipan política nion kampa nouisokilo (Juan 17:16; 18:36). Yejuamej xkichiuaj nion xtlanemiliaj ijkon ken ipan tlaltikpaktli tlemach xkuajli nochiua. Xkita Santiago 4:4.

  • Nochimej notlasojtlaj. Ipan iTlajtol toTajtsin nomachtiaj kenon kintlasojtlaskej oksekimej maski ualeuaj oksekan noso tlajtouaj okse tlajtojli. Sekimej tlaneltokiltin tlapaleuiyaj ipan guerras, san ika, akin yemelak kichiuaj ken Cristo xtlapaleuiyaj ipan guerras (Miqueas 4:1-3). Noijki, akin yemelak kichiuaj ken Cristo kixelouaj seki tonaltin niman intomin pampa kinekij kinpaleuiskej oksekimej. Xkita Juan 13:34, 35 niman 1 Juan 4:20.

4. ¿Kenon uelis tikitas akin kipiyaj melauak tlaneltokijli?

¿Katlejua tlaneltokijli temachtia tlen kijtoua iTlajtol toTajtsin? ¿Katlejua tlaneltokijli kitlakaita itokayo toTajtsin niman teijlia ika san iTekiuajyo uelis kinpaleuis tlaltikpakchanejkej? ¿Akinomej notlasojtlaj niman xnokalaktiaj ipan guerras? ¿Akinomej tiknemilia ijkon kichiuaj? Xkita 1 Juan 3:10-12.