1. ¿Kenon mitspaleuis tla xtijkaua ika timomachtia Biblia?

Tikmatstokej, ika yejuin tlen yotimomachti itech Biblia yomitspaleui xtlasojtla Jehová. Noneki xtijkauas timomachtis niman ijkon noskaltis motlasojtlalis (1 Pedro 2:2). Tla tikneki tinemis nochipa, noneki xtijkauas timomachtis Biblia niman ijkon kuajli timonisiuis itech toTajtsin. Xkita Juan 17:3 niman Judas 21.

Motlaneltokil chikauis tla xtijkaua timomachtia itech toTajtsin. Tla titlaneltoka tikyolpaktis toTajtsin (Hebreos 11:1, 6). Noijki kichiuas ika xmoyolkuepa niman mitspaleuis xpatla ken tinemi. Xkita Hechos 3:19.

2. ¿Kenon uelis tikinpaleuis oksekimej?

Tejua uelis kuajli iuan timouikas Jehová

Tikmatstokej ika tiknekis tikimijlis oksekimej itech tlen yotikasikamat, pampa tinochimej melak techyolpaktia ijkuak tikteijliaj yejuin kualtsin tlajtojli. Tla xtijkaua timomachtia Biblia, uelis tiktekitiltis iTlajtol toTajtsin tlen ika tiktetomilis itech tlen kualtsin techijlia Jehová niman itech tlen tikneltoka. Xkita Romanos 10:13-15.

Miyekej tlaltikpakchanejkej peuaj kimijliaj yejuin kualtsin tlajtoltin akin imiuan nouikaj noso akin ken kimitaj. Yejuamej xkimixkoijliaj oksekimej ika xmelak tlen kineltokaj, teijliaj itech tlen toTajtsin kijtoua kichiuas ika tlayekapan. Noijki, tikmatstokej ika maski oksekimej kikakij tlen tikimijliaj, yejuamej san kitaj tlen tikchiuaj. Xkita 2 Timoteo 2:24, 25.

3. ¿Kenon uelis kuajli iuan timouikas Jehová?

Timomachtis iTlajtol toTajtsin mitspaleuis tikyolpaktis Jehová. Ika yolik uelis kuajli iuan timouikas. Ipan yejuin tonaltin uelis mitsitas ken se ichanejkauj. Xkita 2 Corintios 6:18.

 4. ¿Kenon uelis noskaltijtias motlaneltokil?

Maka xkajkaua xmomachti niman ijkon uelis tikasikamatis iTlajtol toTajtsin (Hebreos 5:13, 14). Xkijli se iteixpantijkauj Jehová mamitsmachti itech Biblia ika amoxtli ¿Tlenon melauak temachtia Biblia? Melak kuajli tinemis ipan monemilis tla xtijkaua timomachtia itech iTlajtol toTajtsin. Xkita Salmo 1:1-3 niman 73:27, 28.

Biblia kipiya “kualtsin tlajtoltin tlen ualeuaj itech toTajtsin akin paktika” (1 Timoteo 1:11NM). Uelis tiknisiuis toTajtsin tla tikinnisiuiya itekipanojkauan (Hebreos 10:24, 25). Tejua uelis tikselis nemilistli tlen xkeman tlamis tla timokojtilia tikyolpaktis toTajtsin. Xuelis tikchiuas okse tlemach melak kuajli ken tikixmatis toTajtsin. Xkita 1 Timoteo 6:19.