Xuiya kampa tlen onka ijtik

Xuiya kampa tlen kipiya

 TLAMACHTIJLI 3

¿Yemelak toTajtsin techijlia yejuin kualtsin tlajtojli?

¿Yemelak toTajtsin techijlia yejuin kualtsin tlajtojli?

1. ¿Akinon okichijchiuj Biblia?

Ipan Biblia toTajtsin techijlia yejuin kualtsin tlajtojli: tlaltikpakchanejkej nemiskej nochipa ipan tlaltikpaktli (Salmo 37:29). Biblia kipiya 66 amoxtsitsintin. ToTajtsin okintekitilti 40 tlakamej makijkuilokan Biblia. Kipiya kanaj tres mil quinientos xiuitl ijkuak Moisés okijkuilo kachtopa makuijli amoxtli. Niman kipiya ipantsin mil novecientos xiuitl ijkuak Juan okijkuilo amoxtli tlen ika ontlami Biblia. ¿Akinon itlanemililuan okitlalijkej ipan Biblia akin otlajkuilojkej? ToTajtsin ika iespíritu santo okimijli tlen kinekiya makijkuilokan ipan Biblia (2 Samuel 23:2). Yejuamej xokijkuilojkej tlen kinemiliayaj, okijkuilojkej toTajtsin itlanemililuan. Kuakon, Jehová yejua akin okichijchiuj Biblia. Xkita 2 Timoteo 3:16 niman 2 Pedro 1:20, 21.

Xkita video ¿Akinon okichijchiuj Biblia?

2. ¿Kenon tikmatij ika melauak tlen kijtoua Biblia?

Biblia kijtoua nochi kenon panos ika tlayekapan, ika yejon tikmatij ika ualeua itech toTajtsin, pampa xakaj ueli kichiua yejuin (Josué 23:14). San toTajtsin akin ueyixtika ueli kimati tlenon panos ika tlayekapan. Xkita Isaías 42:9 niman 46:10.

Biblia tlamantik noso sejneka itech oksekimej amoxtin, pampa ualeua itech toTajtsin. Biblia noxeloua ika miyek tlajtoltin niman nokixtiaj melak miyek copias. Maski melak youejkauj onoijkuilo, kijtoua tlen ixtlamatkej kemach yokinextijkej. Noijki, 40 tlakamej akin otlajkuilojkej nochipa onotlajtolnamijkej. * Ipan Biblia nesi itlasojtlalis toTajtsin, Niman ipan yejuin tonaltin ok ueli kinpaleuiya tlaltikpakchanejkej makipatlakan ken nemij. Ika yejuin, melak miyekej kineltokaj ika Biblia yemelak iTlajtol toTajtsin. Xkita 1 Tesalonicenses 2:13.

Xkita video ¿Kenon tikmatij ika melauak tlen kijtoua Biblia?

 3. ¿Itech tlenon tlajtoua Biblia?

Biblia tlajtoua itech tlen kualtsin toTajtsin kineki kichiuas ipampa tlaltikpakchanejkej. Kijtoua kenon tlaltikpakchanejkej akin kachtopa onenkej, xok okinkauilijkej manemikan ipan se kualtsin tlajli kampa ueliskiaj nemiskiaj nochipa, niman noijki kijtoua kenon yejon kualtsin tlajli oksejpa onias. Xkita Apocalipsis (Revelación) 21:4, 5.

Noijki, toTajtsin iTlajtol kipiya tlanauatiltin, tlajtoltin tlen teyekanaj niman tlajtolpaleuilistin. Ipan Biblia techijlia kenon toTajtsin imiuan onouikak tlaltikpakchanejkej, niman yejuin temachtia kenon yemelak toTajtsin. Kuakon, Biblia uelis mitspaleuis xkixmati toTajtsin, niman tikasikamatis kenon uelis iuan timouikas. Xkita Salmo 19:7, 11; Santiago 2:23, niman 4:8.

4. ¿Kenon uelis tikasikamatiskej Biblia?

Jesús kijtouaya se texto tlen uajlauj ipan Biblia niman teijliaya tlen kijtosneki, ijkon oteajsikamachiltij tlen onka ipan iTlajtol toTajtsin. Yejuin amatlajkuilojli noijki ijkon mitspaleuis xkasikamati tlen onka ipan Biblia. Xkita Lucas 24:27, 45.

Tikmatstokej ika melak mitspaktis tikmatis itech yejuin kualtsin tlajtojli tlen toTajtsin techijlia. San ika, sekimej xkinekij kikakiskej niman oksekimej hasta kinkualania. Maka xkauili yejuin mamitstelti. Tla tejua tikixmati toTajtsin uelis tinemis nochipa ika pakilistli. Xkita Juan 17:3.

 

^ párr. 3 Xkita amatlajkuilojli Biblia ¿tlenon techijlia?