Xuiya kampa tlen onka ijtik

Xuiya kampa tlen kipiya

 TLAMACHTIJLI 4

¿Akinon Jesucristo?

¿Akinon Jesucristo?

1. ¿Kenon onemiko Jesús?

¿Tlenon kichiuaya makinisiuikan Jesús? (MATEO 11:29; MARCOS 10:13-16)

Jesús onen ken se iluikaktekitketl ijkuak xiuajnemiya ipan tlaltikpaktli (Juan 8:23). ToTajtsin kachtopa okichijchiuj Jesús niman sakin okipaleui okichijchiujkej okseki tlemach. Xakaj okipaleui Jehová ijkuak okichijchiuj Jesús, ika yejon, kitokayotiaj ‘isentekonetsin’ toTajtsin (Juan 1:14). Ijkuak Jehová kinekiya itlaj kimijlis oksekimej, Jesús akin ipampa tlajtouaya, ika yejon kitokayotiaj “Tlajtojli”. Xkita Proverbios 8:22, 23, 30 niman Colosenses 1:15, 16.

2. ¿Tleka ouajla Jesús ipan tlaltikpaktli?

ToTajtsin okuajtitlan iKoneuj ipan tlaltikpaktli. Okuajtlali inemilis ijtik se ichpochtli judía itoka María. Kuakon, Jesús xokipix se tlaltikpakchane ken itaj (Lucas 1:30-35). Jesús ouajla ipan tlaltikpaktli ipampa yejuin: 1) otechmachtiko tlen melauak itech toTajtsin, 2) otechititiko kenon uelis tikchiuaskej tlen toTajtsin kineki maski kemantika titlajyouiyaj niman 3) okitemakako inemilis tlen xkipiaya tlajtlakojli kentla se “tlaxtlauijli”. Xkita Mateo 20:28.

3. ¿Tleka noneki se tlaxtlauijli?

Ijkuak kichtekij se tlaltikpakchane, notlajtlani manotlaxtlaua tla xkinekij itlaj makichiuilikan (Éxodo 21:29, 30). ToTajtsin xkinekiya ika tlaltikpakchanejkej mamikikan noso maueuentsintiakan. ¿Kenon tikmatij yejuin? Pampa toTajtsin okijli kachtopa tlakatl, Adán, ika tla kichiuaya tlen Biblia kitokayotia “tlajtlakojli” mikiskia. Kuakon tla Adán xtlajtlakoskia, xkeman mikiskia (Génesis 2:16, 17; 5:5). Biblia kijtoua ika onka mikilistli ipan tlaltikpaktli ipampa Adán. Ijkon, Adán okinpanoltili nochimej ikoneuan tlajtlakojli niman mikilistli. Ika  yejon, noneki yakaj matlatlaxtlaua niman ijkon matechmakixti itech mikilistli tlen Adán otechpanoltili. Xkita Romanos 5:12 niman 6:23.

¿Akinon ueliskia tlatlaxtlauas niman ijkon matechmakixti itech mikilistli? Ijkuak timikij, tiktlaxtlauaj totlajtlakoluan. Nion se tlaltikpakchane tlajtlakole xuelis kitlaxtlauas intlajtlakoluan oksekimej. Xkita Salmo 49:7-9.

4. ¿Tleka omik Jesús?

Jesús xkipiaya tlajtlakojli ken tejuamej. Xnonekiya mamiki ipampa itlajtlakoluan, pampa yejua xkeman otlajtlako. Jesús omik ipampa intlajtlakoluan oksekimej. ToTajtsin okiteititi ueyi tlasojtlalistli ijkuak okuajtitlan iKoneuj mamikiki topampa. Jesús noijki okiteititi tlasojtlalistli ijkuak okitlakamat itaj niman okitemakak inemilis topampa. Xkita Juan 3:16 niman Romanos 5:18, 19.

Xkita video ¿Tleka omik Jesús?

5. ¿Tlenon kichiujtika Jesús aman?

Ipan tlaltikpaktli, Jesús okinpajti kokoxkej ,okinyoliti akin yomijkaj niman okinpaleui akin tlajyouiayaj. Ijkon okiteititi tlen kichiuas ika tlayekapan inpampa akin tetlakamatij (Mateo 15:30, 31; Juan 5:28). Sakin ijkuak Jesús omik, toTajtsin okiyoliti niman oksejpa oyaj iluikak (Efesios 1:20). Jesús otlamachiak iyekmakopa toTajtsin hasta ijkuak okikauilijkej matekiuajti ipan nochi tlaltikpaktli (Hebreos 10:12, 13). Aman Jesús tekiuajtitika iluikak niman akin itech tlaneltokaj kitekakistiliaj yejuin kualtsin tlajtojli ipan nochiuiyan tlaltikpaktli. Xkita Daniel 7:13, 14 niman Mateo 24:14.

Xok uejkauis, Jesús peuas tlanauatis kentla tekiuaj, kipopolos nochi tlajyouilistli niman akin tetlajyouiltiaj. Nochimej akin tlaneltokaj itech Jesús niman tetlakamatij, nemiskej ika pakilistli ipan se kualtsin tlajli. Xkita Salmo 37:9-11.