Xuiya kampa tlen onka ijtik

Xuiya kampa tlen kipiya

 APÉNDICE

Kenon se uelis kiteltis maka sa manomajmatoka

Kenon se uelis kiteltis maka sa manomajmatoka

ToTajtsin xkuelita ijkuak yakaj kipiya ken vicio nomajmatokas, pampa kichiua ika se nochipa san itech matlanemili niman kijtlakoua itlamachilis. * Akin kichiuaj yejuin uelis kimitaskej tlaltikpakchanejkej san kentla auiltin, san kentla akin imiuan auilnemiskej niman tlen ika melak noyolpaktiskej. Xok kinemiliaj ika ijkuak notekaj iuan imixnamik ijkon kititiaj ika kitlasojtlaj, aman san kitaj ken itlaj tlen ika noyolpaktiskej achijtsin niman kichiuaskej tlen kileuiyaj. San ika, nochi yejon san panoua. Tlen melauak, ijkuak se nomajmatoka xkiteltia ileuilistli tlen kichiua maauilnemi niman makichiua tlen tsokuiltik; yejuin san kichiua makineki auilnemis (Colosenses 3:5).

Pablo, itlatitlankauj Cristo, okijkuilo: “Notlajsojkaikniuan, [...] ma tikxelokan itech totlalnakayo niman [toespíritu] nochi on tlen techijtlakoua. Niman ma kuajli titoyolchipauakan pampa tikmakajsij [toTajtsin]” (2 Corintios 7:1). Sekimej kitaj ika melak ouijtika chipaujkanemiskej. San ika, kema uelis kichiuaskej pampa Jehová nochipa “nimantsin tetlapopoluiya ” niman kinpaleuis (Salmo 86:5; Lucas 11:9-13). Kemantika uelis oksejpa ompa onuetsiskej. San ika, ijkuak kinmajmana tlen yokichiujkej niman nochikauaj kikauaskej yejon vicio, kiteititiaj ika kinekij kichiuaskej tlen kuajli. Maka matikilkauakan ika “Dios más nochi kimati xken toyojlo, niman yejua nochi kimati” (1 Juan 3:20). Ijkuak yejua techita xtlanemilia itech totlajtlakoluan, kita nochi tokualneskayouan. Pampa yejua kuajli kimati kenon tinemij, techiknelia ijkuak ika nochi toyojlo tiktlajtlaniliaj matechititi tlasojtlalistli. Ika yejon, nochipa matiknotsakan ika yolyemanilistli, ijkon ken se konetsintli nonisiuiya itech itaj ijkuak kineki makipaleui. Kema, Jehová uelis kichipauas totlamachilis (Salmo 51:1-12, 17; Isaías 1:18).  San ika, xsan noneki tikchiuaskej teoyotl; noneki tikchiuaskej ijkon ken tiktlajtlanij. Nesis ika tiknekij tikchiuaskej yejon ijkuak tikmapeuaj nochi tlemach tlen kichiua matiauilnemikan niman ijkuak xtouikaj imiuan akin techijtlakoskej. *

Tla se ouijtika kita kikauas ika nomajmatoka, noneki tlajtos iuan itaj noso inan akin maiteixpantijkauj Jehová, noso iuan se tokniuj akin kuajli iuan nouika niman makineki mamitspaleui (Proverbios 1:8, 9; 1 Tesalonicenses 5:14; Tito 2:3-5). *

^ párr. 1 Kijtosneki, ijkuak se iselti kimajmatoka ikouj noso imaxak, hasta kimachilis noyolpaktia kentla yakaj iuan notekatok.

^ párr. 2 Miyekej kitaj kuajli tla kitlaliaj computadora kampa nochimej uelis kitaskej, ijkon kuajli kitekitiltiaj. Oksekimej kitaj kuajli tla kitlaliliaj seki programas tlen xkinkauilia makitakan tlemach tlen xkuajli. San ika, matikilnamikikan ika xonka nion se programa tlen nochipa makitsakuili tlen xkuajli.

^ párr. 1 Noijki uajlauj kenon tijkauas timomajmatokas ipan ¡Despertad! de noviembre de 2006 itech “Los jóvenes preguntan... ¿Cómo puedo superar este hábito?” niman ipan amoxtli Lo que los jóvenes preguntan. Respuestas prácticas, volumen 1, páginas 178-182.