Xuiya kampa tlen onka ijtik

Xuiya kampa tlen kipiya

 APÉNDICE

Kenon tikitaskej se akin kikixtiaj ipan tlanechikojli

Kenon tikitaskej se akin kikixtiaj ipan tlanechikojli

Xonka itlaj tlen melak teyolkoko ken ijkuak se tochanejkauj noso se akin iuan touikaj kikixtiaj ipan tlanechikojli pampa xnoyolkuepa itech itlajtlakoluan. ToTajtsin iTlajtol kijtoua kenon tikimitaskej akin kinkixtiaj ipan tlanechikojli. Tlen tikchiuaskej, kiteititis tla melauak tiktlasojtlaj toTajtsin iuan itlanauatiluan. * Ika yejon, matikitakan seki tlen uelis panos.

¿Kenon noneki tikitaskej se akin kikixtia ipan tlanechikojli? Biblia kijtoua: “Ma ka iuan xmonelokan on yejuan noteneua kineltoka Cristo, pero nemi ipan auilnemilistli, noso sanoyej tlajtlamach kinoyaxkatisneki, noso kinyekteneua on tlamachijchiutin itajtsitsiuan, noso tetejteneua, noso tlauani, noso tlachteki. Nion siquiera iuan xtlakuakan on yejuan ijkon kichiua” (1 Corintios 5:11). Noijki techmelajkaijlia ika akin “kitlalkauia on itemachtil Cristo [...], ma ka xselikan nemochan, nion ma ka xtlajpalokan, pampa yejuan kitlajpalos no nochiuas ken iteuikal  ika on tlen xkuajli kichiua” (2 Juan 9-11). Akin kikixtiaj itech tlanechikojli, xok iuan tosentlaliaj nion xok iuan titlajtouaj itech tlen tikneltokaj. La Atalaya del 15 de noviembre de 1981, ipan página 19, kijtoua: “Maski tla san tiktlajpaloua, uelis ijkon peuas iuan timonotsas niman kanaj hasta uelis iuan timouikas. ¿Tiknekiskiaj peuas tikchiuaskej yejuin iuan akin yokikixtijkej itech tlanechikojli?”.

¿Melak noneki maka imiuan matosentlalikan? Kema. Matikitakan tleka. Kachtopa pampa melak tiktlasojtlaj toTajtsin niman iTlajtol. Ika yejon, nochipa tiknekij tiktlakamatiskej, maski ijkuak melak ouijtika. Noijki kuajli tikmatstokej ika yejua yolmelaujki niman tetlasojtla. Nochi itlanauatiluan techpaleuiyaj kuajli matinemikan (Isaías 48:17; 1 Juan 5:3). Ika ome, akin kichiua tlajtlakojli niman xnoyolkuepa uelis techijtlakos. Ika yejon, ijkuak xiuan tosentlaliaj, xkijtlakoua tonemilis niman itech ken iuan touikaj toTajtsin. Ijkon tikchiuaj kuajli matlajtokan itech  tlanechikojli niman maonia chipauak (1 Corintios 5:6, 7). Ika yeyi, ijkuak kikixtiaj itech tlanechikojli uelis kipaleuis. ¿Kenon? Tla tikchiuaj ken kijtouaj tlajtolyekanalistin niman tikpaleuiyaj tlen yokijtokej grupo ika tlayekankej, kanaj uelis tikchiuaskej manoyolkuepa akin hasta aman xkiselia intlapaleuilis tlayekankej. Kema, tla ijkon tikchiuaj uelis tikchiuaskej manoyolyemani niman makipatla ken tlanemilia. Ijkuak kitas ika xok kualtsin imiuan nouika ichanejkauan, kanaj peuas tlanemilis niman kasikamatis ika melak ueyi tlajtlakojli tlen okichiuj niman ijkon peuas nokuepas itech Jehová (Lucas 15:17).

¿Niman tla akin kikixtiaj ipan tlanechikojli se tochanejkauj? Ijkuak akin kikixtiaj se tochanejkauj, tikteititiaj tla melauak tiktlasojtlaj itlanauatiluan Jehová. Ijkuak ijkon panoua, ¿kenon noneki tikitaskej? Maski xuelis nochi tikijtoskej nikan, titlajtoskej san itech ome tlen panoua.

Kemantika, se tekoneuj noso se tajtli akin chantij san sekan, kikixtiaj ipan tlanechikojli. Niman pampa ok ichanejkauj, uelis iuan nosentlaliskej niman kichiuaskej seki tekitl iuan yejua. San ika, tla kitlasojtlaj Jehová, xok uelis iuan kiueyichiuaskej toTajtsin, pampa yejua xok imiuan kitekichiuilia. Ijkuak ichanejkauan kiueyichiuaskej toTajtsin ken familia, kanaj uelis kikauiliskej imiuan ompa manemi, san ika, san tlakaktos. Aman, tla se ok konetl, itajuan uelis kimachtiskej itech Biblia pampa yejuamej ok kipiya ika kimachtiskej niman kiyektlaliskej (Proverbios 6:20-22; 29:17). *

Aman, ¿tla akin okikixtijkej xok chanti iuan ichanejkauan? Kuakon, yejuamej xok sa nochipa iuan nosentlaliskej, sa ijkuak melak noneki itlaj kitaskej san sekan. Xkitejtemouaj kenon iuan nosentlaliskej. Pampa melak kitlasojtlaj Jehová iuan ikalpan, kichiuaj tlen tlanauatia Biblia. Kinekij tlen kuajli itech inchanejkauj, niman tla kitlakamatij toTajtsin, uelis kipaleuiskej (Hebreos 12:11). *

^ párr. 1 Tlajtolyekanalistin tlen tlajtouaj itech se akin kikixtiaj ipan tlanechikojli noijki notekitiltiaj ijkuak sekimej xok kinekij nemiskej ipan tlanechikojli.

^ párr. 2 Tla tikneki tikmatis okseki itech kenon kimitaskej ijkuak akin kinkixtiaj ok kokonej niman chantij iuan ichanejkauan, xkita ipan La Atalaya del 1 de octubre de 2001, páginas 16, 17, niman del 15 de noviembre de 1988, página 20.

^ párr. 3 Tla tikneki tikmatis okseki itech kenon noneki tikimitaskej tochanejkauan akin kinkixtiaj ipan tlanechikojli, xkita La Atalaya del 15 de abril de 1988, páginas 26-31, niman del 15 de noviembre de 1981, páginas 20-25.