Xuiya kampa tlen onka ijtik

Xuiya kampa tlen kipiya

 SECCIÓN 5

ToTajtsin kiteochiua Abrahán niman ikoneuan

ToTajtsin kiteochiua Abrahán niman ikoneuan

Ikoneuan Abrahán nomiyekiliaj niman peuaj kipiyaj miyek tlen kuajli. ToTajtsin kitlajpiya José ijkuak onen Egipto

JEHOVÁ kimatstoya ika yejkoskia tonajli ijkuak iKoneuj akin melak kitlasojtla kitemakaskia inemilis. Ijkon teasikamachiltiaya Génesis 3:15. Pampa kinekiya tlaltikpakchanejkej makasikamatikan kenon kiyolkokoskia imikilis, toTajtsin okichiuj manoijkuilo ipan Biblia tlen opanok ijkuak okitlajtlanili Abrahán makiuentlali ikoneuj Isaac akin melak kitlasojtlaya.

Maka matikilkauakan ika Temakixtijketl tlen toTajtsin yokijtoka uajlaskia, uajnemiskia itech Isaac. Abrahán kineltokaya ika nochiuaskia yejon tlajtojli niman tla nonekiskia toTajtsin oksejpa kiyolitiskia ikoneuj. Ijkon okitlakamat niman okuikak kampa kiuentlaliskia. Ijkuak sa achijtsin poliuiya niman kimiktiskia, Jehová okuajtitlan se iluikaktekitketl niman okitelti. Sakin Jehová okiyolchikauj pampa ueyi katka itlaneltokil niman oksejpa okijli ika kema kichiuaskia tlen yokijlika.

Opanokej xiujtin, niman Isaac okipix ome ikoneuj: Esaú niman Jacob. Itech yejon omemej, san Jacob akin okitlasojkaitak nochi tlen ualeuaya itech toTajtsin, niman okiteochiujkej. ToTajtsin okitokayopatlak niman okitlalili Israel, niman majtlaktli iuan ome uejueyimej familias oualeujkej itech ikoneuan. San ika, ¿kenon melak onomiyekilijkej?

Nochi opeuj ijkuak ikniuan José akin yakatstiuej opeujkej kinexikolitaj. Kuakon okinemakakej kentla tlakeuajli. Akin okikoujkej okuikakej Egipto, kampa melak ouijtika tlen okixnamik. ToTajtsin okipaleui yejuin telpochtli yolchikauak akin xkeman kikauaya niman oyejkok tonajli, ijkuak faraón okimakak se ueyi tekitl. Ijkon ouel okinpaleui ichanejkauan ijkuak otlan tlakuajli, kuakon Jacob okintitlan sekimej ikoneuan mauiyan Egipto makikouatij tlakuajli. ¿Akinon imak kipiaya tlakuajli? ¡José! Melak opajkej ijkuak oksejpa onosentlalijkej José iuan ikniuan —akin melak noyolkokouayaj ika tlen yokichiujkaj— José okintlapopolui niman otlanauati makintejtemotij oksekimej ichanejkauan. Faraón okiminmakak tlaltin tlen melak tlatlakitiayaj, niman ompa ichanejkauan onomiyekilijkej niman okipixkej miyek tlen kuajli. José okasikamat ika Jehová okichiujka ijkon mapano niman ijkon manochiua tlen yokijtoka.

Jacob onen Egipto iuan ichanejkauan akin kintlasojtlaya, hasta ijkuak omik. Ijkuak imikiskia, okijto ika Temakixtijketl akin onoijto uajlaskia, yeskia se tekiuaj tlen kipiyaskia kojtilistli niman uajnemiskia itech ikoneuj Judá. Opanokej xiujtin niman José okijto ika toTajtsin kinkixtiskia itech Egipto ichanejkauan Jacob.

(Onokixti itech Génesis itlaxeloluan uejueyimej 20 ontlami 50 niman itech Hebreos 11:17-22.)