Xuiya kampa tlen onka ijtik

Xuiya kampa tlen kipiya

Historia 74: Se tlakatl akin xnomojtia

Historia 74: Se tlakatl akin xnomojtia

XKIMITA tlaltikpakchanejkej akin kiuejuetskilijtokej yejuin telpochtli. ¿Tikmatstika akinon yejua? Itoka Jeremías, se ueyixtika iteotlajtokauj toTajtsin.

Tlaltikpakchanejkej kiuejuetskilijtokej Jeremías

Ijkuak tekiuaj Josías yopeujka kinxaxamania tajtsitsintin ipan país, Jehová okijli Jeremías manochiua Iteotlajtokauj. San ika, Jeremías kinemilia ika xuelis nochiuas teotlajtoketl pampa san telpochtli katka. Kuakon Jehová kijlia ika kipaleuis.

Jeremías kimijlia israelitas makikajkauakan tlen xkuajli kichiuaj. ‘Tajtsitsintin akin tlaltikpakchanejkej kinueyichiuaj xtepaleuijkej’, kijtoua. San ika, miyekej israelitas kinekij kinueyichiuaskej tajtsitsintin niman xkinekij kiueyichiuaskej akin melauak toTajtsin, Jehová. Ijkuak Jeremías kimijlia ika toTajtsin kintlajyouiltis, israelitas kiuejuetskiliaj.

Panouaj miyek xiujtin. Josías miki, niman yeyi metstli sakin, ikoneuj Jehoiaquim kitlaliaj kentla tekiuaj. Jeremías ok kimijlia israelitas: ‘Jerusalén kipopoloskej tla nemejuamej xnemopatlaj’. Teopixkej kasij Jeremías niman tsajtsij: ‘Jeremías kipiya ika mikis; xkuajli yotlajto itech toueyikalpan’.

¿Aman tlenon kichiuas Jeremías? ¡Yejua xnomojtia! Kimijlia nochimej: ‘Jehová onechajtitlan manimechijliki yejuin. Tla xnenkipatlaj nemonemilis, yejua kipopolos Jerusalén. Niman xmatstokan yejuin: Tla ninechmiktiaj, nenkimiktiskej se tlakatl akin xtlaj mexchiuilia’.

Tlanauatijkej xokimiktijkej Jeremías, san ika, israelitas xonoyolpatlakej. Sakin, uajlauj Nabucodonosor, akin tekiuajti ipan Babilonia, niman kimixnamiki akin chantij Jerusalén. Nabucodonosor kinmasi israelitas niman nochiuaj itlakeualuan. Melak miyekej kinuikaj Babilonia. ¡Xnemili kenon tikmachiliskia tla mitsuikaskia ipan okse país tlen xtikixmati!

Jeremías 1:1-8; 10:1-5; 26:1-16; 2 Reyes 24:1-17.



Tlajtoltilistin

  • ¿Akinon yejon telpochtli akin nesi ipan tlaixkopinajli?
  • ¿Tlenon kinemilia Jeremías ijkuak okijlikej manokuepa teotlajtoketl, niman tlenon okijli Jehová?
  • ¿Tlenon kimijliaya Jeremías nochimej israelitas?
  • ¿Kenon kiyejyekouaj teopixkej kiteltiskej Jeremías, niman kenon yejua teititia ika xnomojtia?
  • ¿Tlenon inpan nochiua israelitas pampa xonoyolpatlakej?

Okseki tlajtoltilistin

  • Xpoua Jeremías 1:1-8.

    Ken otikitakej itech Jeremías, ¿tlenon noneki niman ijkon tikchiuaskej itekiyo Jehová? (2 Cor. 3:5, 6).

    ¿Kenon kinyolchikaua telpokamej akin kichiuaj ken Cristo, ijkuak kitaj ineskayo Jeremías? (Ecl. 12:1; 1 Tim. 4:12).

  • Xpoua Jeremías 10:1-5.

    ¿Tlen neskayotl kitekitiltia Jeremías, tlen ika kiteititia ika xkipiyaj intlamachilis akin tlaneltokaj itech tajtsitsintin? (Jer. 10:5; Isa. 46:7; Hab. 2:19).

  • Xpoua Jeremías 26:1-16.

    Ijkuak tenojnotsaj itech tlen nochiuas ika tlayekapan, ¿kenon tetlakamatij akin tlamachiaj yaskej iluikak, itlanauatil Jehová tlen okimakak Jeremías ijkuak okijli ‘maka makikixti nion se tlajtojli’? (Jer. 26:2; Deu. 4:2; Hech. 20:27).

    ¿Kenon okintlalili Jeremías se kuajli neskayotl iteixpantijkauan Jehová, ijkuak tenojnotsaj ipan nochi tlaltikpaktli itech tlen Jehová kichiuas? (Jer. 26:8, 12, 14, 15; 2 Tim. 4:1-5, NM).

  • Xpoua 2 Reyes 24:1-17.

    ¿Tlenon ipan onochiuj Judá, pampa xoyolmelaujkanen itech Jehová? (2 Rey. 24:2-4, 14).