Xuiya kampa tlen onka ijtik

Xuiya kampa tlen kipiya

Historia 73: Sa se kuajli tekiuaj ipan Israel

Historia 73: Sa se kuajli tekiuaj ipan Israel

JOSÍAS kipiya chikueyi xiuitl ijkuak peua tekiuajti itech ome uejueyimej familias israelitas akin onochantijkej tlatsintlan. San ika, yejua xueli peua tlanauatia pampa melak pitentsin. Ika yejon, sekimej tlaltikpakchanejkej akin yeuejueyimej okipaleuijkej matlayekana.

Ijkuak Josías yotekiuajtika chikome xiuitl, peua kitejtemoua Jehová. Kichiua ken akin kuajli otekiuajtikej kentla David, Jehosafat niman Ezequías. Ijkuak yejua ok telpochtsintli, kichiua tlen ika kiteititia ika yolchikauak.

Tekiuaj Josías iuan itlapaleuijkauan kinxaxamanijtokej tajtsitsintin.

Ouejkauj onenkej miyekej israelitas akin xkuakualtin katkaj. Kinueyichiuaj tajtsitsintin niman notlakuanketsaj itech. Kuakon Josías iuan itlapaleuijkauan kinkixtiaj tajtsitsintin ipan yejon país. Yejuin ueyi tekitl, pampa miyekej israelitas kinueyichiuaj tajtsitsintin. Nikan uelis tikitas Josías iuan itlapaleuijkauan kinxaxamanijtokej.

Sakin, Josías kinauatia yeyimej tlakamej makiyektlalikan iteopan Jehová. Nosentlalia tomin itech nochi israelitas niman kintlaxtlauiliaj tlakamej, tekitl tlen kichiuaj. Ijkuak yejuamej tekitij ipan teopan, ueyi teopixki Hilquías kinextia ompa tlen melak tlasojti: amatl tlen yopoliujka, kampa okinauatijkaj Moisés makijkuilo itlanauatiluan Jehová.

Ijkuak kitkiliaj Josías yejuin amatl, tlanauatia makipouilikan. Ijkuak kikaki, Josías okimat ika israelitas xkitlakamatstoyaj itlanauatiluan Jehová. Yejua melak noyolkokoua, ika yejon notlakenkojkotona, ken nikan tikita. Niman kijtoua: ‘Jehová kualantika touan pampa totajuan xokitlakamatkej tlanauatiltin tlen ijkuiliujtokej ipan yejuin amatl’.

Safán niman tekiuaj Josías

Josías kinauatia ueyi teopixki Hilquías matetlajtolti tlen Jehová kichiuilis ikalpan. Hilquías yauj itech se siuatl teotlajtoketl itoka Huldá, niman kitlajtoltia. Huldá kijlia itlajtol Jehová niman ijkon makijliti Josías: ‘Jerusalén niman nochimej israelitas tlajyouiskej pampa yokiueyichiujkej tajtsitsintin niman ika ipan tlaltikpaktli nochiua tlen xkuajli. San ika, pampa tejua, Josías, yotikchiuj tlen kuajli, yejuin tlajyouilistli nochiuas tla tejua yotimik’.

2 Crónicas 34:1-28.



Tlajtoltilistin

  • ¿Kech xiuitl kipiya Josías ijkuak kitlaliaj kentla tekiuaj, niman tlenon peua kichiua ijkuak yotekiuajtika chikome xiuitl?
  • ¿Tlenon kichiujtika Josías ipan kachtopa tlaixkopinajli?
  • ¿Tlenon kinextia ueyi teopixki ijkuak kiyektlalijtoyaj teopan?
  • ¿Tleka notlakenkojkotona Josías?
  • ¿Tlenon Jehová okijli se siuatl teotlajtoketl akin itoka Huldá, makijliti Josías?

Okseki tlajtoltilistin

  • Xpoua 2 Crónicas 34:1-28.

    ¿Kenon Josías se kuajli neskayotl intech akin otlajyouijkej ijkuak kokonej katkaj? (2 Cró. 33:21-25; 34:1, 2; Sal. 27:10).

    ¿Tlenon okichiuj Josías niman ijkon opeuj noueyichiua toTajtsin ken noneki, ijkuak yejua kuikaya chikueyi xiuitl, doce niman dieciocho xiuitl ika tekiuajtitoya? (2 Cró. 34:3, 8).

    ¿Tlenon tiuelij itech tekiuaj Josías niman ueyi teopixki Hilquías ika noneki matitlayektlalikan kampa tikueyichiuaj toTajtsin? (2 Cró. 34:9-13; Pro. 11:14; 1 Cor. 10:31).