Xuiya kampa tlen onka ijtik

Xuiya kampa tlen kipiya

Historia 71: ToTajtsin kijtoua ika tlaltikpaktli kikuepas xochitlalpan

Historia 71: ToTajtsin kijtoua ika tlaltikpaktli kikuepas xochitlalpan

YEJUIN se tlaixkopinajli itech se xochitlalpan tlen toTajtsin okititi teotlajtoketl Isaías. Yejua otlakat ijkuak Jonás yomijka.

Tlaltikpakchanejkej ipan xochitlalpan

Xochitlalpan kijtosneki “tlajli kampa tlakualtsinkan”. ¿Tlenon mitstlalnamiktia yejuin? Kema, yejon kualtsin xochitlalpan tlen toTajtsin okinchijchiuilij Adán iuan Eva, ¿xmelak? San ika, ¿ijkon yes ipan nochiuiyan tlaltikpaktli?

Jehová okijli iteotlajtokauj Isaías makijkuilo itech yenkuik xochitlalpan tlen kimakas ikalpan. Okijto: ‘Koyomej niman borreguitos san sekan nemiskej. Uakaxkokonej niman leontsitsintin tlakuaskej san sekan, niman san kokonej kintlajpiyaskej. Nion konetsintli akin nauiltis kampa nemi kouatl tlen tekua niman temiktia, xtlaj kichiuilis’.

Kanaj miyekej kinemiliaj: ‘Yejuin xkeman nochiuas. Nochipa onka tlajyouilistli ipan tlaltikpaktli, niman nochipa onias’. Xnemili, ¿kenon katka kampa toTajtsin okintlali Adán iuan Eva?

ToTajtsin okintlali Adán iuan Eva ipan se xochitlalpan. Pampa xokitlakamatkej toTajtsin okinkixtijkej kampa chantiyaj, oueuentsintiakej niman omijkej. ToTajtsin kijtoua ika akin kitlasojtlaj, kinmakas tlen Adán iuan Eva okipolojkej.

Ipan yenkuik xochitlalpan xakaj tetlajyouiltis nion xakaj tlaijtlakos. Yemelak onias yolseuilistli. Nochimej tlaltikpakchanejkej chikaujkej yeskej niman pakiskej ken toTajtsin kinekiya mapano. Sakin, tiueliskej kenon toTajtsin kichiuas yejuin.

Isaías 11:6-9; Apocalipsis 21:3, 4.



Tlajtoltilistin

  • ¿Akinon katka Isaías, kemanon onen, niman tlenon Jehová okititi Isaías?
  • Tlenon kijtosneki tlajtojli xochitlalpan, niman tlenon techtlalnamiktia?
  • ¿Tlenon Jehová okijli Isaías makijkuilo itech yenkuik Xochitlalpan?
  • ¿Tleka Adán iuan Eva okinkixtijkej kampa melak kualtsin chantiyaj?
  • ¿Tlenon kijtoua Jehová kinmakas akin kitlasojtlaj?

Okseki tlajtoltilistin

  • Xpoua Isaías 11:6-9.

    ¿Tlenon kijtoua iTlajtol toTajtsin itech kenon nemiskej tlaltikpakchanejkej iuan yolkamej ipan yenkuik tlaltikpaktli? (Sal. 148:10, 13; Isa. 65:25; Eze. 34:25).

    ¿Kenon nochiujtika ipan ikalpan toTajtsin tlen okijkuilo Isaías? (Rom. 12:2; Efe. 4:23, 24).

    ¿Akinon noneki matikueyichiuakan pampa tlaltikpakchanejkej aman kipatlatokej intlanemililuan niman ipan yenkuik tlaltikpaktli noijki kichiuaskej? (Isa. 48:17, 18; Gál. 5:22, 23; Fili. 4:7).

  • Xpoua Apocalipsis 21:3, 4.

    ¿Kenon kijtoua Biblia, ika ijkuak tlajtoua itech toTajtsin nemis imiuan tlaltikpakchanejkej, xkijtosneki tla yemelak yejua nemis ipan tlaltikpaktli? (Lev. 26:11, 12; 2 Cró. 6:18; Isa. 66:1; Apo. 21:2, 3, 22-24).

    ¿Tlenon kijtosneki ijkuak Biblia kijtoua ika popoliuis chokistli niman tlajyouilistli? (Luc. 8:49-52; Rom. 8:21, 22; Apo. 21:4).