Xuiya kampa tlen onka ijtik

Xuiya kampa tlen kipiya

Historia 69: Ichpochtsintli kipaleuiya se ueyixtika tlakatl

Historia 69: Ichpochtsintli kipaleuiya se ueyixtika tlakatl

¿TIKMATSTIKA tlenon kijtotika yejuin ichpochtsintli? Kinojnotsa yejon siuatl itech Eliseo, iteotlajtokauj Jehová niman itech kenon Jehová kipaleuiya makichiua tlen melak kuajli. Yejuin siuatl xtlaj kimati itech Jehová, pampa xisraelita. Matikitakan tleka ichpochtsintli nemi ichan yejuin siuatl.

Yejon siuatl chanej Siria. Iueuentsin itoka Naamán yejua kinyekana miyekej soldados. Sirios yokasikej yejuin ichpochtsintli israelita, niman aman tekiti kentla itlakeual isiuauj Naamán.

Isiuauj Naamán niman itlakeual ichpochtsintli

Naamán kipiya se kokolistli itoka lepra. Yejuin kokolistli kichiua mapalani inakayo. Yejuin tlen ichpochtsintli kijtotika: ‘Tla noteko ueliskia yas itech iteotlajtokauj Jehová akin nemi Israel, yejua kipajtiskia itech ikokolis’. Sakin, yejuin siuatl kijlia iueuentsin.

Naamán kineki pajtis; kuakon yauj ipan kalpan Israel. Ijkuak ompa ajsi, yauj ichan Eliseo. Eliseo kinauatia itlapaleuijkauj makijli Naamán manalti chikometipan ipan atentli Jordán. Naamán melak kualani, niman kijlia: ‘¡¿Xkualtsitsintin nochi atentli tlen onka ipan nopaís maka ken se atentli ipan Israel?!’ Ijkuak okijto yejuin, nokuepa.

San ika, itlakeualuan kijliaj: ‘Noteko, tla Eliseo mitsijliskia tlen ouijtika, tikchiuaskia. Kuakon, ¿tleka xuelis timaltis, ken yejua okijto?’ Naamán kikaki itlakeual niman naltia chikometipan ipan atentli Jordán. ¡Ijkuak kichiua yejuin, chipaui inakayo niman pajti!

Naamán melak paki. Oksejpa yauj kampa nemi Eliseo niman kijlia: ‘Aman kuajli nikmatstika ika inTajtsin israelitas san yejua toTajtsin melauak ipan nochi tlaltikpaktli. Ika yejon, nimitstlajtlanilia, xseli yejuin tetlayokolijli’. San ika, Eliseo kijlia: ‘Ka, xnikselis’. Eliseo kimatstika ika xkuajli tla kiselis tetlayokolijli, pampa Jehová yejua akin yemelak okipajti Naamán. San ika, Guehazí itlakeual Eliseo kineki kinotlatkitis yejon tetlayokolijli.

Kuakon kichiua yejuin. Ijkuak Naamán yauj, Guehazí notlaloua niman konajsi. ‘Eliseo onechajtitlan manimitsijliki san seki xmaka itech yejon tetlayokolijli pampa kineki kinmakas sekimej akin okitlajpalokoj’, kijtoua. Yejon se tlakajkayaualistli. San ika, Naamán xkimati; kuakon kimaka Guehazí seki tlemach.

Ijkuak Guehazí nokuepa, Eliseo kimati tlen okichiuj pampa Jehová yokijli. Kuakon kijlia: ‘Pampa yotikchiuj yejuin tlen xkuajli, kokolistli lepra tlen kipiaya Naamán, aman tejua tikpiyas’. ¡Nimantsin ijkon panoua!

¿Tlenon tiuelij itech nochi yejuin? Kachtopa, ken ichpochtsintli matitlajtokan itech Jehová. Yejuin melak tepaleui. Ika ome, xtoueyinekiskej ken Naamán okichiuj, noneki tikintlakamatiskej itekipanojkauan Jehová. Niman ika yeyi, xtitekajkayauaskej ken Guehazí. ¿Xmelak ika tiuelij miyek ijkuak tikpouaj Biblia?

2 Reyes 5:1-27.



Tlajtoltilistin

  • Ipan tlaixkopinajli, ¿tlenon kijlitika ichpochtsintli yejuin siuatl?
  • ¿Akinon yejuin siuatl akin nesi ipan tlaixkopinajli, niman tleka nemi ichpochtsintli ichan?
  • ¿Tlenon Eliseo okinauati itlapaleuijkauj makijliti Naamán, niman tleka kualani Naamán?
  • ¿Tlenon panoua ijkuak Naamán kinkaki itlapaleuijkauan?
  • ¿Tleka Eliseo xkiselilia itetlayokolil Naamán, san ika, tlenon kichiua Guehazí?
  • ¿Tlenon ipan nochiua Guehazí niman tlenon techmachtia itech tlen ipan onochiuj?

Okseki tlajtoltilistin

  • Xpoua 2 Reyes 5:1-27.

    ¿Kenon uelis kinyolchikauas telpokamej, ineskayo ichpochtsintli israelita? (2 Rey. 5:3; Sal. 8:2; 148:12, 13).

    ¿Tleka melak kuajli matikilnamikikan Naamán, ijkuak techtlajtolpaleuiskej ika Biblia? (2 Rey. 5:15; Heb. 12:5, 6; Sant. 4:6).

    ¿Tlenon tiuelij itech tlen okichiuj Eliseo niman itech tlen okichiuj Guehazí? (2 Rey. 5:9, 10, 14-16, 20; Mat. 10:8; Hech. 5:1-5; 2 Cor. 2:17).