Xuiya kampa tlen onka ijtik

Xuiya kampa tlen kipiya

Historia 68: Omemej telpokatsitsintin yoliuij

Historia 68: Omemej telpokatsitsintin yoliuij

TLA timikiskia, ¿tlenon kimachiliskia monan tla tejua oksejpa tiyoliuiskia? ¡Yejua melak pakiskia! San ika, ¿uelis oksejpa yoliuis akin yomik? ¿Ijkon yopanoka?

Xkita tlakatl ipan tlaixkopinajli, siuatl niman telpokatsin. Yejon tlakatl yejua teotlajtoketl Elías. Yejuin siuatl, se siuakauajli akin chanti Sarepta, niman telpokatsin yejua ikoneuj. Se tonajli ikoneuj peua kualo. Melak tlanaui niman miki. Kuakon Elías kijlia siuatl: ‘Xnechmaka mokoneuj’.

Elías iuan siuakauajli niman ikoneuj akin okiyolitijkej

Elías kuika telpokatsin akin yomik niman kitlalia ipan tlapechtli. Niman kichiua se teoyotl: ‘Oh Jehová xchiua yejuin telpokatsin oksejpa mayoliui’. ¡Niman telpokatsin peua nijyotia! Kuakon Elías kuajtemoltia niman kijlia siuatl: ‘¡Xkita, mokoneuj yoltika!’ Yejon melak kipaktia.

Okse ueyixtika iteotlajtokauj Jehová, itoka Eliseo. Yejua kipaleuiya Elías. Ika tlayekapan Jehová noijki kikauilia Eliseo makichiua milagros. Se tonajli yejua yauj ipan ueyikalpan itoka Sunem, niman se siuatl melak kuajli kiselia. Sakin, yejuin siuatl kipiya se ikoneuj.

Se tonajli ika kualkan, ijkuak yejon telpokatsin yonoskaltijka, yauj kampa tekititika itaj, ipan tepetl. Yejua tsajtsi: ‘¡Nechkokoua notsontekon!’ Ijkuak kuikaj ichan, miki. ¡Melak noyolkokoua inan! Nimantsin yauj kontejtemoua Eliseo.

Ijkuak yejko Eliseo, kalaki ipan cuarto iuan telpokatsin akin yomik. Kichiuilia teoyotl Jehová, niman kinapaloua mijkatsintli. Nimantsin totonia inakayo telpokatsin, niman yekxoua chikometipan. ¡Melak paki inan ijkuak kalaki niman kita ika yoltika!

Melak miyekej tlaltikpakchanejkej yomijkej. Yejuin kiyolkokoua inchanejkauan niman akin imiuan nouikaj. Tejuamej xueli tikinyolitiaj akin yomijkej. San ika, Jehová kema. Sakin, tikitaskej kenon yejua oksejpa kiyolitis melak miyekej tlaltikpakchanejkej.

1 Reyes 17:8-24; 2 Reyes 4:8-37.


Tlajtoltilistin

  • ¿Akinomej yejon yeyimej akin nesij ipan tlaixkopinajli, niman tlenon ipan nochiua telpokatsin?
  • ¿Tlenon kitlajtlani Elías ipan teoyotl ipampa telpokatsin, niman tlenon panoua?
  • ¿Kenon itoka itlapaleuijkauj Elías?
  • ¿Tleka kijliaj Eliseo mauiya ichan se siuatl akin chanti Sunem?
  • ¿Tlenon kichiua Eliseo, niman tlenon ipan nochiua yejon telpokatsin akin yomik?
  • Itech tlen okichiujkej Elías niman Eliseo, ¿tlenon techmachtia itech ikojtilis Jehová?

Okseki tlajtoltilistin

  • Xpoua 1 Reyes 17:8-24.

    ¿Kenon okitlatlatakej itetlakamatilis niman itlaneltokilis Elías? (1 Rey. 17:9; 19:1-4, 10).

    ¿Tleka melak nomojkaita itlaneltokil siuakauajli akin chanti Sarepta? (1 Rey. 17:12-16; Luc. 4:25, 26).

    Itech tlen okijto Jesús ipan Mateo 10:41, 42, ¿kenon nesi ika yemelak tlen ipan onochiuj siuakauajli akin chanti Sarepta? (1 Rey. 17:10-12, 17, 23, 24).

  • Xpoua 2 Reyes 4:8-37.

    ¿Tlenon techmachtia tlen okichiuj siuatl chanej Sunem, itech kenon titeseliskej? (2 Rey. 4:8; Luc. 6:38; Rom. 12:13; 1 Juan 3:17).

    ¿Tlenon kuajli uelis tikchiuaskej iuan nochimej akin kitekipanouaj toTajtsin ipan yejuin tonajli? (Hech. 20:35; 28:1, 2; Gál. 6:9, 10; Heb. 6:10).