Xuiya kampa tlen onka ijtik

Xuiya kampa tlen kipiya

Historia 65: Tekiuajyotl notlajkoxeloua

Historia 65: Tekiuajyotl notlajkoxeloua

¿TIKMATSTIKA tleka yejuin tlakatl kikojkotontika tlakentli? Jehová okijli makichiua. Yejuin tlakatl itoka Ahíya iteotlajtokauj toTajtsin. ¿Tikmatstika akinon kitokayotiaj teotlajtoketl? Yakaj akin toTajtsin kijlia tlenon panos ika tlayekapan.

Ahíya iuan Jeroboán

Ahíya tlajtotika nikan iuan Jeroboán. Jeroboán se tlakatl akin chikauak otekipano itech Salomón. Ijkuak Ahíya nonextia iuan Jeroboán nikan ipan ojtli, kichiua itlaj tlen xnasikamati. Nokixtilia itlaken yenkuik, kikojkotona niman kikixtia 12 tlakentsitsintin. Kijlia Jeroboán: ‘Xkitki majtlaktli’. ¿Tikmatstika tleka kimaka Jeroboán majtlaktli tlakentsitsintin?

Ahíya kijtoua ika, Jehová kikuilis itekiuajyo Salomón. Niman ika toTajtsin kimakas Jeroboán majtlaktli uejueyimej familias. Yejuin kijtosneki ika Rehoboam, ikoneuj Salomón kiyekanas san ome uejueyimej familias.

Ijkuak Salomón kikaki tlenon Ahíya okijli Jeroboán, melak kualani. Kineki kimiktis Jeroboán, san ika, yejua choloua niman yauj Egipto. Sakin, Salomón miki. Otekiuajtik 40 xiuitl, aman ikoneuj akin itoka Rehoboam, peua tekiuajti. Jeroboán akin nemi Egipto kitekakilia ika Salomón yomik, kuakon oksejpa yauj ipan kalpan Israel.

Rehoboam xkuajli kenon tekiuajti. Salomón yokichiujka tlen xkuajli, san ika, ikoneuj ok melak tetlajyouiltia. Jeroboán niman oksekimej tlakamej uejueyixtokej konitaj Rehoboam niman kijliaj kuajli matekiuajti. San ika, yejua xkinkaki. Hasta kichiua tlen melak xkuajli. Ika yejon, israelitas kitlaliaj Jeroboán matekiuajti itech majtlaktli uejueyimej familias, san ika, ome uejueyimej familias, Benjamín niman Judá, ok kipiyaj Rehoboam kentla intekiuaj.

Jeroboán xkineki ikalpan mauiya Jerusalén, makiueyichiuatij Jehová ipan iteopan. Ika yejon, kichijchiua ome uakaxkonetl ika oro, niman kinchiualtia majtlaktli uejueyimej familias, makinueyichiuakan. Nimantsin ipan nochi país nochiua tlen xkuajli niman peuaj tlajyouiyaj.

Noijki onka tlauejli ipan tekiuajyotl kampa nemij ome uejueyimej familias. Ijkuak Rehoboam kitlaliaj kentla tekiuaj, xopanok makuijli xiuitl niman akin tekiuajti Egipto kixnamiki Jerusalén. Kitki miyek tlen patioj onka ipan iteopan Jehová. Kuakon teopan xuejkaui ijkon ken ijkuak kachtopa okichijchiujkaj.

1 Reyes 11:26-43; 12:1-33; 14:21-31.



Tlajtoltilistin

  • ¿Akinomej yejon tlakamej akin nesij ipan tlaixkopinajli, niman kenon intoka?
  • ¿Tlenon kichiua Ahíya ika itlaken, niman tlenon kijtosneki yejuin?
  • ¿Tlenon Salomón kineki kichiuilis Jeroboán?
  • ¿Tleka majtlaktli uejueyimej familias kitlaliaj Jeroboán kentla intekiuaj?
  • ¿Tleka Jeroboán kichijchiua ome uakaxkonetl ika oro, niman tlenon nimantsin panoua?
  • ¿Tlenon inpan nochiua ome uejueyimej familias niman iteopan Jehová tlen onka ipan Jerusalén?

Okseki tlajtoltilistin

  • Xpoua 1 Reyes 11:26-43.

    ¿Kenon katka Jeroboán, niman tlenon Jehová okijli kichiuas tla kitlakamati Itlanauatiluan? (1 Rey. 11:28, 38).

  • Xpoua 1 Reyes 12:1-33.

    ¿Tlenon uelij tajtin niman tlayekankej ipan tlanechikojli, itech Rehoboam ijkuak xkuajli kitekitiltiaj intlanauatijkayo? (1 Rey. 12:13; Ecl. 7:7; 1 Ped. 5:2, 3).

    ¿ Akinon itech yaskej telpokamej niman ijkon kinpaleuiskej makitlapejpenikan tlen kichiuaskej ipan innemilis? (1 Rey. 12:6, 7; Pro. 1:8, 9; 2 Tim. 3:16, 17; Heb. 13:7).

    ¿Tleka Jeroboán ojkan okitlali kampa kinueyichiuaskej uakaxkokonej, niman kenon okiteititi yejuin ika xotlaneltokak itech Jehová? (1 Rey. 11:37; 12:26-28).

    ¿Akinon okinyekan majtlaktli uejueyimej familias, ijkuak xok okichiujkej tlen toTajtsin kinekiya? (1 Rey. 12:32, 33).