Xuiya kampa tlen onka ijtik

Xuiya kampa tlen kipiya

Historia 62: Onka tlajyouilistli ichan David

Historia 62: Onka tlajyouilistli ichan David

SAKIN, ijkuak David peua tlanauatia Jerusalén, Jehová kichiua miyekpa matetlanikan isoldados David. Jehová yokimijlika israelitas ika kinmakas tlajli tlen onka Canaán. Niman aman, ika itlapaleuilis Jehová, nochi tlajli tlen yokimijlika kinmakas notlatkitiaj.

David kuajli tekiuajti. Yejua kitlasojtla Jehová. Ika yejon, ijkuak notlatkitiaj Jerusalén, nimantsin kitlaliaj caja tlen tetlalnamiktia tlajtolkaualistli. Yejua kineki kichijchiuas se teopan kampa kitlalis yejuin caja.

Panouaj seki xiujtin, kuakon David kichiua se ueyi tlajtlakojli. Yejua kimatstika ika xkuajli tla titekuilis tlen xmotlatki. San ika, se yeuajli, ijkuak nemiya ikuatipan ikal, ontlachia tlatsintlan niman kita se kualtsin siuatl. Itoka Bat-seba, niman iueuentsin itoka Urías, yejua se isoldado David.

David melak kuelita Bat-seba niman tlanauatia makanilitij. Iueuentsin uejka nemi, tlaixnamiki ipan guerra. Kuakon, David iuan noteka niman sakin kimati ika yejua kipiyas se ikoneuj. David melak notekipachoua niman kinauatia Joab akin kinyekana soldados, makitlali Urías tlayekapan ipan guerra niman ijkon makimiktikan. Ijkuak Urías miki, David nonamiktia iuan Bat-seba.

David melak kikualania Jehová. Kititlanilia Natán makinojnotsati itech itlajtlakoluan. Uelis tikitas Natán iuan David nikan. David melak noyolkokoua itech tlen yokichiuj niman Jehová xkimiktia. San ika, kijlia: ‘Pampa yotikchiuj yejuin tlen xkuajli, melak miyek onias tlajyouilistli mochan’. ¡Niman melak tlajyouiya David!

Natán kitlajtolpaleuitika David

Kachtopa, ikoneuj Bat-seba miki. Ikoneuj David akin itoka Amnón kichiua ikniuj Tamar iuan manoteka. Pampa Absalón ikoneuj David melak kualani, kimiktia Amnón. Sakin, melak miyekej tlaltikpakchanejkej kitokaj Absalón niman kitlaliaj kentla tekiuaj. Kuakon David kitlani Absalón ipan guerra niman Absalón miki. Kema, David melak tlajyouiya.

Ijkuak panoua nochi yejuin, Bat-seba kitlakatilia okse ikoneuj itoka Salomón. Ijkuak David youeuentsintiaka niman yokokoxkatika, ikoneuj Adonías kiyejyekoua tekiuajtis. Kuakon David kinauatia teopixki Sadoc, makitoyauili tlen chiauak ipan itsontekon ikoneuj Salomón, niman ijkon nesi ika yejua tekiuaj yes. Xuejkaujtipan David miki ijkuak kipiya 70 xiuitl. Otlayekan 40 xiuitl. Aman Salomón yejua tekiuaj.

2 Samuel 11:1-27; 12:1-18; 1 Reyes 1:1-48.



Tlajtoltilistin

  • Ika itlapaleuilis Jehová, ¿tlenon ipan nochiua Canaán?
  • ¿Tlenon panoua ijkuak David nemi ikuatipan ikal?
  • ¿Tleka David melak kikualania Jehová?
  • ¿Akinon yejon tlakatl tlen nesi ipan tlaixkopinajli akin Jehová kititlani makinojnotsati David itech itlajtlakoluan, niman tlenon kijtoua ipan nochiuas David?
  • ¿Tlenon tlajyouilistin kipiya David?
  • Ijkuak David miki, ¿akinon tekiuajti ipan Israel?

Okseki tlajtoltilistin

  • Xpoua 2 Samuel 11:1-27.

    ¿Kenon techpaleuiya tla melak titekitij itech tlen Jehová kineki?

    ¿Kenon David okiyoltilan kichiuas se tlajtlakojli, niman kenon techpaleuiya akin tiktekichiuiliaj Jehová ipan yejuin tonajli, ijkuak tikitaj tlen ipan onochiuj David? (2 Sam. 11:2; Mat. 5:27-29; 1 Cor. 10:12; Sant. 1:14, 15).

  • Xpoua 2 Samuel 12:1-18.

    ¿Tlenon uelij tlayekankej niman tajtin, itech kenon Natán okinojnots David? (2 Sam. 12:1-4; Pro. 12:18; Mat. 13:34).

    ¿Tleka Jehová okikneli David? (2 Sam. 12:13; Sal. 32:5; 2 Cor. 7:9, 10).