Xuiya kampa tlen onka ijtik

Xuiya kampa tlen kipiya

Historia 70: Jonás niman ueyi michin

Historia 70: Jonás niman ueyi michin

XKITA tlakatl akin nemi ijtik atl. Melak xkuajli tlen ipan nochiua, ¿xmelak? ¡Yejon ueyi michin kitolos! ¿Tikmatstika akinon yejuin tlakatl? Itoka Jonás. Matikitakan tleka nokalaktia ipan miyek tlauejli.

Jonás se iteotlajtokauj Jehová. Sakin, ijkuak teotlajtoketl Eliseo yomijka, Jehová kinauatia Jonás: ‘Xuiya ipan ueyikalpan Nínive. Xkinnojnotsati tlaltikpakchanejkej itech tlen xkuajli kichiujtokej’.

Jonás niman ueyi michin

San ika, Jonás xkineki yas. Kuakon otlejkok ipan se barco tlen xiaya Nínive. Jehová xkuelita ika Jonás choloua. Ika yejon, kichiua mapano se ueyi ajakakiyaujtli. Pampa melak ajakakiyauiya, barco kineki apolakis. Akin tekitij ipan barco melak nomojtiaj, niman kintsajtsiliaj intajtsitsinuan makinpaleuikan.

Kuakon Jonás kimijlia: ‘Nejua nikueyichiua Jehová, toTajtsin akin okichijchiuj iluikak niman tlaltikpaktli. Nicholojtika itech tekitl tlen Jehová onechijli manikchiua’. Akin tekitij ipan barco kitlajtoltiaj: ‘¿Tlenon timitschiuiliskej niman ijkon uelis noteltis ajakakiyaujtli?’

‘Xnechontlajkalikan ipan mar niman noteltis’, kijtoua Jonás. Akin tekitij ipan barco xkinekij kichiuaskej yejuin, san ika, ijkuak melak chikauak ajakakiyaui, kontlajkalij Jonás ijtik mar. Kuakon ajakakiyaujtli noteltia, niman mar xok koxoni.

Ijkuak Jonás polaki ijtik mar, se ueyi michin kitoloua. San ika, yejua xmiki. Yeyi tonajli niman yeyi yeuajli nemi ijtik ueyi michin. Jonás melak noyolkokoua pampa xokitlakamat Jehová niman xoyaj Nínive. Ika yejon, ¿Tikmatstika tlenon kichiua?

Jonás kichiuilia teoyotl Jehová niman kitlajtlanilia makipaleui. Kuakon Jehová kichiua ika yejon ueyi michin makisotla ipan tlajli. Sakin, Jonás yauj Nínive. ¿Xtechmachtia yejuin ika melak noneki matiktlakamatikan Jehová ipan nochi tlen technauatia?

Jonás, tlaxeloltin uejueyimej 1 ontlami ipan 4.



Tlajtoltilistin

  • ¿Akinon katka Jonás, niman tlenon kinauatia Jehová makichiua?
  • Pampa xkineki yas kampa kititlani Jehová, ¿tlenon kichiua Jonás?
  • ¿Tlenon Jonás kimijlia makichiuakan akin tekitij ipan barco, niman ijkon manotelti ajakakiyaujtli?
  • Ken nesi ipan tlaixkopinajli, ¿tlenon panoua ijkuak Jonás kontlajkalij ipan atl?
  • ¿Kech uejkaui Jonás ijtik ueyi michin, niman tlenon kichiua ijkuak ompa nemi?
  • ¿Kanon yauj Jonás ijkuak kisa itech ueyi michin, niman tlenon techmachtia yejuin?

Okseki tlajtoltilistin

  • Xpoua Jonás 1:1-17.

    ¿Tlenon kimachiliaya Jonás ijkuak okititlankej makinnojnotsati ninivitas? (Jon. 1:2, 3; Pro. 3:7; Ecl. 8:12).

  • Xpoua Jonás 2:1, 2, 10.

    Itech tlen ipan onochiuj Jonás, ¿tleka uelis tikneltokaskej ika Jehová kinankilis toteoyouan? (Sal. 22:24; 34:6; 1 Juan 5:14).

  • Xpoua Jonás 3:1-10.

    ¿Kenon techyolchikaua ijkuak tikmatij ika Jehová okimakak Jonás okseki tekitl maski kachtopa xokitlakamat? (Sal. 103:14; 1 Ped. 5:10).

    Pampa Jonás xkuajli tlanemiliaya itech ninivitas, ¿kenon noneki tikimitaskej akin tikinnojnotsaj? (Jon. 3:6-9; Ecl. 11:6; Hech. 13:48).