Xuiya kampa tlen onka ijtik

Xuiya kampa tlen kipiya

Historia 56: Saúl kachtopa tekiuaj ipan Israel

Historia 56: Saúl kachtopa tekiuaj ipan Israel
Samuel kitlapejpenijtika Saúl kentla tekiuaj

XKITA Samuel kenon kitoyauilijtika tlen chiauak ipan itsontekon se tlakatl. Yejuin tlen kichiuayaj, kiteititia ika yakaj okitlapejpenijkej kentla tekiuaj. Jehová kijlia Samuel makitoyauili tlen chiauak ipan itsontekon Saúl. Yejuin tlen chiauak melak ajuiyak.

Saúl kinemiliaya ika yejua xuelis kuajli tekiuajtis. ‘Nejua niualeua itech ifamilia Benjamín, akin achijtsitsintin itech Israel’, kijlia Samuel. ‘¿Tleka tikijtoua ika nitekiuaj yes?’ Jehová kiyolpaktia tlen kijtoua Saúl, pampa xnoueyimati. Ika yejon, kitlapejpenia kentla tekiuaj.

Xuelis tikijtoskej tla Saúl xkipiaya tomin nion tla xuejkapan katka. Ichanejkauan kipiyaj miyek tomin, yejua melak kualtsin niman uejkapan. ¡Nochimej israelitas san ikechpan ajsiyaj! Saúl noijki melak kuajli notlaloua niman chikauak. Israelitas melak pakij ika Jehová yokitlapejpeni Saúl kentla tekiuaj. Nochimej peuaj tsajtsij: ‘¡Uejkaujtipan manemi totekiuaj!’

Akin kintlauelitaj israelitas ok melak miyekej. Xuejkaujtipan panoua ijkuak kitlaliaj Saúl kentla tekiuaj, amonitas yauej niman kimixnamikij israelitas. San ika, Saúl kinsentlalia melak miyekej soldados, niman kintlanij amonitas. Nochimej israelitas pakij pampa kipiyaj Saúl kentla tekiuaj.

Panoua xiujtin, Saúl tlayekana niman kichiua matetlanikan israelitas ipan miyek guerras. Saúl noijki kipiya se ikoneuj yolchikauak, itoka Jonatán. Niman Jonatán kinpaleuiya israelitas miyekpa matetlanikan. Filisteos ok melak kintlauelitaj israelitas. Se tonajli, melak miyek filisteos uajlauej, kinualixnamikij israelitas.

Samuel kijlia Saúl makichia pampa kiuentlalilis Jehová. Samuel melak uejkaui. Saúl nomojtia tla filisteos inpan uajlaskej niman tla peuas kimixnamikiskej, kuakon yejua kitemaka yejon uentli. Ijkuak Samuel yejko, kijlia Saúl ika xotetlakamat. ‘Jehová kitlapejpenis okse tekiuaj ipan Israel’, kijtoua Samuel.

Sakin, Saúl oksejpa xtetlakamati. Samuel kijlia: ‘Jehová melak kiyolpaktia ijkuak kitlakamatij, maka ken ijkuak kitlayokoliaj se borrego tomauak. Pampa xotiktlakamat Jehová, yejua xok mitskauilis xtekiuajti ipan Israel’.

Itech yejuin tiuelij ika melak noneki nochipa matiktlakamatikan Jehová. Noijki, techititia ika akin yolkuajli, ken Saúl, uelis nokuepas xkuajli. ¡Maka keman ijkon topan manochiua! ¿Xmelak?

1 Samuel, tlaxeloltin uejueyimej 9 ontlami ipan 11; 1 Samuel 13:5-14; 14:47-52; 15:1-35; 2 Samuel 1:23.



Tlajtoltilistin

  • ¿Tlenon nesi ipan tlaixkopinajli kichiujtika Samuel, niman tleka?
  • ¿Tleka Saúl kiyolpaktia Jehová, niman kenon itlanemilil Saúl?
  • ¿Kenon itoka ikoneuj Saúl, niman tlenon kichiua?
  • ¿Tleka Saúl tlauentlalia niman xkichia Samuel?
  • ¿Tlenon tiuelij itech tlen ipan onochiuj Saúl?

Okseki tlajtoltilistin

  • Xpoua 1 Samuel 9:15-21 niman 10:17-27.

    Pampa Saúl xnoueyimatiya, ¿kenon okipaleui maka makichiua tlen xkuajli ijkuak sekimej tlakamej xkuajli otlajtlatojkej itech? (1 Sam. 9:21; 10:21, 22, 27; Pro. 17:27).

  • Xpoua 1 Samuel 13:5-14.

    ¿Tlen tlajtlakojli okichiuj Saúl ijkuak nemiya Guilgal? (1 Sam. 10:8; 13:8, 9, 13).

  • Xpoua 1 Samuel 15:1-35.

    Ijkuak Saúl okixnamik Agag, tekiuaj itech Amaleq, ¿tlen ueyi tlajtlakojli okichiuj? (1 Sam. 15:2, 3, 8, 9, 22).

    ¿Kenon okiyejyeko Saúl kiteititis ika yejua xkipiaya tlajtlakojli itech tlen okichiuj, niman kenon okintlajtlakolti oksekimej? (1 Sam. 15:24).

    ¿Itech tlenon noneki matotlajpiyakan ijkuak yakaj techtlajtolpaleuiya? (1 Sam. 15:19-21; Sal. 141:5; Pro. 9:8, 9; 11:2).