Xuiya kampa tlen onka ijtik

Xuiya kampa tlen kipiya

Historia 48: Gabaonitas tlamachilisejkej

Historia 48: Gabaonitas tlamachilisejkej

MIYEKEJ iuejueyikalpanuan Canaán noyektlaliaj niman ijkon kixnamikiskej israelitas. Kinemiliaj uelis tetlaniskej. Akin chantij ipan ueyikalpan Gabaón xijkon tlanemiliaj. Yejuamej kineltoka ika toTajtsin kinpaleuiya israelitas, niman xkinekij kixnamikiskej toTajtsin. Ika yejon, ¿tikmatstika tlenon kichiuaj gabaonitas?

Pampa kinekij makimitakan kentla chantij kampa melak uejka, sekimej nonakiltiaj tlakentli kojkotonki niman inkakuan sosoltikej. Kinmamaltiaj inpolokouan kostaltin sosoltikej niman kitkij pan tlen yopoxkauj niman youak. Kuakon yauej kampa nemi Josué niman kijliaj: ‘Tiualeuaj itech se país melak uejka, pampa otiktekakilijkej itech nemoTajtsin akin ueyixtika, Jehová. Otiktekakilijkej nochi tlen okichiuj nemopampa, ne ipan país Egipto. Ika yejon, akin techyekanaj otechijlikej matikyektlalikan tlakuajli niman matiuajlakan nikan, matimechijlikij: “Timechtekichiuiliskej kentla nemotlakeualuan. Aman xtechijlikan ika xnentechixnamikiskej ipan se guerra”. Nemejuamej uelij nenkitaj ika yokojkoton totlaken pampa uejka tiualeuaj, niman pan yopoxkauj niman youak’.

Josué niman oksekimej akin tlayekanaj kineltokaj tlen kijtouaj gabaonitas. Ika yejon, kimijliaj ika xkimixnamikiskej. Ijkuak panoua yeyi tonajli, kimatij ika gabaonitas xuejka chantij.

‘¿Tleka onentechijlikej ika melak uejka nenualeuayaj itech okse país?’, tetlajtoltia Josué.

Gabaonitas kinankiliaj: ‘Pampa otiktekakilijkej ika nemoTajtsin Jehová yomechijlika mechmakas nochi yejuin tlajli tlen onka Canaán. Kuakon tikmakasiyaj xtechmiktikan’. San ika, israelitas kichiuaj tlen okimijlikej, xkinmiktiaj gabaonitas. Kichiuaj matekitikan kentla intlakeualuan.

Tekiuaj itech Jerusalén melak kualani pampa gabaonitas imiuan onosentlalijkej israelitas. Kuakon kimijlia oksekimej nauimej tekiuajkej: ‘Xuajlakan niman xnechpaleuikan matikimixnamikikan gabaonitas’. Niman ijkon kichiuaj makuiltin tekiuajkej. ¿Kuajli okichiujkej gabaonitas pampa onosentlalijkej imiuan israelitas, aman ika yejuin tekiuajkej uajlauej intech? Matikitakan.

Josué 9:1-27; 10:1-5.

Josué iuan gabaonitas


Tlajtoltilistin

  • ¿Tleka gabaonitas xijki katkaj ken cananeos akin nisiu chantij?
  • Ken tikita ipan tlaixkopinajli, ¿tlenon kichiuaj gabaonitas, niman tleka?
  • ¿Tlenon Josué iuan tlayekankej israelitas kimijliaj gabaonitas, niman tlenon kimatij ijkuak panoua yeyi tonajli?
  • ¿Tlenon panoua ijkuak tekiuajkej itech oksekimej uejueyimej kalpamej kitekakiliaj ika gabaonitas iuan yonosentlalijkej israelitas?

Okseki tlajtoltilistin

  • Xpoua Josué 9:1-27.

    Pampa Jehová yokinauatijka ikalpan Israel “makinmikti nochi tlaltikpakchanejkej”, ¿katlejua ikualneskayouan Jehová nesij pampa kintlapopoluiya gabaonitas? (Jos. 9:22, 24; Mat. 9:13; Hech. 10:34, 35; 2 Ped. 3:9).

    Pampa okichiuj tlen okimijli gabaonitas, ¿kenon okitlali Josué se kuajli neskayotl intech akin kichiuaj ken cristo ipan yejuin tonajli? (Jos. 9:18, 19; Mat. 5:37; Efe. 4:25).

  • Xpoua Josué 10:1-5.

    ¿Kenon kichiuaj itekipanojkauan toTajtsin ken gabaonitas, niman pampa ijkon kichiuaj, tlenon inpan panoua?(Jos. 10:4; Zac. 8:23; Mat. 25:35-40; Apo. 12:17).