Xuiya kampa tlen onka ijtik

Xuiya kampa tlen kipiya

Historia 44: Rahab kinmiyana ichtakatlachixkej

Historia 44: Rahab kinmiyana ichtakatlachixkej

YEJUIN tlakamej yonokalaktijkej ipan tlauejli. Kipiyaj ika choloskej, niman ijkon maka makinmiktikan. Yejuin ichtakatlachixkej israelitas iuan siuatl akin kinpaleuiya itoka Rahab. Rahab kipiya ichan itech tepantli tlen kiyeualoua Jericó. Matikitakan kenon opanok nochi yejuin.

Sa achijtsin poliui ijkuak israelitas kipanauiskej atentli Jordán niman kalakiskej Canaán. San ika, ijkuak xikalakij, Josué kintitlani omemej ichtakatlachixkej. Kimijlia: ‘Xkitatij tlajli niman ueyikalpan Jericó’.

Rahab niman ome ichtakatlachixkej israelitas

Ijkuak ichtakatlachixkej kalakij Jericó, ajsij ichan Rahab. San ika, yakaj kijlia akin tekiuajti itech Jericó: ‘Yejuin yeuajli ouajlakej omemej israelitas oichtakatlachiakoj’. Ijkuak tekiuaj kikaki yejuin, kititlani sekimej tlakamej kampa nemi Rahab, akin kinauatiaj: ‘¡Xkinkixti tlakamej akin tikinpiya mochan!’ Rahab yokinmiyanka tlakamej tlakpak ipan ikal. Kuakon kimijlia: ‘Sekimej tlakamej ouajlakej nochan, san ika, xnikmati kanon ualeuayaj. Oyajkej ijkuak itlapoyaujtoya, ijkuak xinotsakuaya ipuerta ueyikalpan. ¡Tla nemotlalouaj nenkominasiskej!’ Niman tlakamej notlalouaj komintejtemouaj.

Ijkuak yauej, Rahab notlaloua niman yauj tlakpak ipan ikal. ‘Nikmatstika ika Jehová mechmaktilis yejuin tlajli’, kimijlia ichtakatlachixkej. ‘Yotiktekakilijkej ika okiuats mar Rojo ijkuak nemejuamej onenuajkiskej Egipto, niman ika onenkimiktijkej tekiuajkej Sehón iuan Og. Pampa nejua kuajli yonimechselij, nimechtlajtlanilia xnechijlikan ika nemejuamej noijki ijkon nenkichiuaskej nouan. Xmakixtikan notaj, nonan iuan nokniuan.’

Ichtakatlachixkej kijliaj ika ijkon kichiuaskej, san ika, Rahab noneki itlaj kichiuas. ‘Mej yejuin mekatl chichiltik niman xsalo ipan moventana’, kijtouaj ichtakatlachixkej. ‘Niman xkinsentlali mochan nochimej mochanejkauan. Ijkuak tejuamej tiuajlaskej, totlatkitiskej Jericó niman tikitaskej yejuin mekatl, xakaj tikmiktiskej akin nemis mochan.’ Ijkuak ichtakatlachixkej yauej itech Josué, kijliaj nochi tlen yopanok.

Josué 2:1-24; Hebreos 11:31.



Tlajtoltilistin

  • ¿Kanon chanti Rahab?
  • ¿Akinomej yejon omemej tlakamej akin nesij ipan tlaixkopinajli, niman tleka nemij Jericó?
  • ¿Tlenon kinauatia tekiuaj itech Jericó makichiua Rahab, niman tlenon kinankilia yejua?
  • ¿Kenon kinpaleuiya Rahab yejon tlakamej, niman tlenon kintlajtlanilia makichiuakan ipampa?
  • ¿Tlenon kijliaj Rahab kichiuaskej ichtakatlachixkej ipampa?

Okseki tlajtoltilistin

  • Xpoua Josué 2:1-24.

    ¿Kenon onochiuj itlajtol Jehová tlen nesi ipan Éxodo 23:28, ijkuak israelitas kixnamikij Jericó? (Jos. 2:9-11).

  • Xpoua Hebreos 11:31.

    ¿Kenon techititia tlen okichiuj Rahab ika melak noneki matikpiyakan tlaneltokijli? (Rom. 1:17; Heb. 10:39; Sant. 2:25).