Xuiya kampa tlen onka ijtik

Xuiya kampa tlen kipiya

Historia 37: Kajli kampa kiueyichiuaj toTajtsin

Historia 37: Kajli kampa kiueyichiuaj toTajtsin

¿TIKMATSTIKA tlenon yejuin tlen nikan nesi? Se kajli kampa kiueyichiuaj Jehová. Kitokayotiaj tabernáculo. Israelitas otlankej kichijchiuaj ipan se xiuitl, sakin ijkuak ouajkiskej itech Egipto. ¿Tikmatstika akinon okinemili manochijchiua?

Tabernáculo

Jehová okinemili. Ijkuak Moisés nemiya ikuatipan tepetl Sinaí, Jehová okijli kenon kichijchiuas. Okijli maueli makejkuanikan. Niman ijkon uelis kitkiskiaj maski san kanon. Ika yejon, ijkuak israelitas nejkuaniayaj oksekan ipan tlaluaktli, ompa kitkiyaj yejuin kajli.

Tla tikita ijtik cuartito tlen onka kampa ontlami kajli, uelis tikitas se caja. Yejuin itoka, caja tlen tetlalnamiktia tlajtolkaualistli. Kipiaya ome querubines tlachijchiujtin ika oro tlen noixnamiktokej, okintlalijkej ipan itenko caja. ToTajtsin oksejpa okijkuilo Majtlaktli Tlanauatiltin ipan ome tetl patlauak, pampa Moisés okitlajtlapan tlen kachtopa okimakakaj. Niman yejuin temej okimejyeujkej ipan yejon caja. Noijki ompa okejyeujkej se kontli tentika ika maná. ¿Tikilnamiki tlenon katka yejon maná?

Jehová kitlapejpenia Aarón ikniuj Moisés, kentla ueyi teopixki. Yejua kinyekana israelitas ijkuak kiueyichiuaj Jehová. Niman ikoneuan noijki teopixkej.

Xkita yejon ueyi cuarto tlen onka ijtik kajli. Okpa ika koyauak xijkon ken cuartito tlen onka tlaxomolko. ¿Tikita yejon cajita tlen pojkistika? Ompa tlaixpan kampa teopixkej kipojkixtiaj tlen melak ajuiyak. Xkita noijki yejon candelabro tlen kipiya chikome lámparas. Niman ika yeyi, tlen onka ipan cuarto, se mesa kampa kipiya 12 pan.

Ikiyauatenko tabernáculo onka se ueyi kuexomatl, tentika ika atl. Teopixkej ompa nochipauaj. Noijki ompa onka ueyi tlaixpan. Nikan kintlatiaj yolkamej tlen kinuentlaliliaj Jehová. Yejuin kajli onka itsajlan kampa chantij israelitas.

Éxodo 25:8-40; 26:1-37; 27:1-8; 28:1; 30:1-10, 17-21; 34:1, 2; Hebreos 9:1-5.



Tlajtoltilistin

  • ¿Kenon itoka tlen onka ipan tlaixkopinajli, niman tlenon nochiua ompa?
  • ¿Tleka Jehová okijli Moisés ika ijkuak kichijchiuaskiaj kajli, maueli makejkuanikan?
  • ¿Tlenon katka yejon caja tlen onka ipan cuartito ijtik kajli, niman tlenon kipiya?
  • ¿ Akinon kitlapejpenia Jehová kentla ueyi teopixki, niman tlen tekitl kichiua?
  • Ijtik kajli, ¿tlenon yeyi tlemach onka ipan ueyi cuarto?
  • ¿Tlenon ome tlemach onka ikiyauatenko tabernáculo, niman kenon kintekitiltiaj?

Okseki tlajtoltilistin

  • Xpoua Éxodo 25:8-40; 26:1-37; 27:1-8, niman 28:1.

    ¿Tlenon kijtosnekiya querubines tlen onkatkaj ipan “caja tlen tetlalnamiktia tlajtolkaualistli”? (Éxo. 25:20, 22; Núm. 7:89; 2 Rey. 19:15).

  • Xpoua Éxodo 30:1-10, 17-21; 34:1, 2, niman Hebreos 9:1-5.

    ¿Tleka Jehová okimijli teopixkej ika nonekiya makichipauakan innakayo akin tekitiyaj ipan tabernáculo, niman kenon techpaleuiya yejuin? (Éxo. 30:18-21; 40:30, 31; Heb. 10:22).

    ¿Kenon kiteititia Pablo ika tabernáculo niman Tlanauatijli tlen okimakakej Moisés xok nonekiya manotlakamati, ijkuak yejua okintlajkuilouilij hebreos? (Heb. 9:1, 9; 10:1).