Xuiya kampa tlen onka ijtik

Xuiya kampa tlen kipiya

Historia 36: Uakaxkonetl tlachijchiujtli ika oro

Historia 36: Uakaxkonetl tlachijchiujtli ika oro

¡XKITA! ¿Tlenon kichiujtokej aman? ¡Kichiuilijtokej teoyotl se uakaxkonetl! ¿Tleka ijkon kichiujtokej?

Ijkuak Moisés uejkaui ipan tepetl, israelitas kijtouaj: ‘Xtikmatij tlenon ipan yonochiuj Moisés. Matochijchiuilikan se totajtsin akin matechkixti itech yejuin tlajli’.

Moisés kitlakali ome tetl patlauak

‘Maski’, kijtoua Aarón ikniuj Moisés. ‘Xmokixtilikan nemopipiloluan tlachijchiujtin ika oro, niman xnechuajkuilikan.’ Ijkuak israelitas kichiuaj yejuin, Aarón kichijchiua se uakaxkonetl ika yejon oro. Niman israelitas kijtouaj: ‘¡Yejuin toTajtsin, akin otechkixti itech Egipto!’. Kuakon kipiyaj se ueyi iluitl, niman kiueyichiuaj uakaxkonetl tlachijchiujtli ika oro.

Ijkuak Jehová kita yejuin, melak kualani. Niman kijlia Moisés: ‘Xmotlasiuiti, xtemo. Nokalpan melak xkuajli tlen kichiujtika. Yokilkaujkej notlanauatiluan niman notlakuanketsaj ixpan se uakaxkonetl tlachijchiujtli ika oro’.

Tlaltikpakchanejkej kiueyichiujtokej uakaxkonetl tlachijchiujtli ika oro

Moisés temoua nimantsin itech tepetl. Ijkuak temoua, yejuin tlen kita. ¡Tlaltikpakchanejkej nokuikatijtokej niman nijtotijtokej iyeualiyan uakaxkonetl! Moisés melak kualani, kitlakali ome tetl patlauak tlen kipiyaj tlanauatiltin, niman otlajtlapankej. Kuakon kontilana uakaxkonetl, kipatla niman kikuechtilia.

Israelitas yokichiujkej tlen melak xkuajli. Ika yejon, Moisés kimijlia sekimej tlakamej makikixtikan iespadas. Niman yejua kimijlia: ‘Tlaltikpakchanejkej xkuakualtin akin okiueyichiujkej uakaxkonetl, kipiya ika mikiskej’. ¡Kuakon yejon tlakamej kimiktiaj yeyi mil israelitas! ¿Xtechititia yejuin ika noneki san matikueyichiuakan Jehová, niman matotlajpiyakan maka tikinueyichiuaskej tajtsitsintin?

Éxodo 32:1-35.



Tlajtoltilistin

  • ¿Tlenon kichiujtokej akin nemij ipan tlaixkopinajli, niman tleka?
  • ¿Tleka kualantika Jehová, niman tlenon kichiua Moisés ijkuak kita tlen kichiujtokej tlaltikpakchanejkej?
  • ¿Tlenon kinnauatia Moisés makichiuakan sekimej tlakamej?
  • ¿Tlenon techmachtia yejuin tlen opanok?

Okseki tlajtoltilistin

  • Xpoua Éxodo 32:1-35.

    ¿Kenon techititia tlen yotikitakej itech tlen kinemilia Jehová ijkuak noneloua tlaneltokijli tlen melauak iuan tlen xmelauak? (Éxo. 32:4-6, 10; 1 Cor. 10:7, 11).

    ¿Kenon noneki notlajpiyaskej akin kichiuaj ken Cristo ijkuak kitlapejpeniaj itech tlen noyolpaktiaj, tlen tlatsotsonajli kikakij noso ijkuak nijtotiaj? (Éxo. 32:18, 19; Efe. 5:15, 16; 1 Juan 2:15-17).

    ¿Kenon okiteititijkej levitas se kuajli neskayotl ijkuak okinejkej manochiua tlen melaktik? (Éxo. 32:25-28; Sal. 18:25).