¿TIKITA tlenon panotika nikan? Yejuin soldados israelitas. Akin tikimita nopachojtokej, yejuamej atlitokej. Juez Gedeón innakastlan nemi. Yejua kitstika kenon atlij.

Xkita kenon xnochimej tlakamej ijkon atlij. Sekimej melak kuajli nopachouaj kampa onka atl. San ika, se kontilana atl ika ima, ijkon ueli kita tlenon panotika iyeualiyan. Yejuin melak kuajli, pampa Jehová okijli Gedeón ika makintlapejpeni akin tlatlachixtokej ijkuak atlij. Oksekimej kipiya ika nokuepaskej inchan. Matikitakan tleka.

Israelitas oksejpa kipiyaj miyek tlauejli pampa xkitlakamatij Jehová. Madianitas melak yonomiyekilijkej niman kintlajyouiltiaj. Kuakon israelitas kitlajtlaniliaj Jehová makinpaleui, niman Jehová kinkaki ijkuak notlatlaujtiaj.

Jehová kijlia Gedeón makinsentlali soldados, kuakon Gedeón kinsentlalia 32 mil soldados. San ika, nemij 135 mil tlakamej akin kimixnamikiskej israelitas. Jehová kijlia Gedeón: ‘Melak miyekej tlakamej tikinpiya’. ¿Tleka ijkon kijlia?

Pampa tla israelitas tetlanij ipan guerra, uelis kinemiliskej ika yejuamej otetlankej, niman ika xnoneki Jehová makinpaleui. Ika yejon, Jehová kijlia Gedeón: ‘Xkimijli ika nochimej akin nomojtiaj manokuepakan inchan’. Ijkuak Gedeón kichiua yejon, 22 mil soldados nokuepaj. San nokauaj majtlaktli mil tlakamej akin kimixnamikiskej 135 mil soldados.

Gedeón kintlatlata isoldados

San ika, ¡xkaki! Jehová kijlia: ‘Ok tikinpiya miyekej tlakamej’. Kuakon toTajtsin kijlia Gedeón makimijli tlakamej maatlikan ipan yejuin atentli niman makintitlani inchan nochimej akin melak kuajli nopachouaj ijkuak atlij. ‘Nikchiuas xtetlani ika 300 tlakamej akin tlatlachixtoyaj ijkuak atliyaj’, kijlia Jehová.

Oyejkok tonajli ijkuak noixnamikiskej. Gedeón yexkan kinxeloua 300 tlakamej. Nochimej kinmaka se kuakoujtli, kontli niman ijtik kontli se tlitl tlen ika tlauiluiskiaj. Ijkuak tlajkoyeuajli, nosentlaliaj kampa nemij akin kimixnamikiskej. Kuakon, san sekan, kipitsaj kuakoujtin niman kintlapanaj kontin, niman tsajtsij: ‘¡Iespada Jehová niman Gedeón!’ Ijkuak soldados akin kimixnamikiskej nokuiteuaj, nopopolouaj niman nomojtiaj. Nochimej cholouaj niman israelitas tetlanij.

Jueces, tlaxeloltin uejueyimej 6 ontlami ipan 8.



Tlajtoltilistin

  • ¿Ipan tlen tlauejli nokalaktiaj israelitas, niman tleka?
  • ¿Tleka Jehová kijlia Gedeón ika kipiya melak miyek soldados?
  • ¿Kechmej tlakamej nokauaj ijkuak Gedeón kimijlia akin nomojtiaj manokuepakan inchan?
  • Ken nesi ipan tlaixkopinajli, ¿kenon okichiuj Jehová manokauakan iuan Gedeón san 300 tlakamej?
  • ¿Kenon kinxexeloua Gedeón 300 tlakamej, niman kenon tetlanij israelitas ipan guerra?

Okseki tlajtoltilistin

  • Xpoua Jueces 6:36-40.

    ¿Tlenon okichiuj Gedeón niman ijkon okimat tlen Jehová kinekiya makichiua?

    ¿Kenon uelis tikmatiskej ipan yejuin tonajli tlenon kineki Jehová matikchiuakan? (Pro. 2:3-6; Mat. 7:7-11; 2 Tim. 3:16, 17).

  • Xpoua Jueces 7:1-25.

    ¿Tlenon tiuelij itech 300 tlakamej, akin tlatlachixtoyaj, xijkon ken oksekimej? (Jue. 7:3, 6; Rom. 13:11, 12; Efe. 5:15-17).

    Ijkon ken 300 tlakamej ouelkej ijkuak okitakej Gedeón, ¿kenon tiueliskej itech Ueyixtika Gedeón, Jesucristo? (Jue. 7:17; Mat. 11:29, 30; 28:19, 20, NM; 1 Ped. 2:21).

    ¿Kenon techpaleuiya Jueces 7:21 matiknekikan titekitiskej maski san kanon matechtlali Jehová? (1 Cor. 4:2; 12:14-18; Sant. 4:10).

  • Xpoua Jueces 8:1-3.

    Ijkuak tikyektlaliaj tlaueltin iuan tokniuan, ¿tlenon tiuelij itech kenon Gedeón okiyektlali tlauejli iuan efraimitas? (Pro. 15:1; Mat. 5:23, 24; Luc. 9:48).