¿TLENON kichiujtika maxoxotonikan itepanuan Jericó? Kentla okitlajkalilijkej se bomba. San ika, ipan yejon tonaltin xtlaj katka bombas nion cañones. ¡Jehová kichiujtika okse milagro! Matikitakan kenon opanok.

Itepanuan Jericó xoxotontokej

Xkaki tlen Jehová kijlia Josué: ‘Tejua iuan mosoldados xyeualokan san sejpa yejuin ueyikalpan ipan se tonajli niman xchiuakan yejuin chikuasen tonajli. Xkitkikan caja tlen tetlalnamiktia tlajtolkaualistli. Chikome teopixkej kipiya ika yaskej iyekapan caja niman makipitsakan kuakoujtin.

’Ipan tonajli chikome xyeualokan ueyikalpan chikometipan. Kuakon ijkuak nentlapitsaskej ika kuakoujtin makakisti san se ueyak, niman nochimej matsajtsikan kentla ninnemiskiaj ipan se guerra. ¡Niman tepantin xoxotoniskej!’

Josué iuan israelitas kichiuaj tlen Jehová kimijlia. Xakaj nauati ijkuak kiyeualouaj yejon ueyikalpan. San kakisti kenon nejnentiuij niman kenon kinpitsaj kuakoujtin. Akin chantij Jericó kanaj melak onomojtijkej. ¿Ueli tikita yejon mekatl chichiltik tlen pilkatika ipan yejon ventana? Kema, Rahab okichiuj ijkon ken okijlikej omemej ichtakatlachixkej. Nochimej ichanejkauan ompa nemij iuan, konitstokej tlen panotika.

Josué

Kuakon, ipan tonajli chikome ijkuak yokiyeualojkaj chikometipan ueyikalpan, kipitsaj kuakoujtin, tsajtsij soldados niman tepantin xoxotonij. Aman Josué kijtoua: ‘Xkinmiktikan tlaltikpakchanejkej niman xtlatikan nochi yejuin ueyikalpan, san xkauakan plata, oro, cobre niman hierro, pampa notekitiltis ipan tabernáculo’.

Josué kimijlia yejon omemej ichtakatlachixkej: ‘Xkixtitij Rahab iuan nochimej ichanejkauan’. Yejuamej makisaj ijkon ken yokijtokaj ichtakatlachixkej.

Josué 6:1-25.



Tlajtoltilistin

  • ¿Tlenon kinnauatia Jehová makichiuakan ipan chikuasen tonajli soldados iuan teopixkej?
  • ¿Tlenon noneki makichiuakan tlakamej ipan tonajli chikome?
  • Ken tikita ipan tlaixkopinajli, ¿tlenon panotika ika itepanuan Jericó?
  • ¿Tleka onka se mekatl chichiltik pilkatika ipan ventana?
  • ¿Tlenon kimijlia Josué makichiuakan soldados ika tlaltikpakchanejkej niman ueyikalpan, niman tlenon noneki makichiuakan ika plata, oro, cobre niman hierro?
  • ¿Tlenon kinnauatiaj makichiuakan ichtakatlachixkej?

Okseki tlajtoltilistin

  • Xpoua Josué 6:1-25.

    Ken okichiujkej israelitas ijkuak okiyeualojkej Jericó ipan tonajli chikome, ¿kenon noijki panoua ijkuak iteixpantijkauan Jehová tenojnotsaj ipan itlamiyan tonaltin? (Jos. 6:15, 16; Isa. 60:22; Mat. 24:14; 1 Cor. 9:16).

    ¿Kenon onochiujkej teotlajtoltin tlen onka ipan Josué 6:26 quinientos xiuitl sakin, niman tlenon techmachtia itech itlajtoluan Jehová? (1 Rey. 16:34; Isa. 55:11).