¡XKITA! ¡Israelitas kipanauijtokej atentli Jordán! ¿Kanon onka atl? Pampa ipan yejon tonaltin melak kiyaui, niman atentli tentoya ika atl ijkuak xipanouayaj. ¡Aman nochi atl youak! ¡Israelitas panotokej ipan tlajli uajki ijkon ken okichiujkej ipan mar Rojo! ¿Kanon oyaj nochi atl? Matikitakan.

Israelitas kipanauiyaj atentli Jordán

Ijkuak oyejkok tonajli ika israelitas kipanauiskej atentli Jordán, Jehová okijli Josué makimijli israelitas yejuin: ‘Teopixkej makikechpanokan caja tlen tetlalnamiktia tlajtolkaualistli niman mayakan tlayekapan. Ijkuak kipolaktiskej imikxiuan ipan atentli Jordán, atl noteltis’.

Kuakon teopixkej kajkokuij caja niman tlayekapan yauej. Ijkuak ajsij Jordán, teopixkej kalakij ipan atl, atentli chikauak notlalojtika niman uejkatlan. ¡Ijkuak kipolaktiaj imikxiuan, atl peua noteltia! ¡Yejuin se milagro! Ne tlakpak Jehová xok kikauilia mapano atl. ¡Atentli uaki!

Teopixkej akin kikechpanojtiuij caja tlen tetlalnamiktia tlajtolkaualistli ajsij itlajkotian atentli Jordán tlen youak. ¿Ueli tikimita ipan tlaixkopinajli? ¡Ijkuak ompa nemij, nochimej israelitas peuaj panouaj ipan atentli Jordán ipan tlajli uajki!

Ijkuak nochimej yopanokej, Jehová kijlia Josué makimijli 12 tlakamej kojtikej: ‘Xiakan ipan atentli kampa nemij teopixkej akin kikechpanotokej caja. Kuakon xsentlalikan 12 temej niman xkintlalitij kampa nochimej nokauaskej yejuin yeuajli. Ijkon, ika tlayekapan ijkuak kinekiskej kimatiskej nemokoneuan tlenon kijtosneki yejuin temej, nemejuamej kipiya ika nenkimijliskej ika yejuin atl onotelti, ijkuak icaja toTajtsin Jehová tlen tetlalnamiktia tlajtolkaualistli opanok ipan Jordán. ¡Temej mechtlalnamiktis yejuin ueyi milagro!’ Josué noijki kitlalia 12 temej kampa teopixkej onenkej ipan atentli.

Josué

Kuakon Josué kimijlia teopixkej akin kitkij caja tlen tetlalnamiktia tlajtolkaualistli: ‘Xuajkisakan itech atentli Jordán’. Ijkuak kichiuaj ijkon, oksejpa peua notlaloua atl ipan atentli.

Josué 3:1-17; 4:1-18.



Tlajtoltilistin

  • ¿Tlen milagro kichiua Jehová niman ijkon israelitas mapanokan ipan atentli Jordán?
  • ¿Kenon kiteititiskiaj israelitas ika kipiyaj tlaneltokilistli niman ijkon ueliskiaj panoskej ipan Jordán?
  • ¿Tleka Jehová kijlia Josué makinkuiti doce temej itech atentli?
  • ¿Tlenon panoua ijkuak teopixkej uajkisaj itech Jordán?

Okseki tlajtoltilistin

  • Xpoua Josué 3:1-17.

    Ken techititia tlen yotikitakej, ¿tlenon noneki tikchiuaskej tla tiknekij tikseliskej itlapaleuilis iuan itlateochiualis Jehová? (Jos. 3:13, 15; Pro. 3:5; Sant. 2:22, 26).

    ¿Kenon onkatka atentli Jordán ijkuak israelitas okipanauijkej niman ijkon oajsikej ipan Tlajli tlen toTajtsin yokijtoka kinmakas, niman kenon yejuin okiueyichiuj itoka Jehová? (Jos. 3:15; 4:18; Sal. 66:5-7).

  • Xpoua Josué 4:1-18.

    ¿Tlenon okijtosnek doce temej tlen okinkixtijkej ipan Jordán niman okintlalijkej Guilgal? (Jos. 4:4-7).