PANOUA miyek xiujtin… ¡25, 30, 35, 39 xiuitl! Israelitas ok nemij ipan tlaluaktli. Ipan nochi yejuin xiujtin Jehová kitlajpiya ikalpan. Kintlakualtia ika maná. Ika tonajli kinyekana ika se moxtli niman ika yeuajli ika tlitl, intlaken xtlami nion xposauij imikxiuan.

Yejuin kachtopa metstli itech 40 xiuitl tlen ikipiya ika ouajkiskej Egipto. Israelitas oksejpa nemij kampa itoka Qadés. Nikan nemiyaj ijkuak 12 ichtakatlachixkej okintitlankej matlachiatij ipan país itoka Canaán, yopanok 40 xiuitl. Míriam ikniuj Moisés miki nikan, ipan Qadés. Ijkon ken yopanoka, oksejpa onka tlauejli nikan.

Tlaltikpakchanejkej xueli kinextiaj atl. Kijliaj Moisés: ‘Melak kuajli yeskia tla timikiskiaj. ¿Tleka otitechuajkixti Egipto niman otitechuajuikak nikan kampa xtlakualtsinkan nion kampa xtlaj tlaki? Nikan xtlaj trigo, higos, uvas nion granadas. Nion xtlaj atl tlen tikoniskej’.

Moisés kiuiteki tetl

Ijkuak Moisés niman Aarón konchiuaj teoyotl ipan tabernáculo, Jehová kijlia Moisés: ‘Xkinsentlali nokalpan. Kuakon, imixpan xnotsa yejon tetl tlen ne onka. Ompa kisas miyek atl tlen koniskej nokalpan iuan nochi inyolkauan’.

Kuakon Moisés kinsentlalia tlaltikpakchanejkej, niman kimijlia: ‘¡Xkakikan, nochi akin xnentlaneltokaj ipan toTajtsin! Aarón niman nejua timechkixtiliskej atl itech yejuin tetl’. Kuakon, Moisés kiuiteki okpa yejon tetl ika se tlakotl, niman melak miyek atl ouajkis itech yejon tetl. Okimaxili yejuin atl nochimej tlaltikpakchanejkej iuan inyolkauan akin ompa nemiyaj.

San ika, Jehová melak kualani iuan Moisés niman Aarón. ¿Tikmatstika tleka? Pampa Moisés niman Aarón okijtokej ika yejuamej kikixtiskiaj atl itech yejon tetl. Maski Jehová yejua akin kikixtijtoya. Niman pampa Moisés iuan Aarón xokijtokej tlen melauak, Jehová kimijlia ika kinkauilis matlajyouikan. ‘Nemejuamej xnenkiyekanaskej nokalpan ijkuak kalakiskej Canaán’, kimijlia toTajtsin Jehová.

Nimantsin israelitas kisaj itech Qadés. Xouejkaujkej oajsikej ipan tepetl Hor. Ompa, ikuatipan tepetl, miki Aarón. Kipiya 123 xiuitl ijkuak miki. Israelitas melak noyolkokouaj, niman kichokiliaj Aarón 30 tonaltin. Eleazar ikoneuj Aarón yejua akin kitlaliaj kentla ueyi teopixki itech israelitas.

Números 20:1-13, 22-29; Deuteronomio 29:5; Nehemías 9:21.



Tlajtoltilistin

  • ¿Kenon Jehová kintlajpiya israelitas ijkuak nemij ipan tlaluaktli?
  • ¿Tlenon xkuelitaj israelitas ijkuak nemij Qadés?
  • ¿Kenon Jehová kinmaka atl israelitas niman inyolkauan?
  • ¿Akinon yejon tlakatl ipan tlaixkopinajli akin nomajpiluijtika, niman tleka ijkon kichiua?
  • ¿Tleka Jehová kikualania tlen kichiuaj Moisés iuan Aarón, niman kenon kinkauilia matlajyouikan?
  • ¿Tlenon panoua ipan tepetl Hor, niman akinon kitlaliaj kentla ueyi teopixki itech israelitas?

Okseki tlajtoltilistin

  • Xpoua Números 20:1-13, 22-29 niman Deuteronomio 29:5.

    ¿Tlenon tiuelij itech kenon Jehová okintlajpix israelitas ipan tlaluaktli? (Deu. 29:5; Mat. 6:31; Heb. 13:5; Sant. 1:17).

    ¿Kenon okitak Jehová ijkuak Moisés iuan Aarón xokiueyichiujkej imixpan israelitas? (Núm. 20:12; 1 Cor. 10:12; Apo. 4:11).

    ¿Kenon okiseli Moisés ijkuak Jehová okimelajkatlali niman tlenon tiuelij? (Núm. 12:3; 20:12, 27, 28; Deu. 32:4; Heb. 12:7-11).