XKITA xochimej niman almendras tlen tlakij ipan tlakotl. Yejon itlakouj Aarón. ¡Niman tlakilyotl otlak san ipan se yeuajli! Matikitakan tleka.

Moisés kimakatika Aarón itlakouj tlen xochiyoua

Israelitas melak youejkaujkej kistinemij ipan tlaluaktli. Sekimej xkinekij matlayekana Moisés nion xkinekij Aarón kentla ueyi teopixki. Coré ijkon tlanemilia, noijki Datán, Abiram iuan 250 akin kinyekanaj israelitas. Nochimej uajlauej niman kijliaj Moisés: ‘¿Tleka tiknemilia ika tejua tiueyixtika, xijkon ken tejuamej?’

Moisés kijlia Coré niman akin imiuan nemi: ‘Mostla ika kualkan xkontilanakan tlen ika nentlapojkixtiaj niman xtlalilikan tlen ajuiyak. Kuakon xuajlakan ixpan itabernáculo Jehová. Tikmatiskej akinon kitlapejpenis’.

Uajmostla Coré niman 250 akin iuan nemij uajlauej ipan tabernáculo. Noijki uajlauej miyekej akin kipaleuiyaj. Jehová melak kualantika. Moisés kijtoua: ‘Xtlalkauikan inkaluan yejuin xkuakualtin tlakamej. Maka itlaj xkitskikan tlen intlatki’. Tlaltikpakchanejkej kikakij, kitlalkauiyaj inkaluan Coré, Datán niman Abiram.

Kuakon Moisés kijtoua: ‘Ijkon tikmatiskej akinon kitlapejpenis Jehová. Tlajli tlapouis niman kintolos akin xkuakualtin tlakamej’.

Ijkuak Moisés tlami kijtoua yejuin, tlapoui tlajli. Inkal niman tlen intlatki Coré, Datán niman Abiram iuan nochimej akin imiuan nemiyaj oxinitoj, kuakon tlajli onotsauk. Ijkuak tlaltikpakchanejkej kikakij kenon tsajtsij akin oxinitoj, peua kijtouaj: ‘¡Xmotlalokan! ¡Uelis noijki tonxiniskej!’

Coré niman 250 akin iuan nemij, ok nisiu nemij itech tabernáculo. Ika yejon, Jehová kuajtitlani tlitl niman nochimej tlatlaj. Jehová kijlia Eleazar ikoneuj Aarón ika makinsentlali tlen ika tlapojkixtiayaj akin omijkej, makinkanaua niman makipepechouili tlaixpan. Yejuin tlen okitlalilijkej tlaixpan, kimilnamiktia israelitas ika, san Aarón iuan ikoneuan kipiya ika tekitiskej kentla iteopixkauan Jehová.

San ika, Jehová kineki kuajli makimatikan ika okitlapejpeni Aarón iuan ikoneuan kentla teopixkej. Kuakon kijlia Moisés: ‘Nochimej akin tlayekanaj ipan uejueyimej familias itech Israel makuajkuikan intlakouj. Itech levitas, Aarón makuajkui itlakouj. Kuakon xtlali ijtik tabernáculo nochi intlakouj ixpan caja tlen tetlalnamiktia tlajtolkaualistli. Itlakouj akin nejua niktlapejpenis kentla teopixki, xochiyouas’.

Uajmostla Moisés kita, ¡itlakouj Aarón xochiyoua niman kipiya almendras! ¿Tikasikamati tejua tleka Jehová okichiuj itlakouj Aarón maxochiyoua?

Números 16:1-49; 17:1-11; 26:10.



Tlajtoltilistin

  • ¿Akinon kixnamikij itlayekanalis Moisés iuan Aarón, niman tlenon kijliaj Moisés?
  • ¿Tlenon kijlia Moisés makichiuakan Coré niman 250 akin iuan nemij?
  • ¿Tlenon Moisés kimijlia israelitas, niman tlen panoua ijkuak tlami kimijlia?
  • ¿Tlenon inpan nochiua Coré niman 250 akin iuan nemij?
  • ¿Tlenon kichiua Eleazar, ikoneuj Aarón, ika tlen tlapojkixtiayaj akin omijkej, niman tleka?
  • ¿Tleka kichiua Jehová maxochiyokisa itlakouj Aarón? (Xkita tlaixkopinajli).

Okseki tlajtoltilistin

  • Xpoua Números 16:1-49.

    ¿Tlenon okichiujkej Coré niman akin iuan nemij, niman tleka yejon okijtosnek ika kixnamikiyaj Jehová? (Núm. 16:9, 10, 18; Lev. 10:1, 2; Pro. 11:2).

    ¿Tlen tlanemilijli xkuajli okipixkej Coré niman 250 “akin tlayekanaj ipan Israel”? (Núm. 16:1-3; Pro. 15:33; Isa. 49:7).

  • Xpoua Números 17:1-11 niman 26:10.

    ¿Tlenon okijtosnek ika itlakouj Aarón oxochiyouak, niman tleka okijto Jehová makejyeuakan ipan caja tlen tetlalnamiktia tlajtolkaualistli? (Núm. 17:5, 8, 10).

    ¿Tlenon techmachtia tlen ipan onochiuj itlakouj Aarón? (Núm. 17:10; Hech. 20:28; Fili. 2:14; Heb. 13:17).