Xuiya kampa tlen onka ijtik

Xuiya kampa tlen kipiya

Historia 30: Uitskojtli tlen tlikuitika

Historia 30: Uitskojtli tlen tlikuitika

MOISÉS yoyejkoka ipan tepetl Horeb kuajtejtemotiuj xiujtli tlen kikuaskej iborregos. Nikan okitak se uitskojtli tlen tlikuitika, san ika, ¡uitskojtli xtlatla!

Moisés nemi itech uitskojtli tlen tlikuitika

‘¡Xkeman ijkon panoua!’ Moisés okinemili. ‘Nikontas tlen panoua.’ Ijkuak ononisiui kampa onka uitskojtli, okakistik se tlajtojli tlen okijto: ‘Xmotelti maka sa xuajmonisiui. Xkinkixti mokakuan, pampa yejuin tlajli chipauak’. ToTajtsin tlajtotoya ika se iluikaktekitketl, ika yejon, Moisés onoxayakatlapacho.

Kuakon toTajtsin okijli Moisés: ‘Nejua yonikitak kenon tlajyouijtika nokalpan ipan Egipto. Nimitstitlanis xkinkixtiti kampa nemij niman ijkon nikinmakixtis’. Jehová kuikaskia ikalpan ipan se kualtsin país, itoka Canaán.

Ika yejon, Moisés okijto: ‘Nejua xtlaj ika nitepaleui. ¿Kenon uelis nikchiuas yejuin? Niman tla niauj nechijliskej: “¿Akinon omitsajtitlan?” ¿Kuakon tlenon nikimijlis?’

‘Yejuin tikimijlis’, okijto toTajtsin. ‘ “JEHOVÁ akin iTajtsin Abrahán, iTajtsin Isaac niman iTajtsin Jacob onechajtitlan nemotech”.’ Kuakon toTajtsin okijto: ‘Yejuin nochipa yes notoka’.

Moisés otlanankili: ‘¿Niman tla yejuamej xnechneltokaj ijkuak nikimijlis ika tejua otinechtitlan?’

‘¿Tlenon tikpiya ipan moma?’, okitlajtolti toTajtsin.

Moisés okinankili: ‘Se tlakotl’.

‘Xtlajkali’, okinauati toTajtsin. Ijkuak Moisés ijkon okichiuj, itlakouj tlen kipiaya onokuep se kouatl. Kuakon, Jehová okititi Moisés okse milagro. Okijli: ‘Xtlapacho moma ika motlaken’. Moisés okichiuj, niman ijkuak okitak ima, ¡melak istak katka! Nesiya kentla kipiaya se kokolistli itoka lepra. Kuakon Jehová okikauili Moisés makichiua okse milagro. Ijkuak otlamito okijto: ‘Ika yejuin milagros, kichiuas matlaneltokakan israelitas ika nejua onimitstitlan’.

Sakin, Moisés oyaj ichan niman okijli Jetró: ‘Nimitstlajtlanilia, xnechkauili oksejpa maniuiya Egipto pampa nikneki nikitas kenon nemij akin ken nikimita’. Kuakon ijkuak Jetró okikauili, Moisés oksejpa onokuep Egipto.

Éxodo 3:1-22; 4:1-20.



Tlajtoltilistin

  • ¿Kenon itoka tepetl tlen nesi ipan tlaixkopinajli?
  • ¿Tlenon okitak Moisés tlen xkeman panouaya, ijkuak oyaj ipan tepetl iuan iborregos?
  • ¿Tlenon okijto tlen okakistik itsajlan uitskojtli, niman akinon otlajto?
  • ¿Kenon otlanankili Moisés ijkuak toTajtsin okijli makikixti Ikalpan itech Egipto?
  • ¿Tlenon toTajtsin okijli Moisés matenankili tla kitlajtoltiaj akinon okontitlan?
  • ¿Kenon teititiskia Moisés ika toTajtsin okititlan?

Okseki tlajtoltilistin

  • Xpoua Éxodo 3:1-22.

    Ijkuak tikitaj ika toTajtsin okipaleui Moisés, ¿kenon techpaleuiya yejon ijkuak kemantika tikmachiliaj ika xtiueliskej tikchiuaskej se tekitl tlen techmaka Jehová? (Éxo. 3:11, 13; 2 Cor. 3:5, 6).

  • Xpoua Éxodo 4:1-20.

    ¿Kenon okipatlak itlanemilil Moisés ijkuak ochantito Madián 40 xiujtin, niman tlenon kinmachtia akin kinekij kipiyaskej se tekitl ipan tlanechikojli? (Éxo. 2:11, 12; 4:10, 13; Miq. 6:8; 1 Tim. 3:1, 6, 10).

    Maski Jehová techyektlalia ika tlayekankej, ¿tlenon uelis tikchiaskej ijkuak tikitaj tlen ipan onochiuj Moisés? (Éxo. 4:12-14; Sal. 103:14; Heb. 12:4-11, NM).