¿XTIKIKNELIA yejuin kokoxki? Itoka Job, niman akin ixpan nemi, isiuauj. ¿Tikmatstika tlenon kijlitika Job? ‘Xkuijuikalti toTajtsin niman xmiki.’ Matikitakan tleka yejua okijli ijkon, niman tleka Job melak otlajyoui.

Job kipiya tsotsomej tlen temalkisaj

Job kitlakamatiya niman xkikauaya Jehová. Yejua chantiya ipan ueyikalpan Uz, xuejka nokauaya Canaán. Jehová melak kitlasojtlaya Job, san ika, nemiya se akin melak kitlauelitaya. ¿Tikmatstika akinon katka yejon akin kitlauelitaya?

Yejuin Satanás katka akin noijki kitokayotiaj Diablo. Xkilnamiki, Satanás yejua yejon iluikaktekitketl akin melak kitlauelita Jehová. Yejua ouel okichiuj Adán niman Eva maka makitlakamatikan Jehová, niman kinemiliaya ika maski san akinon noijki uelis kichiuas maka matetlakamati. ¿Ouel okichiuj yejon? Ka. San xnemili itech akin yotomachtijkej, tlakamej niman siuamej akin xokikaujkej toTajtsin. ¿Kechmej uelis tikinteneuas?

Sakin, ijkuak ipan Egipto Jacob niman José omijkej, san Job oyolmelaujkanen itech Jehová ipan nochi tlaltikpaktli. Jehová kinekiya ika Satanás makimati ika xueliskia kichiuas tlaltikpakchanejkej manokuepakan xkuakualtin, niman okijli: ‘Xkita Job. Xkita ika yejua xnechkaua’.

‘Yejua xmitskaua’, okijto Satanás, ‘pampa tejua tikteochiua niman kipiya miyek tlemach tlen kuajli. San ika, xkixtili tlen kipiya, niman yejua mitsuijuikaltis.’

Ika yejon, Jehová okijli: ‘Xuiya. Xkuili. Xchiuili Job nochi tlen xkuajli. Tikitaskej tla nechuijuikaltia. San ika, maka tikmiktis’.

Kachtopa, Satanás okichiuj ika sekimej tlakamej makichtekilikan iuakaxuan iuan icamellos Job, niman iborregos okinmiktilijkej. Niman okimikti majtlaktli ikoneuan ika se chikauak ejekatl. Sakin, okichiuj makasi Job yejuin xkuajli kokolistli. Job melak otlajyoui. Ika yejon, isiuauj okijli: ‘Xkuijuikalti toTajtsin niman xmiki’. San ika, Job xokinek. Noijki, yeyimej akin kijtouayaj iuan nouikayaj, ouajlakej niman okijlikej ika xkuajli kenon onen. San ika, Job xokikauj toTajtsin.

Yejon melak okiyolpakti Jehová, niman sakin yejua okiteochiuj Job, ken tikita ipan tlaixkopinajli. Okipajtili ikokolisyo. Job oksejpa okipix majtlaktli ikoneuan kualtsitsintin, niman okiokpatili iyolkauan, iborregos iuan camellos tlen kipiaya.

¿Tejua xtijkauas Jehová ken Job? Tla tiyolmelaujkanemi, toTajtsin noijki mitsteochiuas. Uelis tinemis nochipa ijkuak tlaltikpaktli nokuepas ijkon ken katka xochitlalpan Edén.

Job 1:1-22; 2:1-13; 42:10-17.

Job iuan ichanejkauan


Tlajtoltilistin

  • ¿Akinon katka Job?
  • ¿Tlenon okinek kichiuas Satanás? ¿Okichiuj tlen kinekiya?
  • ¿Tlenon okikauili Jehová makichiua Satanás, niman tleka?
  • ¿Tleka isiuauj Job okijli “xkuijuikalti toTajtsin niman xmiki” ? (Xkita tlaixkopinajli).
  • Ken tikita ipan tlaixkopinajli, ¿kenon Jehová okiteochiuj Job, niman tleka?
  • Tla tejuamej tiyolmelaujkanemij itech Jehová ken Job, ¿tlenon tlateochiualistin tikseliskej?

Okseki tlajtoltilistin

  • Xpoua Job 1:1-22.

    Akin kichiuaj ken Cristo, ¿kenon uelis noijki kichiuaskej ken Job ipan yejuin tonaltin? (Job 1:1; Fili. 2:15; 2 Ped. 3:14).

  • Xpoua Job 2:1-13.

    Ijkuak Satanás okitlatlatak Job, ¿kenon xijki otlanemili Job ken isiuauj? (Job 2:9, 10; Pro. 19:3; Miq. 7:7; Mal. 3:14).

  • Xpoua Job 42:10-17.

    Itech tlen okiseli Job, ¿tleka uelis tikijtoskej ika noijki ijkon okiseli tlateochiualistli Jesús pampa xkeman okikauj toTajtsin? (Job 42:12; Fili. 2:9-11).

    Ika tikitaj kenon Job okiseli tlateochiualistin pampa xokikauj toTajtsin, ¿kenon techyolchikaua? (Job 42:10, 12; Heb. 6:10; Sant. 1:2-4, 12; 5:11).