Xuiya kampa tlen onka ijtik

Xuiya kampa tlen kipiya

Historia 19: Miyekej ichanejkauan Jacob

Historia 19: Miyekej ichanejkauan Jacob
Jacob iuan ikoneuan

XKITA kenon miyekej ichanejkauan. Yejuamej 12 ikoneuan Jacob. Niman noijki okinpix ikoneuan siuamej. ¿Tikmatstika kenon intoka sekimej ikoneuan? Matiuelikan itech sekimej.

Lea okitlakatili Rubén, Simeón, Leví, niman Judá. Ijkuak Raquel okitak ika xueliya kinpiaya ikoneuan, melak onotekipacho. Ika yejon, Raquel okimakak Jacob itlakeual Bilhá, niman Bilhá okipix ome ikoneuj Dan iuan Neftalí. Kuakon Lea noijki okimakak Jacob itlakeual Zilpá, niman Zilpá okitlakatili Gad iuan Aser. Sakin, Lea okipix sa ome ikoneuj, Isacar iuan Zabulón.

Aman kema Raquel ouel okipix se ikoneuj. Okitokayoti José. Sakin, tiueliskej itech José, pampa yejua onochiuj se tlakatl melak ueyixtika. Yejuin katkaj 11 ikoneuan tlen Jacob okinpix ijkuak nemiya iuan Labán, itaj Raquel.

Jacob noijki okinpix sekimej ikoneuan siuamej, san ika, Biblia kiteneua san se. Itoka katka Dina.

Oyejkok tonajli ijkuak Jacob okinemili kikaujteuas Labán niman oksejpa yas Canaán. Ika yejon, okinsentlali nochi ichanejkauan, miyekej iborregos iuan okseki iyolkauan, kuakon okiskej.

Ijkuak youejkaujkaj Canaán Jacob niman ichanejkauan, Raquel okipix okse ikoneuj. Yejuin opanok ipan ojtli. Melak xkuajli tlen ipan onochiuj Raquel, pampa ijkuak okitlakatili ikonetsin, yejua omik. San ika, konetsintli kuajli nemiya. Jacob okitokayoti Benjamín.

Noneki tikimilnamikiskej kenon intoka 12 ikoneuan Jacob pampa nochi israelitas ompa oualeujkej. Niman 12 uejueyimej familias itech Israel, majtlaktli intoka ken ikoneuan Jacob niman ome ken ikoneuan José. Isaac onen miyek xiujtin ijkuak onemikoj yejuin telpokamej, niman melak opak ika okipix miyek ixuiuan. San ika, matikitakan tlenon ipan onochiuj ixuiuj, Dina.

Génesis 29:32-35; 30:1-26; 35:16-19; 37:35.



Tlajtoltilistin

  • ¿Kenon intoka katka chikuasen ikoneuan Jacob tlen okipix iuan kachtopa isiuauj, Lea?
  • ¿Katlejua ome ikoneuj okipix Jacob iuan Zilpá, itlakeual Lea?
  • ¿Kenon intoka katka ome ikoneuj tlen Jacob okipix iuan Bilhá, itlakeual Raquel?
  • ¿Katlejua ome ikoneuj okipix Raquel, san ika, tlen opanok ijkuak okitlakatili Benjamín?
  • Ken nesi ipan tlaixkopinajli, ¿kechmej ikoneuan okipix Jacob, niman kenon itoka kalpan tlen okis intech?

Okseki tlajtoltilistin

  • Xpoua Génesis 29:32-35; 30:1-26, niman 35:16-19.

    Ken tikitaj itech ikoneuan Jacob, ¿kenon kintokayotiayaj iyeuejkaui kokonej hebreos?

  • Xpoua Génesis 37:35.

    Maski Biblia san kiteneua Dina, ¿kenon tikmatstokej ika Jacob okipix oksekimej ikoneuan siuamej? (Gén. 37:34, 35).