Esaú

YEJON ome telpokamej tlen tikimita ipan yejuin tlaixkopinajli sejnekamej noso tlamantikej, ¿xmelak? ¿Tikmatstika kenon intoka? Akin kinmajsi yolkamej itoka Esaú, niman akin kintlajpiya borregos itoka Jacob.

Esaú iuan Jacob katkaj kouatsitsintin, niman intajuan katkaj Isaac iuan Rebeca. Isaac melak kitlasojtlaya Esaú, pampa ueliya kinmajsiya yolkamej niman kuajkuiya tlakuajli tlen kinmakaya ichanejkauan. San ika, Rebeca melak kitlasojtlaya Jacob, pampa xtlauele katka niman yolseujki.

Abrahán ok yoltoya, niman uelis tiknemiliskej kenon Jacob melak kuelkakiya makinojnotsa iabuelo itech Jehová. Abrahán omik ijkuak kipiaya 175 xiujtin, ijkuak kouatsitsintin kipiayaj 15 xiujtin.

Ijkuak Esaú kipiaya 40 xiujtin ononamikti iuan omemej siuamej chanejkej Canaán. Tlen opanok melak okinyolkoko itajuan Isaac niman Rebeca, pampa yejuin siuamej xkiueyichiuayaj Jehová.

Kuakon, opanok itlaj tlen okichiuj Esaú makitlauelita ikniuj Jacob. Oyejkok tonajli ijkuak Isaac kimakaskia se tlateochiualistli ikoneuj akin yakatstiuj. Itech Esaú niman Jacob, Esaú yejua akin yakatstiaya, kuakon yejua kichiaya kiselis yejuin tlateochiualistli. San ika, Esaú yokinemakaka yejuin tlateochiualistli tlen kiseliskia. Noijki, ijkuak yejuin omemej telpokamej otlakatikoj, toTajtsin okijto ika Jacob kiseliskia yejuin tlateochiualistli. Niman ijkon opanok. Isaac okimakak Jacob tlateochiualistli.

Jacob

Sakin, ijkuak Esaú okimat yejuin, melak okualan iuan Jacob. Pampa melak okualan okijto ika kimiktis Jacob. Ijkuak Rebeca okikak yejuin, melak onajman. Ika yejon, okijli iueuentsin Isaac: ‘Melak xkuajli yes tla Jacob noijki nonamiktia iuan se siuatl chanej Canaán’.

Ika yejon, Isaac okijli ikoneuj Jacob: ‘Nejua xnikneki xmonamikti iuan se siuatl chanej Canaán. Xuiya ne Harán kampa chanti moabuelo Betuel niman ompa nemi ikoneuj itoka Labán. Xmonamikti iuan se ichpoch’.

Jacob okitlakamat itaj, nimantsin oyaj Harán kampa chantij akin ken kimita.

Génesis 25:5-11, 20-34; 26:34, 35; 27:1-46; 28:1-5; Hebreos 12:16, 17.



Tlajtoltilistin

  • ¿Akinomej katkaj Esaú iuan Jacob, niman itech tlenon sejnekamej noso tlamantikej katkaj?
  • ¿Kech xiuitl kipiayaj Esaú iuan Jacob ijkuak omik inabuelo Abrahán?
  • ¿Tlenon okichiuj Esaú tlen okinyolkoko itajuan?
  • ¿Tleka Esaú okitlauelitak ikniuj Jacob?
  • ¿Tlenon okinauati Isaac makichiua ikoneuj Jacob?

Okseki tlajtoltilistin

  • Xpoua Génesis 25:5-11, 20-34.

    ¿Tlenon okijto Jehová panoskia itech ikoneuan Rebeca? (Gén. 25:23).

    ¿Kenon tlamantik noso sejneka tlanemiliayaj Jacob iuan Esaú itech tlateochiualistli tlen Isaac temakaskia? (Gén. 25:31-34).

  • Xpoua Génesis 26:34, 35; 27:1-46, niman 28:1-5.

    ¿Kenon okiteititi Esaú ika xkitlasojkaitaya tlen ualeua itech toTajtsin? (Gén. 26:34, 35; 27:46).

    Tla Jacob kinekiya kiselis itlateochiualis toTajtsin, ¿tlenon okijli Isaac makichiua? (Gén. 28:1-4).

  • Xpoua Hebreos 12:16, 17.

    Ijkon ken ipan onochiuj Esaú, ¿tlenon noijki uelis inpan nochiuas akin xkitlasojkaitaj tlen ualeua itech toTajtsin?