Xuiya kampa tlen onka ijtik

Xuiya kampa tlen kipiya

Historia 31: Moisés iuan Aarón yauej itech Faraón

Historia 31: Moisés iuan Aarón yauej itech Faraón

IJKUAK Moisés oksejpa oyaj Egipto, okitlajtlatouili ikniuj Aarón itech milagros tlen okimitak. Niman ijkuak Moisés iuan Aarón okinmijtitikej israelitas yejon milagros, nochimej okineltokakej ika Jehová imiuan nemiya.

Kuakon Moisés iuan Aarón oyajkej itech Faraón. Okijlikej: ‘Jehová iTajtsin Israel kijtoua: “Xkauili mauiya nokalpan Israel yeyi tonajli, niman manechueyichiuakan ipan tlaluaktli” ’. Faraón okijto: ‘Nejua xnikneltoka Jehová. Xnikinkauilis mayakan israelitas’.

Faraón melak kualaniya, pampa israelitas kinekiyaj kiueyichiuaskej Jehová ijkuak yejuamej tekitiyaj. Ika yejon, okinchiualti matekitikan chikauak. Israelitas okitlajtlakoltijkej Moisés, pampa melak chikauak opeuj kintekitiltiaj, niman Moisés melak onoyolkoko. Jehová okijli maka manotekipacho. Niman okijto: ‘Nikchiuas, Faraón makikauili makisa nokalpan Israel’.

Moisés niman Aarón ixpan Faraón

Moisés iuan Aarón oksejpa oyajkej itech Faraón. Aman yejuamej okichiujkej se milagro. Aarón okitlajkal itlakouj, niman onokuep se ueyi kouatl. Niman iteopixkauan Faraón akin nanaualtin katkaj noijki okitlajkalkej intlakouj, niman noijki onokuepkej kouamej. San ika, ¡xkita! itlakouj Aarón tlen onokuep se kouatl, opeuj kintoloua okseki kouamej tlen intlatki katka teopixkej. Maski ijkon, Faraón xokinkauili makisakan israelitas.

Ika yejon, Jehová okinemili kititis Faraón, iueyilis. ¿Tikmatstika kenon okichiuj? Okichiuj makipiya Egipto majtlaktli tlajyouilistin.

Sakin, ijkuak panouayaj tlajyouilistin, Faraón kinnotsaya Moisés niman kijliaya: ‘Xtelti yejuin tlajyouilistli niman nikinkauilis mayakan israelitas’. San ika, ijkuak tlajyouilistli noteltiaya, kipatlaya tlen yokijtoka. Xkinkauiliaya mayakan. Sakin, ijkuak opanok tlajyouilistli majtlaktli, okimijli makisakan.

¿Tikimixmatstika katlejuamej majtlaktli tlajyouilistin? Matikimitakan.

Éxodo 4:27-31; 5:1-23; 6:1-13, 26-30; 7:1-13.



Tlajtoltilistin

  • ¿Tlenon okinemilijkej israelitas ijkuak Moisés iuan Aarón okichiujkej milagros?
  • Moisés iuan Aarón, ¿tlenon okijlikej Faraón, niman kenon okinnankili?
  • Ken nesi ipan tlaixkopinajli, ¿tlenon opanok ijkuak Aarón okitlajkal itlakouj?
  • ¿Kenon Jehová okititi Faraón, iueyilis? Niman, ¿tlenon okijto Faraón?
  • ¿Tlenon opanok sakin ijkuak onochiuj majtlaktli tlajyouilistli?

Okseki tlajtoltilistin

  • Xpoua Éxodo 4:27-31 niman 5:1-23.

    ¿Tlenon okijtosnek Faraón ijkuak okijto: “Xnikixmati Jehová” ? (Éxo. 5:2; 1 Sam. 2:12; Rom. 1:21).

  • Xpoua Éxodo 6:1-13, 26-30.

    ¿Tlenon kijtosneki ijkuak noijtoua ika Jehová xnoteititiaya itech Abrahán, Isaac niman Jacob? (Éxo. 3:13, 14; 6:3; Gén. 12:8).

    ¿Tlenon tikmachiliaj ijkuak tikitaj ika Jehová okitekitilti Moisés, maski yejua kimatiya ika xueliskia kichiuaskia yejon tekitl tlen kimakayaj? (Éxo. 6:12, 30; Luc. 21:13-15).

  • Xpoua Éxodo 7:1-13.

    Ijkuak Moisés iuan Aarón oyajkej ika yolchikaualistli itech Faraón okijlitoj tlen Jehová kichiuiliskia, ¿tlenon kinmachtia itekipanojkauan toTajtsin ipan yejuin tonaltin? (Éxo. 7:2, 3, 6; Hech. 4:29-31).

    ¿Kenon okiteititi Jehová ika san yejua nochi ueli kichiua, xijkon ken tajtsitsintin egipcios? (Éxo. 7:12; 1 Cró. 29:12).