Xuiya kampa tlen onka ijtik

Xuiya kampa tlen kipiya

Historia 29: Tleka ocholoj Moisés

Historia 29: Tleka ocholoj Moisés

XKITA Moisés; cholojtika itech país Egipto. ¿Ueli tikimita akin kitokaj? ¿Tikmatstika tleka kinekij kimiktiskej Moisés? Matikitakan tla ueli tikmatij tleka.

Moisés cholojtika itech Egipto

Moisés onoskalti ichan Faraón, tekiuaj ipan Egipto. Onochiuj yakaj akin ueyixtika niman tlamachilise. Moisés kimatiya ika yejua xegipcio katka niman akin yemelak itajuan, israelitas katkaj.

Se tonajli, ijkuak kipiaya 40 xiujtin, Moisés okinemili ontlachias kenon nemiyaj israelitas. Melak kintlajyouiltiayaj. Okitak se egipcio kenon kiuisokiya se israelita. Ijkuak Moisés okitak ika xakaj kitaya, okiuisok egipcio, niman okimikti. Moisés okitlalpacho yejuin tlakatl.

Uajmostla ijkuak Moisés oksejpa okimitato israelitas. Kinemiliaya ika ueliskia kinpaleuis niman maka sa makintekitiltikan kentla tlakeualtin. San ika, okimitak omemej israelitas nouisoktoyaj, niman Moisés okijli akin xkuajli techiuilijtoya: ‘¿Tleka tikuisoki mokniuj?’

Yejuin tlakatl okijto: ‘¿Akinon omitstlali kentla totlanauatijkauj noso juez? ¿Tinechmiktis ken otikmikti yejon egipcio?’

Aman Moisés onomojti, pampa yokimatkaj tlen okichiuili yejon egipcio. Noijki Faraón okikak niman okintitlan sekimej tlakamej makimiktitij Moisés. Ika yejon, Moisés ocholoj itech Egipto.

Ijkuak Moisés okis itech Egipto, oyaj uejka, kampa kixmatij kentla Madián. Ompa okimixmat ichanejkauan Jetró, niman ononamikti iuan se ichpoch, akin itoka Ziporá. Moisés onochiuj tlajpixketl niman kintlakuakualtiaya iborregos Jetró. Ochantik 40 xiujtin ipan Madián. Aman kipiaya 80 xiujtin. Kuakon se tonajli, ijkuak kintlakuakualtijtinemiya iborregos Jetró, opanok itlaj tlen okichiuj makipatla tlen kichiuaya Moisés ika inemilis. Matikitakan kenon opanok tlen xkeman panouaya.

Éxodo 2:11-25; Hechos 7:22-29.



Tlajtoltilistin

  • ¿Kanon onoskalti Moisés? Niman, ¿tlenon kimatiya itech itajuan?
  • ¿Tlenon okichiuj Moisés ijkuak kipiaya 40 xiujtin?
  • ¿Tlenon okijli Moisés se israelita akin teuisokiya, niman kenon okinankili?
  • ¿Tleka ocholoj Moisés itech Egipto?
  • ¿Kanon oyaj Moisés, niman akinon okixmat ompa?
  • ¿Tlenon okichiuj Moisés ipan 40 xiujtin kech onen Madián?

Okseki tlajtoltilistin

  • Xpoua Éxodo 2:11-25.

    Maski onomachti Egipto, ¿kenon okiteititi Moisés ika xkeman okikauj Jehová niman israelitas? (Éxo. 2:11, 12; Heb. 11:24).

  • Xpoua Hechos 7:22-29.

    ¿Tlenon tiuelij itech Moisés ijkuak san iselti okinek kinmakixtis israelitas itech Egipto? (Hech. 7:23-25; 1 Ped. 5:6, 10).