Xuiya kampa tlen onka ijtik

Xuiya kampa tlen kipiya

Historia 21: José kitlauelitaj ikniuan

Historia 21: José kitlauelitaj ikniuan

¡TIKITA kenon noyolkokoua yejuin telpochtli! Itoka José. Ikniuan kemach okominemakiltijkej yejuin tlakamej akin yauej Egipto. Ompa José yes se tlakeuajli. ¿Tleka itlakpaikniuan okichiujkej yejuin tlen xkuajli? Pampa kinexikolitaj José.

José kinemakatokej ikniuan

Intaj Jacob, melak kitlasojtlaya José. Ijkon okiteititi ijkuak okichijchiuili se kualtsin ueyak tlakentli. Ijkuak majtlaktli ikniuan akin yakatstiuej okitakej kenon Jacob melak kitlasojtlaya José, opeuj kinexikolitaj niman kitlauelitaj. San ika, onkatka okse tlen ika kitlauelitayaj.

José okipix ome temiktli. Ipan yejon ome temiktli tlen okitak José, ikniuan notlakuanketsayaj ixpan. Niman ikniuan melak okitlauelitakej ijkuak José okimijli tlenon okitemik.

Se tonajli, ijkuak ikniuan José kintlajpixtoyaj iborregos itaj, Jacob kitlajtlanilia José mauiya makinmitati kenon nemij. Ijkuak ikniuan José okontakej, sekimej okijtokej: ‘¡Matikmiktikan!’ San ika, Rubén akin yakatstiuj, kimijlia: ‘¡Maka, maka ijkon xchiuakan!’ Kuakon xijkon okichiuilijkej niman okontlajkalkej José ijtik pozo tlen xtlaj kipiaya atl. Kuakon onotlalijkej niman opeuj kijtoua tlenon kichiuiliskej imikniuj José.

Aman okimitakej uajlayaj ismaelitas. Judá okimijli itlakpaikniuan: ‘Matikiminemakiltikan ismaelitas’. Niman ijkon okichiujkej. ¡Okinemakakej José ika 20 platajtomin! ¡Melak xkuajli tlen okichiujkej, xokiknelijkej!

¿Tlenon kijliskej intaj? Ikniuan kimiktiaj se chivo niman itlaken José tlen melak kualtsin, okipolaktijkej ipan iyesyo yejon chivo. Kuakon kitkiliaj yejon tlakentli intaj niman kijtouaj: ‘Otiknextijkej yejuin. Xkita, niman xkijto tla xitlaken José’.

Jacob kita ika melauak yejua itlaken. ‘Se yolki melak xkuajli okimikti José’, okijto. Niman yejon tlen ikniuan José kinekij makinemili intaj. Jacob melak noyolkokoua. Miyek tonaltin choka. San ika, José xmiki. Matikitakan tlenon ipan nochiua kampa kuikaj.

Génesis 37:1-35.



Tlajtoltilistin

  • ¿Tleka José kinexikolitayaj ikniuan, niman tlenon okichiujkej?
  • ¿Tlenon kinekij ikniuan José kichiuiliskej, san ika, tlenon kijtoua Rubén?
  • ¿Tlenon panoua ijkuak yejkoj tlanemakakej ismaelitas?
  • ¿Tlenon kichiuaj ikniuan José niman ijkon makinemili intaj ika itelpoch omik?

Okseki tlajtoltilistin

  • Xpoua Génesis 37:1-35.

    Akin kichiuaj ken Cristo, ¿kenon uelis noijki ken José, kimijliskej akin tlayekanaj ijkuak xkuajli nochiua ipan tlanechikojli? (Gén. 37:2; Lev. 5:1; 1 Cor. 1:11).

    ¿Tleka ikniuan José okinemakakej? (Gén. 37:11, 18; Pro. 27:4; Sant. 3:14-16).

    ¿Tlenon okichiuj Jacob, tlen tinochimej tikchiuaj ijkuak yakaj miki? (Gén. 37:35).