Xuiya kampa tlen onka ijtik

Xuiya kampa tlen kipiya

Historia 14: Kitlatlataj itlaneltokil Abrahán

Historia 14: Kitlatlataj itlaneltokil Abrahán

¿UELI tikita tlen kichiujtika Abrahán? Yejua kipiya se cuchillo, nesi kimiktis ikoneuj. ¿Tleka? Kachtopa, matikitakan kenon okipixkej inkoneuj Abrahán niman Sara.

Abrahán kiuentlalijtika Isaac

Xkilnamiki, toTajtsin okimijlika ika kipiyaskiaj se inkoneuj. Maski nesiya xueliskiaj, pampa Abrahán iuan Sara melak youeuentsintiaka. Abrahán kineltokaya ika toTajtsin nochi tlen ouijtika nesi, ueli kichiua. Kuakon, ¿tlenon opanok?

Opanok se xiuitl sakin ijkuak toTajtsin yokijlika tlenon kichiuaskia. Kuakon ijkuak Abrahán kipiaya 100 xiujtin niman Sara 90, okipixkej se inkoneuj akin okitokayotijkej Isaac. ¡ToTajtsin okichiuj tlen okimijlika!

San ika, ijkuak Isaac yonoskaltijka, Jehová okitlatlatak Abrahán. Okinots: ‘¡Abrahán!’ Niman Abrahán okinankili: ‘¡Nikan ninemi!’ Kuakon toTajtsin okijli: ‘Xkuika mokoneuj, mosentekoneuj, Isaac, niman xuiya ipan tepetl tlen nimitsititis. Ompa xmikti mokoneuj niman xtemaka kentla uentli’.

¡Melak okiyolkoko yejuin Abrahán, pampa melak kitlasojtlaya ikoneuj! Niman xkilnamiki, toTajtsin yokijtoka ika ikoneuan Abrahán chantiskiaj Canaán. San ika, ¿kenon panoskia yejuin tla Isaac mikiskia? Maski Abrahán xkasikamatiya, okitlakamat toTajtsin.

Ijkuak oajsik ipan tepetl, Abrahán okichijchiuj kampa kiuentlaliskia Isaac, okisalo niman ompa okitlejkolti. Niman okikixti cuchillo tlen ika kimiktis ikoneuj. Kuakon se iiluikaktekitkauj toTajtsin okinots: ‘¡Abrahán, Abrahán!’ Niman Abrahán okinankili: ‘¡Nikan ninemi!’

‘Maka itlaj tikchiuilis mokoneuj’, okijli toTajtsin. ‘Aman nikmatstika ika melak ueyi motlaneltokil tlen tikpiya notech, pampa otiknek tinechmakas mokoneuj, mosentekoneuj.’

¡Abrahán melak ueyi tlaneltokijli kipiaya itech toTajtsin! Yejua kineltokaya ika xtlaj onkatka tlen toTajtsin xueliskia kichiuas, niman ika Jehová ueliskia kiyolitis ikoneuj Isaac. San ika, toTajtsin xkinekiya ika Abrahán makimikti Isaac; okichiuj se borrego masaliui kampa tlakoyoj, ompa nisiu kampa nemiya Abrahán niman okijli ika yejon makiuentlali maka Isaac.

Génesis 21:1-7; 22:1-18.



Tlajtoltilistin

  • ¿Tlenon okijto toTajtsin kichiuas itech Abrahán, niman kenon onochiuj tlen okijli?
  • Ken tikita ipan tlaixkopinajli, ¿kenon okitlatlatak toTajtsin itlaneltokil Abrahán?
  • ¿Tlenon okichiuj Abrahán maski xkasikamatiya tleka toTajtsin kinauatiaya ijkon makichiua?
  • ¿Tlenon opanok ijkuak Abrahán okikixti cuchillo tlen ika kimiktis ikoneuj?
  • ¿Kech ueyi katka itlaneltokil Abrahán itech toTajtsin?
  • ¿Tlenon toTajtsin okimakak Abrahán iuan ijkon makichiua se uentli, niman kenon okichiuj?

Okseki tlajtoltilistin

  • Xpoua Génesis 21:1-7.

    ¿Tleka Abrahán okichiuili circuncisión ikoneuj ipan chikueyi tonajli? (Rom. 4:11; Hech. 7:8).

  • Xpoua Génesis 22:1-18.

    ¿Kenon okiteititi Isaac ika kitlakamatiya itaj Abrahán, niman kenon nochiuaskia yejuin ika tlayekapan itech Jesús? (Gén. 22:7-9; 1 Cor. 5:7; Fili. 2:8, 9).