Xuiya kampa tlen onka ijtik

Xuiya kampa tlen kipiya

Historia 8: Uejkapamej tlakamej ipan tlaltikpaktli

Historia 8: Uejkapamej tlakamej ipan tlaltikpaktli

TLA yakaj melak uejkapan uajlaskia motech, ¿tlenon tiknemiliskia? ¡Ika yejua se uejkapan tlakatl! Iyeuejkaui yemelak onenkej tlaltikpakchanejkej ijkon. Ipan Biblia kijtoua ika intajuan katkaj iluikaktekitkej. San ika, ¿kenon ouel onochiuj yejon?

Uejkapamej akin xkuakualtin

Xkilnamiki, Satanás xkuajli iluikaktekitketl, kichiuaya maonia miyek tlauejli niman ika iiluikaktekitkauan toTajtsin, manochiuakan xkuakualtin. Sakin, sekimej iluikaktekitkej opeujkej kikakij Satanás. Okikaujkej intekiyo tlen toTajtsin yokinmakaka ipan iluikak. Ouajlakej ipan tlaltikpaktli niman onokuepkej tlaltikpakchanejkej. ¿Tikmatstika tleka?

Biblia kijtoua ika okimitakej siuamej kualtsitsintin nikan ipan tlaltikpaktli niman okinejkej imiuan nemiskej. Ika yejon, ouajlakej niman imiuan ononamiktijkej. Ipan Biblia kijtoua ika yejon melak xkuajli, pampa toTajtsin okinchijchiuj iluikaktekitkej manemikan ipan iluikak.

Ijkuak iluikaktekitkej niman insiuauan okinpixkej ikoneuan, yejuin xijkon katkaj ken oksekimej kokonej. Kanaj ijkuak otlakatkej xnesiya. San ika, onoskaltijtiajkej, niman onochiujkej melak kojtikej, niman ouejkapantiakej.

Yejuin uejkapamej tlakamej xkuakualtin katkaj. Niman pampa melak uejueyimej katkaj niman kojtikej, kintlajyouiltiayaj tlaltikpakchanejkej. Kinchiualtiayaj nochimej noijki ijkon manochiuakan xkuakualtin ken yejuamej.

Ijkuak omik Enoc, onen se tlakatl ipan tlaltikpaktli akin yolkuajli katka. Yejuin tlakatl itoka Noé. Yejua nochipa kichiuaya tlen toTajtsin kinekiya makichiua.

Aman toTajtsin okijli Noé ika yoyejkoka tonajli ijkuak kinpopoloskia nochimej akin xkuakualtin. San ika, toTajtsin kinmakixtiskia Noé iuan ichanejkauan niman miyekej yolkamej. Matikitakan kenon okichiuj.

Génesis 6:1-8; Judas 6.



Tlajtoltilistin

  • ¿Tlenon opanok ijkuak sekimej iluikaktekitkej okitokakej Satanás?
  • ¿Tleka sekimej iluikaktekitkej okikaujkej intekiyo ipan iluikak niman ouajtemokej ipan tlaltikpaktli?
  • ¿Tleka xkuajli ika iluikaktekitkej ouajlakej ipan tlaltikpaktli niman onochiujkej tlaltikpakchanejkej?
  • ¿Tleka xijki katkaj ken oksekimej kokonej inkoneuan iluikaktekitkej?
  • Ken tikita ipan tlaixkopinajli, ¿tlenon okichiujkej inkoneuan iluikaktekitkej ijkuak onochiujkej uejkapamej?
  • Sakin ijkuak omik Enoc, ¿akinon tlakatl yolkuajli onen ipan tlaltikpaktli, niman tleka kitlasojtlaya toTajtsin?

Okseki tlajtoltilistin

  • Xpoua Génesis 6:1-8.

    ¿Tlenon kijtoua Génesis 6:6 itech tlen uelis kimachilis Jehová ijkuak kita tlen tikchiuaj? (Sal. 78:40, 41; Pro. 27:11).

  • Xpoua Judas 6.

    ¿Kenon techpaleuiya ijkuak tikilnamikij iluikaktekitkej akin “okuajkaujteujkej iluikak kampa chantiyaj” ? (1 Cor. 3:5-9; 2 Ped. 2:4, 9, 10, NM).