Enoc

IJKUAK opeujkej miyekiyaj tlaltikpakchanejkej, miyekej okichiujkej tlen xkuajli ken Caín. San ika, se tlakatl xijki katka. Itoka Enoc. Yejua katka se tlakatl yolchikauak. Tlaltikpakchanejkej akin chantiyaj iyeualiyan melak xkuakualtin katkaj, maski ijkon, yejua ok kitekichiuiliaya toTajtsin.

¿Tejua tikmatstika tleka yejon tlaltikpakchanejkej kichiuayaj miyek tlemach tlen melak xkuajli? Xnemili yejuin: ¿Akinon okichiuj ika Adán iuan Eva maka makitlakamatikan toTajtsin, niman ijkon makikuakan tlakilyotl tlen yokimijlikaj maka makikuakan? Se xkuajli iluikaktekitketl. Ipan Biblia kitokayotia Satanás. Niman yejua kineki matokuepakan xkuakualtin tinochimej.

Otlachtek niman otemikti

Se tonajli Jehová okijli Enoc, makimijli tlaltikpakchanejkej tlen xkinekiyaj kikakiskej. Yejuin okimijli: ‘Yejkos tonajli ijkuak toTajtsin kinpopolos nochimej akin xkuakualtin’. Yejuin melak okinkualanij yejon tlatikpakchanejkej. Kanaj okiyejyekojkej kimiktiskej Enoc. Ika yejon, Enoc nonekiya mayolchikauak niman ijkon makimijli tlen toTajtsin kichiuas.

ToTajtsin xokikauili uejkaujtipan manemi Enoc, imiuan yejon akin xkuakualtin. San ouel onen 365 xiuitl. ¿Tleka tikijtouaj ika “san 365 xiuitl”? Pampa ipan yejon tonaltin tlakamej melak chikaujkej katkaj xijkon ken aman, niman uejkaujtipan nemiyaj. ¡Kema; Matusalén ikoneuj Enoc onen 969 xiuitl!

Tlaltikpakchanejkej kichiujtokej tlen xkuajli

Ijkuak yomik Enoc, tlaltikpakchanejkej melak oijtlakaujkej. Biblia kijtoua ika ‘nochi tlen yejuamej kinemiliayaj nochipa xkuajli katka’, niman ipan ‘tlaltikpaktli tentoya ika tlen xkuajli’.

¿Tejua tikmati tleka sajnoye onkatka miyek tlajyouilistli ipan yejon tonaltin? Pampa Satanás okinejnemili okse kenon nochimej siuamej niman tlakamej akin chantij ipan nochi tlaltikpaktli makichiuakan tlen melak xkuajli. Matikmatikan tlenon katka.

Génesis 5:21-24, 27; 6:5; Hebreos 11:5, NM; Judas 14,15.



Tlajtoltilistin

  • ¿Itech tlenon xijki katka Enoc ken oksekimej?
  • ¿Tleka tlaltikpakchanejkej kichiuayaj miyek tlen xkuajli ipan itonaluan Enoc?
  • ¿Tlenon xkuajli kichiuayaj tlaltikpakchanejkej? (Xkita tlaixkopinajli).
  • ¿Tleka nonekiya yeskia yolchikauak Enoc?
  • ¿Kech xiuitl nemiyaj tlaltikpakchanejkej ipan yejon tonaltin, san ika kech xiuitl onen Enoc?
  • ¿Tlenon opanok sakin ijkuak omik Enoc?

Okseki tlajtoltilistin

  • Xpoua Génesis 5:21-24, 27.

    ¿Kenon onouikak Enoc iuan Jehová? (Gén. 5:24).

    ¿Akinon kijtoua Biblia melak uejkaujtipan onen, niman kech xiuitl kipiaya ijkuak omik? (Gén. 5:27).

  • Xpoua Génesis 6:5.

    ¿Kenon melak otlaijtlakauj ipan tlaltikpaktli ijkuak omik Enoc, niman kenon noijki panoua ipan yejuin tonaltin? (2 Tim. 3:13).

  • Xpoua Hebreos 11:5, NM.

    ¿Katlejua ikualneskayo Enoc “okiyolpakti toTajtsin”, niman kenon okisato? (Gén. 5:22).

  • Xpoua Judas 14, 15.

    ¿Kenon akin kichiuaj ken Cristo uelis kixkopinaskej iyolchikaualis Enoc ijkuak teijliaj ika uajlas Armagedón? (2 Tim. 4:2; Heb. 13:6).