IJKUAK okiskej itech xochitlalpan Edén, Adán iuan Eva okipixkej miyek tlauejli. Melak chikauak tekitiyaj niman ijkon ueliskiaj tlakuaskej. Xnoskaltiayaj kojtin kualtsitsintin tlen tlatlakitiayaj, opeuj noskaltiaj miyek xiujtli tlen uitsyo. Yejuin opanok ijkuak Adán iuan Eva xokitlakamatkej toTajtsin niman xok iuan onouikakej.

Adán chikauak tekititika iuan ikoneuj

San ika, xsan yejon inpan onochiuj Adán iuan Eva, noijki opeujkej mikij. Xkilnamiki: toTajtsin okimijli ika mikiskiaj tla kikuaskiaj san itech se kojtli itlakilyo. Ijkon opanok, ipan yejon tonajli ijkuak okikuajkej opeujkej mikij. ¡Melak xtlamachilisejkej pampa xokitlakamatkej toTajtsin!

Nochi inkoneuan Adán iuan Eva otlakatkej ijkuak toTajtsin yokinuajkixtijka itech xochitlalpan Edén. Yejuin kijtosneki ika noijki ikoneuan ueuejtsintiskiaj niman mikiskiaj.

Tla Adán iuan Eva kitlakamatiskiaj Jehová, yejuamej niman inkoneuan pakiskiaj. Uelis nemiskiaj nochipa ika pakilistli ipan tlaltikpaktli. Xakaj ueuejtsintiskia nion kualoskia niman xakaj mikiskia.

ToTajtsin kineki tlaltikpakchanejkej manemikan nochipa ika pakilistli, niman kijtoua ika ajsis tonajli ijkuak ijkon yes. Xsan kualtsin yes nochi tlaltikpaktli, noijki nochimej tlaltikpakchanejkej xkualoskej. Nochimej kuajli nouikaskej iuan oksekimej niman iuan toTajtsin.

Eva iuan ikoneuan

San ika, Eva xok iuan nouikaya toTajtsin. Ika yejon, melak nokokouaya ijkuak kitlakatiliaya ikoneuan. Kema, pampa xokitlakamat Jehová melak otlajyoui, ¿xmelak?

Adán iuan Eva okinpixkej miyek inkoneuan siuamej niman tlakamej. Ijkuak otlakat kachtopa inkoneuj, okitokayotijkej Caín. Ika ome inkoneuj, okitokayotijkej Abel. ¿Tikmatstika tlenon inpan onochiuj?

Génesis 3:16-23; 4:1, 2; Apocalipsis 21:3, 4.



Tlajtoltilistin

  • ¿Kenon nemiyaj Adán iuan Eva ijkuak yokinuajkixtijkaj itech xochitlalpan Edén?
  • ¿Tlenon opeuj inpan nochiua Adán iuan Eva, niman tleka?
  • ¿Tleka inkoneuan Adán iuan Eva ueuejtsintiskiaj niman mikiskiaj?
  • Tla Adán iuan Eva kitlakamatiskiaj Jehová, ¿kenon nemiskiaj yejuamej niman inkoneuan?
  • Pampa xotetlakamat, ¿kenon otlajyoui Eva?
  • Ijkuak Adán iuan Eva okipixkej kachtopa ome inkoneuan, ¿kenon okintokayotijkej?
  • ¿Akinomej yejuin oksekimej kokonej tlen nesij ipan tlaixkopinajli?

Okseki tlajtoltilistin

  • Xpoua Génesis 3:16-23 niman 4:1, 2.

    Ijkuak toTajtsin okijto ika tlajli xok kipiyaskia itlateochiualis, ¿kenon onen Adán? (Gén. 3:17-19; Rom. 8:20, 22).

    Pampa Eva kijtosneki “nemilistli”, ¿tleka okinamik ijkon maitoka? (Gén. 3:20).

    ¿Kenon okiteititi Jehová ika okimikneli Adán iuan Eva maski yotlajtlakojkaj? (Gén. 3:7, 21).

  • Xpoua Apocalipsis 21:3, 4.

    ¿Katlejua tlen “onkatka” tiknekiskiaj mapopoliui?