¿TLENON tikita tlamantik noso sejneka ipan yejuin tlaixkopinajli? Kema, tlaltikpakchanejkej. Yejuamej kachtopa tlakatl iuan siuatl. ¿Akinon okinchijchiuj? ToTajtsin. ¿Tikmatstika ken itoka yejua? Jehová. Niman yejon tlakatl iuan siuatl okintokayotijkej Adán iuan Eva.

Adán iuan Eva nemij ipan xochitlalpan Edén

ToTajtsin ika tlalpoktli, okichijchiuj se tlalnakayotl tlen xkipiya tlajtlakojli. Jehová ijkon okichijchiuj Adán. Kuakon okiyekailpits yejuin tlakatl, niman Adán oyoliuj.

ToTajtsin kipiaya se tekitl tlen kimakaskia Adán. Okijli ika nochi tlatlamantikej noso sesejneka yolkamej makintlalili intokayo. Adán kanaj melak miyek tonaltin opanok, kuajli okimixtlalo yolkamej niman ijkon okintlalili intokayo nochimej. Ijkuak Adán ijkon kichiuaya, okitak itlaj ipan yolkamej. ¿Tikmatstika tlenon katka yejuin?

Nochi yolkamej ixnamikyojkej katkaj. Nemiyaj elefantes iuan elefantas, niman nemiyaj leones niman leonas. San ika, Adán xkipiaya ixnamik. Ika yejon, Jehová okichiuj ika Adán kuajli makochi, niman okikixtili se iyelchikiuj. Ika iyelchikiuj Adán, Jehová okichijchiuili se siuatl akin onochiuj isiuauj.

¡Melak opak Adán! ¡Niman noijki melak opak Eva pampa nemiya ipan yejuin kualtsin xochitlalpan! Aman ueliskiaj kinpiyaskiaj inkoneuan niman san sekan nemiskej ika paktli.

Jehová kinekiya ika Adán iuan Eva manemikan nochipa. Kinekiya ika nochi tlaltikpaktli makikualtsintilikan kentla xochitlalpan Edén. ¡Ijkuak okinemilijkej ika yejuamej kichiuaskej yejuin tekitl, Adán iuan Eva melak okinpakti! ¿Tikuelitaskia titlapaleuiskia manochiua yejuin tlaltikpaktli se kualtsin xochitlalpan? San ika, Adán iuan Eva xouejkauj inpakilis. Matikitakan tleka.

Salmo 83:18; Génesis 1:26-31; 2:7-25.



Tlajtoltilistin

  • ¿Tlen tlamantik noso sejneka tikita ipan tlaixkopinajli tlen onka ipan historia 3 niman itech tlaixkopinajli tlen onka ipan historia 2?
  • ¿Akinon okichijchiuj kachtopa tlakatl, niman kenon itoka katka yejuin tlakatl?
  • ¿Tlen tekitl okijli toTajtsin makichiua Adán?
  • ¿Tleka toTajtsin okichiuj ika Adán kuajli makochi?
  • ¿Kech tonaltin uelis nemiskiaj Adán iuan Eva, niman tlen tekitl kinekiya Jehová makichiuakan?

Okseki tlajtoltilistin

  • Xpoua Salmo 83:18.

    ¿Kenon itoka toTajtsin niman tlen tlanauatijkayotl kipiya ipan tlaltikpaktli? (Jer. 16:21; Dan. 4:17).

  • Xpoua Génesis 1:26-31.

    Ipan chikuasen tonajli ijkuak otlamito tlachijchiua toTajtsin ipan tlaltikpaktli, ¿tlenon okichijchiuj niman tleka tlamantik noso sejneka katka itech yolkamej? (Gén. 1:26).

    ¿Tlen tlakuajli Jehová okinmakak tlaltikpakchanejkej niman yolkamej? (Gén. 1:30).

  • Xpoua Génesis 2:7-25.

    ¿Tlenon nonekiya kichiuas Adán niman ijkon kintlalilis intokayo yolkamej? (Gén. 2:19).

    ¿Kenon techpaleuiya Génesis 2:24 matikasikamatikan tlen kinemilia Jehová ijkuak yakaj nonamiktia, noxeloua noso tekaua? (Mat. 19:4-6, 9).