Xuiya kampa tlen onka ijtik

Xuiya kampa tlen kipiya

Historia 10: Ueyi Apachiuilistli

Historia 10: Ueyi Apachiuilistli

KIYAUAK ipan yejon akajli, tlaltikpakchanejkej xkikajkauayaj kichiuaj tlen xkuajli. Ok xkineltokayaj tla yejkoskia Apachiuilistli. Uelis kanaj melak ouetskakej ken xkeman kichiuayaj. San ika, xouejkaujkej ouetskakej.

Tlaltikpakchanejkej niman yolkamej melak nomojtiaj pampa sa achijtsin poliui apachiuiskej

Opeuj kiyaui. Okiyauj ijkon ken ijkuak se kitoyaua miyek atl ika se ueyi kontli. ¡Melak tlen okijtoka Noé! San ika, xok yakaj ueliskia kalakis ijtik akajli. ToTajtsin Jehová kuajli yokitsaujka puerta.

Nimantsin nochi tlajli oapachiuj. Atl nesiya kentla atentli tlen uejueyimej. Kinuiuitlaya kojtin, kinmapeuaya uejueyimej temej niman melak tlakakalatsaya. Tlaltikpakchanejkej onomojtijkej. Oyajkej niman otlejkokej kampa melak tlakpak. ¡Melak kinekiyaj kitlakamatiskiaj tlen okimijli Noé niman kalakiskiaj ijtik akajli, ijkuak xkitsakuayaj puerta! San ika, aman xok ueliyaj.

Atl opeuj tlejkoua. Ika 40 tonaltin niman 40 yeuajli okiyauj. Opeuj tlapachiuij tepemej niman tlen melak uejkapan katkaj, oapachiujkej. Ijkon onochiuj ken toTajtsin yokijtoka, nochimej tlaltikpakchanejkej niman yolkamej akin xnemiyaj ijtik akajli omijkej. Niman nochi akin nemiya ijtik akajli omakis.

Noé niman ikoneuan yokichiujkaj kuajli tekitl pampa okichijchiujkej akajli. Atl opeuj kajkokui akajli niman onokauj ixko atl. Kuakon, ijkuak onokajkauj ika kiyaui, Tonajli opeuj petlani. ¡Melak kualtsin nesiya! San onkatka melak ueyi atl nochiuiyan. Niman san akajli ueli nesiya ixko atl.

Akajli yauj ipan atl

Xok nemiyaj tlakamej uejkapamej. Xok kintlajyouiltiskiaj tlaltikpakchanejkej. Nochimej yomijkaj, inminan niman oksekimej tlaltikpakchanejkej xkuakualtin. San ika, ¿tlenon inpan onochiuj intajuan?

Intajuan yejon uejkapamej, xmelak katkaj tlaltikpakchanejkej ken tejuamej. Yejuamej katkaj iluikaktekitkej tlen ouajtemokaj ipan tlaltikpaktli niman onemikoj kentla tlakamej. Ika yejon, ijkuak oapachiuilok, xomijkej ken oksekimej tlaltikpakchanejkej. Okikaujteujkej iminakayo tlen kipiayaj, niman oksejpa oyajkej iluikak kentla iluikaktekitkej. San ika, xok okinkauilijkej manochiuakan oksejpa ichanejkauan toTajtsin. Onochiujkej iiluikaktekitkauan Satanás. Ipan Biblia kintokayotia yejuin iluikaktekitkej, xkuakualtin espíritus.

ToTajtsin aman okichiuj maejeka, niman atl opeuj temoua. Makuijli metstli sakin akajli osaliuj ipan se tepetl. Opanokej miyek tonaltin, niman akin nemiyaj ijtik akajli oontlachixkej kiyauak niman okitakej ikuatipanuan tepemej. Atl ok otemotia ika yolik.

Kuakon Noé okikauili makisa itech akajli se tototl tlen kitokayotiaj kakalotl. Yejua patlaniya achijtsin niman oksejpa nokuepaya pampa xkinextiaya kanon uelis nokauas. Miyekpa ijkon okichiuj, niman nochipa nokuepaya ipan akajli.

Se paloma

Noé kinekiya kimatis tla yotemok atl, kuakon okititlan se paloma. Yejua noijki onokuep, pampa xokinexti kanon nokauas. Noé oksejpa okititlan, niman ijkuak onokuep, ipan itenchochopiya kuajkuiya ixiujyo olivo. Atl yotemoka. Noé okititlan ika yexpa, niman aman kema okinexti kanon nokauas.

Kuakon toTajtsin okinots Noé. Okijli: ‘Xkisa itech akajli. Xkinuika nochi mochanejkauan niman yolkatsitsintin’. Yopanoka se xiuitl ika nemiyaj ijtik akajli. ¡Xnemili kenon melak opajkej ika xomijkej niman oksejpa nemiyaj kiyauak!

Génesis 7:10-24; 8:1-17; 1 Pedro 3:19, 20, NM.



Tlajtoltilistin

  • ¿Tleka xakaj ouel okalak ijtik akajli ijkuak opeuj kiyaui?
  • ¿Kech tonajli niman yeuajli okichiuj Jehová makiyaui, niman kech ueyi otlejkok atl?
  • ¿Tlenon opanok ika akajli ijkuak atl opeuj tlejkoua niman opeuj apachiui nochi tlaltikpaktli?
  • ¿Omakiskej uejkapamej tlakamej ipan Apachiuilistli? ¿Tlenon inpan onochiuj intajuan?
  • ¿Tlenon ipan onochiuj akajli ijkuak opanok makuijli metstli?
  • ¿Tleka Noé okikauili makisa se kakalotl ipan akajli?
  • ¿Kenon okimat Noé ika yotemoka atl?
  • Ijkuak Noé niman ichanejkauan yopanokaj se xiuitl ika nemiyaj ijtik akajli, ¿tlenon okijli toTajtsin makichiua Noé?

Okseki tlajtoltilistin

  • Xpoua Génesis 7:10-24.

    ¿Akinomej omijkej ijkuak oapachiuilok ipan yejuin tlaltikpaktli? (Gén. 7:23).

    Ijkuak opanok Apachiuilistli, ¿kech ouejkauj ika otemok atl? (Gén. 7:24).

  • Xpoua Génesis 8:1-17.

    ¿Kenon kiteititia Génesis 8:17 ika xonopatlak tlen toTajtsin kineki kichiuas ipan tlaltikpaktli? (Gén. 1:22).

  • Xpoua 1 Pedro 3:19, 20.

    ¿Tlenon okimijlikej inpan nochiuas iluikaktekitkej ijkuak oksejpa oyajkej iluikak? (Jud. 6).

    Itech tlen inpan onochiuj Noé niman ichanejkauan, ¿kenon techyolchikaua ika Jehová ueli kimakixtia ikalpan? (2 Ped. 2:9).