NOCHI tlen kuajli, ualeua itech toTajtsin. Yejua okichijchiuj Tonajli tlen techtlauiluiya ika tonajli, niman Metstli iuan sitlalimej tlen petlanij ika yeuajli. Niman tlaltikpaktli kampa tichantiskej.

San ika, Tonajli, Metstli, sitlalimej niman tlaltikpaktli xyejua kachtopa tlen toTajtsin okichijchiuj. ¿Tikmatstika tlenon kachtopa okichijchiuj? Espíritus akin tlachiaj kentla yejua. Yejuamej xuelij tikimitaj, ken toTajtsin xueli tikitaj. Biblia kintokayotia iluikaktekitkej. ToTajtsin okinchijchiuj iluikaktekitkej iuan machantikan iluikak.

Kachtopa iluikaktekitketl akin toTajtsin okichijchiuj, tlamantik noso sejneka katka itech oksekimej iluikaktekitkej. Yejua kachtopa ikoneuj toTajtsin, niman otekit iuan iTaj. Okipaleui toTajtsin okichijchiuj okseki tlemach. Iuan okichijchiuj Tonajli, Metstli, sitlalimej niman noijki yejuin tlaltikpaktli.

Kuakon, ¿kenon katka yejuin tlaltikpaktli? Ijkuak toTajtsin kemach opeuj tlachijchiua xakaj ueliya chantiya ipan tlaltikpaktli. San tentoya ika atl. San ika, toTajtsin kinekiya ika ipan tlaltikpaktli manemikan tlaltikpakchanejkej. Ika yejon opeuj techyektlalilia. ¿Tlenon okichiuj?

Kachtopa, tlaltikpaktli kipolouaya tlauijli. Ika yejon toTajtsin okichiuj ika itlauil Tonajli makitlauilui tlaltikpaktli. Okichiuj yejuin, pampa kinekiya maonia tonajli niman yeuajli. Sakin okichiuj matemo atl niman tlajli manokaua tlakpak.

Kachtopa xtlaj onkatka ipan tlajli. Katka kentla yejuin tlaixkopinajli tlen nikan tikita. Xtlaj katkaj xochimej, kojtin nion yolkatsitsintin. Niman xnemiyaj michimej ijtik atl. ToTajtsin chikauak tekitiskia niman ijkon ipan tlaltikpaktli kuajli nemiskiaj tlaltikpakchanejkej iuan yolkatsitsintin.

Jeremías 10:12; Colosenses 1:15-17; Génesis 1:1-10.

Xtlaj nemilistli ipan tlaltikpaktli


Tlajtoltilistin

  • ¿Akinon okichijchiuj nochi tlen kuajli onka? ¿Uelis tikijtos san seki tlen okichijchiuj toTajtsin?
  • ¿Tlenon kachtopa okichijchiuj toTajtsin?
  • ¿Tleka kachtopa iluikaktekitketl tlamantik noso sejneka katka?
  • Xkijto kenon katka tlaltikpaktli ijkuak toTajtsin xpeuaya tlachijchiua (xkita tlaixkopinajli).
  • ¿Kenon opeuj kiyektlalia toTajtsin tlaltikpaktli, niman ijkon kuajli manemikan yolkamej niman tlaltikpakchanejkej?

Okseki tlajtoltilistin

  • Xpoua Jeremías 10:12.

    ¿Katlejua ikualneskayouan techititia toTajtsin itech tlen okichijchiuj? (Isa. 40:26; Rom. 11:33).

  • Xpoua Colosenses 1:15-17.

    ¿Tlen tekitl okichiuj Jesús ijkuak toTajtsin opeuj tlachijchiua? Niman itech tlen okichiuj, ¿tlenon kichiua matiknemilikan itech Jesús?

  • Xpoua Génesis 1:1-10.

    ¿Akinon okichijchiuj tlaltikpaktli? (Gén. 1:1).

    ¿Tlenon okichiuj toTajtsin ipan kachtopa tonajli ijkuak otlachijchiuj? (Gén. 1:3-5).

    ¿Tlenon okichiuj toTajtsin ipan ome tonajli ijkuak otlachijchiuj? (Gén. 1:7, 8).