Xuiya kampa tlen onka ijtik

Xuiya kampa tlen kipiya

Historia 9: Noé kichijchiua se akajli

Historia 9: Noé kichijchiua se akajli
Tlaltikpakchanejkej kiuejuetskiliaj Noé

NOÉ kipiaya se isiuauj niman yeyi ikoneuj. Ikoneuan intoka katka Sem, Cam, niman Jafet. Kipiayaj nochimej insiuauj. Kuakon chikomemej katkaj ichanejkauan Noé.

Aman toTajtsin okijli Noé makichijchiua tlen xakaj kixmatiya. Okijli makichijchiua se ueyi akajli. Akajli melak ueyi katka kentla se barco, kentla se caja ueyi niman ueyak. ‘Yeyi nepantik xchijchiua’, okijto toTajtsin, ‘niman makipiya cuartos’. Ipan yejon cuartos kalakiskiaj Noé iuan ichanejkauan niman tlakuajli tlen nochimej kikuaskiaj.

ToTajtsin okijli Noé ika ken kichijchiuas akajli maka makalaki atl. Okijto: ‘Nikchiuas melak makiyaui, maapachiuilo niman nikinpopolos nochi tlaltikpakchanejkej. Akin xnemis ijtik akajli, mikis’.

Noé iuan ikoneuan okitlakamatkej toTajtsin niman opeujkej kichijchiuaj. San ika, oksekimej tlaltikpakchanejkej san ouejuetskakej. Xokikajkaujkej kichiuayaj tlen xkuajli. Xakaj okineltokak ijkuak Noé okimijli tlen toTajtsin kichiuaskia.

Ichanejkauan Noé kinuikaj yolkamej niman kitkij tlakuajli ijtik akajli

Pampa melak ueyi katka, ouekaujkej kichijchiuaj. Sakin ijkuak miyek xiuitl yopanok, otlankej. Aman toTajtsin okijli Noé makinuika yolkamej ijtik akajli. Okijli makuika san ome itech sekimej yolkamej, tlakatl niman siuatl. San ika, itech okseki yolkamej, toTajtsin okijli makuika chikome. Noijki okijli Noé, makinsentlali nochi tlatlamantik noso sesejneka totomej. Noé okichiuj ijkon ken toTajtsin okijli.

Sakin, Noé iuan ichanejkauan noijki okalajkej ipan akajli. ToTajtsin okitsauk puerta. Ijtik akajli Noé iuan ichanejkauan otlamachixkej. Xnemili ika tejua ompa tinemi, titlamachixtika. ¿Uajlaskia se apachiuilistli ken yokijtoka toTajtsin?

Génesis 6:9-22; 7:1-9.



Tlajtoltilistin

  • ¿Kechmej ichanejkauan katkaj Noé, niman kenon intoka katka yeyimej ikoneuan?
  • ¿Tlenon okijli toTajtsin makichijchiua Noé tlen xakaj kixmatiya, niman tleka?
  • ¿Tlenon okichiujkej tlaltikpakchanejkej ijkuak Noé okiminojnots itech akajli?
  • ¿Tlenon okijli toTajtsin makichiua Noé ika yolkamej?
  • Ijkuak toTajtsin okitsauk akajli, ¿tlenon okichiujkej Noé niman ichanejkauan?

Okseki tlajtoltilistin

  • Xpoua Génesis 6:9-22.

    ¿Tlenon okipaleui Noé niman ijkon manochiua se kuajli itekipanojkauj toTajtsin? (Gén. 6:9, 22).

    ¿Tlenon kinemilia Jehová ijkuak nouisokilo, niman kenon yejuin techpaleuiya ijkuak tiktlapejpeniskej tlen tikmauisoskej? (Gén. 6:11, 12; Sal. 11:5).

    ¿Kenon uelis tikixkopinaskej Noé ijkuak tikseliaj tlanauatiltin itech ikalpan toTajtsin? (Gén. 6:22; 1 Juan 5:3).

  • Xpoua Génesis 7:1-9.

    ¿Kenon techpaleuiya ika Jehová okitak Noé kentla se tlakatl yolmelauak, maski tlajtlakole katka? (Gén. 7:1; Pro. 10:16; Isa. 26:7).