Xuiya kampa tlen onka ijtik

Xuiya kampa tlen kipiya

Historia 110: Timoteo itlapaleuijkauj Pablo

Historia 110: Timoteo itlapaleuijkauj Pablo

YEJUIN telpochtli akin nikan tikita iuan Pablo itoka Timoteo. Yejua chanti iuan ichanejkauan ipan ueyikalpan Listra. Inan itoka Eunice niman iabuela itoka Loida.

Yejuin ika yexpa Pablo otetlajpaloto ipan ueyikalpan Listra. Yopanok kanaj se xiuitl ijkuak ompa, Pablo iuan Bernabé kachtopa opeujkej tenojnotsaj. Aman Pablo yonokuep iuan Silas, akin iuan nouika.

Timoteo iuan Pablo

¿Tikmatstika tlenon Pablo kijlia Timoteo? ‘¿Tikuelitaskia nouan tias niman iuan Silas?’, kitlajtoltia. ‘Uelis titechpaleuis matikinnojnotsakan akin uejka chantij.’

‘Kema’, tlanankilia Timoteo, ‘nikuelitaskia nias’. Ika yejon, san xuejkaui Timoteo kinkaujteua ichanejkauan niman yauj iuan Pablo niman Silas. San ika, amantsin matikitakan tlenon ipan nochiujtika Pablo niman sakin tomachtiskej itech tlen ipan onochiuj ijkuak oyaj uejka otenojnotsato. Yopanok 17 xiuitl ijkuak Jesús ixpan onoteititi Pablo ipan ojtli tlen teuika Damasco.

¡Xkilnamiki, Pablo ouajla Damasco pampa kinekiya tlemach tlen xkuajli kinchiuilis inomachtijkauan Jesús, san ika, aman yejua yonochiuj inomachtijkauj Jesús! Sakin, sekimej akin kitlauelitaj Pablo kitejtemouaj pampa kinekij kimiktiskej, san ika, inomachtijkauan Jesús kipaleuiyaj macholo. Ika se chikijtli, kuajtemoltiaj ipan tepantli tlen kiyeualoua ueyikalpan niman ijkon kikixtiaj.

Aman, Pablo panoua ipan Antioquía kampa tenojnotsa. Nikan inomachtijkauan Jesús peuaj kintokayotiaj ken akin kichiuaj ken Cristo. Sakin, Pablo iuan Bernabé kisaj itech Antioquía niman kintitlanij mauiyan matenojnotsatij ipan países tlen uejka nokauaj. Se ueyikalpan kampa yauej itoka Listra, ompa chanti Timoteo.

Sakin ijkuak yopanok kanaj se xiuitl, Pablo onokuep ipan ueyikalpan Listra ijkuak ika okpa oyajka okiteijlito kuajli tlajtoltin ipan miyek kalpamej. Timoteo yauj iuan Pablo niman Silas, ¿tikmatstika kanon? Xkita ipan mapa, niman matikitakan kanon yauej.

Kachtopa, yauej ipan ueyikalpan Iconio, tlen nisiu nokaua, kuakon yauej Antioquía. Sakin yauej Troas, aman panouaj Filipos, Tesalónica niman Berea. ¿Tikita ipan mapa kanon nokaua Atenas? Pablo ompa tenojnotsa. Ipan ueyikalpan Corinto, tenojnotsa se xiuitl uan tlajko. Noijki yauj Éfeso niman nikan xuejkauij. Kuakon nokuepaj Cesarea ipan se barco, niman yauej ika tlakpak ipan ueyikalpan Antioquía, kampa Pablo nokaua.

Ijkon ken tikitaj, Timoteo melak miyek kilómetros nejnemi iuan Pablo, kipaleuijtinemi tenojnotsaj “kuajli tlajtoltin” niman okichiujkej maoniakan miyek tlanechikoltin. Ijkuak tejua timoskaltis, ¿tiktekichiuilis nochipa toTajtsin ijkon ken Timoteo?

Hechos 9:19-30; 11:19-26; tlaxeloltin uejueyimej 13 ontlami ipan 17; 18:1-22.

Se mapa

1. Roma; 2. Malta; 3. Berea; 4. Tesalónica; 5. Corinto; 6. Filipos; 7. Atenas; 8. Creta; 9. Troas; 10. Éfeso; 11. Mileto; 12. Colosas; 13. Antioquía; 14. Iconio; 15. Listra; 16. Chipre; 17. Antioquía; 18. Cesarea; 19. Jope; 20. Damasco; 21. Jerusalén; 22. Mar Grande (Mediterráneo)



Tlajtoltilistin

  • Ipan tlaixkopinajli, ¿akinon yejuin telpochtli, kanon chanti niman kenon itoka inan niman iabuela?
  • ¿Kenon Timoteo kinankilia Pablo ijkuak kitlajtoltia tla kuelitaskia iuan yas niman iuan Silas ontenojnotsaskej uejka?
  • ¿Kanon inomachtijkauan Jesús peuaj kintokayotiaj ken akin kichiuaj ken Cristo?
  • ¿Ipan tlen uejueyimej kalpamej yauej Pablo, Silas niman Timoteo ijkuak kisaj itech Listra?
  • ¿Kenon Timoteo kipaleuiya Pablo, niman tlenon noneki manotlajtoltikan telpokamej ipan yejuin tonaltin?

Okseki tlajtoltilistin

  • Xpoua Hechos 9:19-30.

    ¿Kenon Pablo okiteititi tlamachilistli ijkuak okitlaueltokakej? (Hech. 9:22-25, 29, 30; Mat. 10:16).

  • Xpoua Hechos 11:19-26.

    Itech tlen kijtoua ipan Hechos 11:19-21, 26, ¿kenon techititia ika iespíritu santo Jehová kinyekana akin tenojnotsaj?

  • Xpoua Hechos 13:13-16, 42-52.

    Itech tlen kijtoua Hechos 13:51, 52, ¿kenon techititia ika inomachtijkauan Jesús xokikaujkej kitekichiuiliaj toTajtsin maski okintlaueltokakej? (Mat. 10:14; Hech. 18:6; 1 Ped. 4:14).

  • Xpoua Hechos 14:1-6, 19-28.

    ¿Kenon techpaleuiya tlajtojli ‘okomintlatlautijkej itech Jehová’ ika maka melak matotekipachokan ijkuak tikinpaleuiskej akin peuaj nomachtiaj? (Hech. 14:21-23; 20:32; Juan 6:44).

  • Xpoua Hechos 16:1-5.

    Pampa Timoteo okinek makichiuilikan circuncisión, ¿kenon techititia ika noijki noneki matikchiuakan ‘nochi ipampa kuajli tlajtoltin’ ? (Hech. 16:3; 1 Cor. 9:23; 1 Tes. 2:8).

  • Xpoua Hechos 18:1-11, 18-22.

    Itech tlen kijtoua Hechos 18:9, 10, ¿kenon nesi ika Jesús kiyekantika manotenojnotsa, niman kenon yejuin techyolseuiya aman? (Mat. 28:20).