Xuiya kampa tlen onka ijtik

Xuiya kampa tlen kipiya

Historia 108: Ipan ojtli tlen yauj Damasco

Historia 108: Ipan ojtli tlen yauj Damasco

¿TIKMATSTIKA akinon yejuin tlakatl akin tlajkaltok ipan tlajli? Itoka Saulo. Yejua akin okintlajpix intlakenuan akin okitemojmotlakej Esteban. ¡Xkita yejon tlauijli tlen melak petlani! ¿Tlenon panotika?

Sakin ijkuak yokimiktijkej Esteban, Saulo kintejtemojtinemi inomachtijkauan Jesús niman ijkon kinchiuilis tlen xkuajli. Kalaki ijtik inkaluan, kinkixtia niman kintsakua. Miyekej inomachtijkauan Jesús cholouaj niman yauej ipan oksekimej uejueyimej kalpamej, ompa tenojnotsaj itech “kuajli tlajtoltin”. San ika, Saulo yauj ipan okseki uejueyimej kalpamej komintejtemoua inomachtijkauan Jesús. Aman yauj ipan ueyikalpan Damasco. San ika, ipan ojtli, yejuin tlen panoua:

Ijkuak yejuamej yauej ipan ojtli, se tlauijli tlen ualeua iluikak kiyeualoua Saulo. Yejua uetsi, ken nikan tikitaj. Kuakon kakisti se tlajtojli tlen kijtoua: ‘¡Saulo, Saulo! ¿Tleka tinechtlajyouiltijtinemi?’ Yejon tlakamej akin nemij iuan Saulo kitaj tlauijli niman kikakij yejon tlajtojli, san ika, xkasikamatij tlenon kijtoua.

Saulo xueli tlachia ipampa tlauijli

‘¿Akinon tejua[…]?’, kijtoua Saulo.

‘Nejua niJesús, akin tinechtlajyouiltijtinemi’, kijtoua. Jesús kijtoua yejuin pampa ijkuak Saulo kinchiuilia tlemach tlen xkuajli inomachtijkauan, Jesús kimachilia kentla yejua kichiuilijtokej.

Aman Saulo tetlajtoltia: ‘¿Tlenon noneki nikchiuas, noTeko?’

‘Xmokuiteua niman xuiya Damasco’, kijtoua Jesús. ‘Ompa mitsijliskej tlenon tikchiuas.’ Ijkuak Saulo nokuiteua niman kintlapoua ixtololojuan, xtlaj ueli kita. ¡Xok ueli tlachia! Ika yejon, tlakamej akin iuan nemij kuikaj ipan ima niman yauej ipan ueyikalpan Damasco.

Aman Jesús kinotsa se inomachtijkauj akin chanti Damasco niman kijlia: ‘Xmokuiteua, Ananías. Xuiya ipan ojtli tlen itoka Melajki. Kampa chanti Judas niman xtetlajtolti itech se tlakatl itoka Saulo. Nejua yoniktlapejpeni pampa kichiuas se ueyi tekitl’.

Ananías tetlakamati. Ijkuak nemi itech Saulo, kintlalia imauan ipan, nimantsin itlaj tlen tlachia kentla ixkakauayo uetsi itech ixtololojuan Saulo, niman oksejpa ueli tlachia. Kuakon Ananías kijlia: ‘ToTeko onechajtitlan niman ijkon xtlachia oksejpa, noijki tikpiyas espíritu santo’.

Saulo melak kuajli kinnojnotsa tlaltikpakchanejkej ipan miyek países. Sakin kixmatij kentla Pablo itlatitlankauj Jesús, niman tiuelij miyek tlemach itech yejua. San ika, kachtopa matikitakan tlen toTajtsin kikauilia makichiua Pedro.

Hechos 8:1-4; 9:1-20; 22:6-16; 26:8-20.



Tlajtoltilistin

  • ¿Tlenon kichiua Saulo ijkuak yokimiktijkej Esteban?
  • ¿Tlenon ipan nochiua Saulo ipan ojtli ijkuak yauj Damasco?
  • ¿Tlenon Jesús kinauatia makichiua Saulo?
  • ¿Tlenon Jesús kijlia makichiua Ananías, niman kenon Saulo oksejpa ueli tlachia?
  • Sakin, ¿kenon okitokayotijkej Saulo, niman tlen tekitl okichiuj?

Okseki tlajtoltilistin

  • Xpoua Hechos 8:1-4.

    Pampa okintlaueltokakej akin kichiuayaj ken Cristo, ¿kenon yejuin okichiuj manoteijli nochiuiyan kuajli tlajtoltin, niman kenon aman noijki nochiua? (Hech. 8:4; Isa. 54:17).

  • Xpoua Hechos 9:1-20.

    ¿Akinomej yeyi grupos Jesús kinekiya makinnojnotsa Saulo? (Hech. 9:15; 13:5; 26:1; 27:24; Rom. 11:13).

  • Xpoua Hechos 22:6-16.

    ¿Kenon noijki uelis tikchiuaskej ken Ananías, niman tleka noneki ijkon matikchiuakan? (Hech. 22:12; 1 Tim. 3:7; 1 Ped. 1:14-16; 2:12).

  • Xpoua Hechos 26:8-20.

    Pampa Saulo opeuj kichiua ken Cristo, ¿tleka yejuin kiyolchikaua se tokniuj akin ixnamik xtlaneltoka? (Hech. 26:11; 1 Tim. 1:14-16; 2 Tim. 4:2; 1 Ped. 3:1-3).