Xuiya kampa tlen onka ijtik

Xuiya kampa tlen kipiya

Historia 107: Kitemojmotlaj Esteban

Historia 107: Kitemojmotlaj Esteban

YEJUIN tlakatl akin yonotlakuankets itoka Esteban. Yejua se inomachtijkauj Jesús. ¡San ika, xkita tlenon ipan nochiujtika! Yejuin tlakamej kitemojmotlaj. ¿Tleka melak kitlauelitaj Esteban niman ijkon kichiuiliaj? Matikitakan.

Esteban kitemojmotlatokej

ToTajtsin kuajpaleuijtiuj Esteban makichiua milagros. Yejuin tlakamej xkuelitaj tlen kichiua, kixnamikij pampa kinmachtia tlaltikpakchanejkej tlen melauak. San ika, toTajtsin kimaka Esteban ueyi tlamachilistli, niman yejua teititia ika yejuin tlakamej tlamachtiaj tlen xmelauak. Yejuin kichiua melak makualanikan, ika yejon, kasij niman kintlakeuiliaj sekimej tlaltikpakchanejkej makijtokan tlen xmelauak itech Esteban.

Ueyi teopixki kitlajtoltia: ‘¿Melak tlen kijtouaj?’ Esteban tlanankilia ika se kuajli tlamachtijli, tlen kisa itech Biblia. Ijkuak ontlami kimijlia ika yeuejkaui, tlakamej xkuakualtin okintlauelitakej iteotlajtokauan toTajtsin. Noijki kijtoua: ‘Nemejuamej noijki nenkichiuaj. Onenkimiktijkej Jesús, itekipanojkauj toTajtsin, niman xnenkitlakamatij itlanauatiluan toTajtsin’.

¡Yejuin kichiua melak makualanikan tlamachtijkej ipan tlanauatijli! Pampa melak kualanij, kintejchikij intlanuan. San ika, ijkuak Esteban ajkotlachia, kijtoua: ‘¡Xkitakan! Nikita Jesús nemi ipan iyekma toTajtsin ne iluikak’. Yejuin tlakamej nonakastsakuaj niman kiuisokij Esteban. Kuakon kitejkoyotsaj niman kikixtiaj itech ueyikalpan.

Ompa nokixtiliaj intlaken tlen xmaueueyak niman kinmakaj yejuin telpochtli akin itoka Saulo makintlajpiya. ¿Tikita kanon nemi Saulo? Kuakon sekimej tlakamej peuaj kitemojmotlaj Esteban. Yejua notlakuanketsa, ken nikan tikita, niman kichiuilia teoyotl toTajtsin: ‘Jehová, maka tikintlajtlakoltis pampa kichiuaj yejuin tlen xkuajli’. Yejua kimatstika ika akin tlamachtiaj ipan tlanauatijli teititiaj tlen xmelauak niman yokinkajkayaujkej sekimej akin ompa nemij. Ijkuak ipan nochiua yejuin, Esteban miki.

Ijkuak yakaj mitschiuilia itlaj tlen xkuajli, ¿tiktlakuepilia noso tiktlajtlanilia toTajtsin makitlajyouilti? Nion Esteban nion Jesús xokichiujkej yejuin. Yejuamej kipiayaj kuajli inyojlo hasta iuan akin xkuajli okinchiuilijkej. Noijki ijkon matikchiuakan.

Hechos 6:8-15; 7:1-60.



Tlajtoltilistin

  • ¿Akinon Esteban, niman tlenon kuajpaleuijtiuj toTajtsin makichiua?
  • ¿Tlenon kijtoua Esteban, tlen kichiua melak makualanikan tlamachtijkej ipan tlanauatijli?
  • Sakin ijkuak yokitejkoyotskej Esteban niman yokikixtijkej itech ueyikalpan, ¿tlenon kichiuiliaj?
  • Ipan tlaixkopinajli, ¿akinon yejon telpochtli akin nemi inakastlan tlakentin?
  • ¿Tlenon Esteban kitlajtlanilia Jehová ijkuak sa achijtsin poliui ika mikis?
  • ¿Kenon noijki uelis tikchiuaskej ken Esteban ijkuak yakaj texchiuilia itlaj tlen xkuajli?

Okseki tlajtoltilistin

  • Xpoua Hechos 6:8-15.

    ¿Tlenon kitekitiltiaj tlayekankej ipan tlaneltokiltin niman ijkon kinekij kiteltiskej maka matenojnotsakan iteixpantijkauan Jehová? (Hech. 6:9, 11, 13).

  • Xpoua Hechos 7:1-60.

    ¿Tlenon okipaleui Esteban matlajto ika yolchikaualistli ipan Sanedrín, niman tlenon tiuelij? (Hech. 7:51-53; Rom. 15:4; 2 Tim. 3:14-17; 1 Ped. 3:15).

    ¿Kenon noneki titlanemiliskej itech akin kixnamikij tekitl tlen toTajtsin yotechmaktili? (Hech. 7:58-60; Mat. 5:44; Luc. 23:33, 34, NM).